بانكنوتتار قانداي جاعدايدا قولدانىستان الىنادى؟

«ازاماتتار قازاقستان ۇلتتىق بانكىنە نومينالى 1000 تەڭگەلىك «كۇلتەگىن» ەستەلىك بانكنوتتارىن كەي دۇكەن قابىلداماعانىن ايتىپ, شاعىمدانىپ جاتادى. بۇل كۋپيۋرالاردىڭ ءالى دە زاڭدى تولەم قۇرالى ەكەنىن ەستەرىڭىزگە سالا كەتكىم كەلەدى. ولاردى باسقا دا ەستەلىك بانكنوتتار سەكىلدى بانك وپەراتسيالارى مەن اۋدارىمدار كەزىندە جانە تولەمنىڭ كەز كەلگەن ءتۇرى بويىنشا قابىلداۋعا مىندەتتى. مۇنداي بانكنوتتاردى قابىلداۋدان باس تارتقان جاعدايدا اكىمشىلىك قۇقىق بۇزۋشىلىق تۋرالى كودەكستىڭ 206-بابىنا سايكەس اكىمشىلىك جاۋاپكەرشىلىك قاراستىرىلعان», دەدى د.داۋتوۆا.

باسقارما باسشىسىنىڭ ايتۋىنشا, اتالعان بانكنوتتاردى قابىلداماعان جاعدايدا ونى بەينەجازباعا ءتۇسىرىپ نەمەسە جازباشا نەگىزدەمە جازىپ, ۇلتتىق بانكتىڭ اۋماقتىق فيليالىنا جۇگىنۋگە بولادى. ول بانكنوتتار تابيعي توزىعى جەتكەندە عانا اينالىمنان  الىنادى. 

ايتا كەتەيىك, ءباسپاسوز حابارلاماسىندا «Kۇلتەگىن» تۇركى جازبا ەسكەرتكىشىنە ارنالعان نومينالى 1000 تەڭگەلىك بانكنوت,  ۇلتتىق ۆاليۋتا – تەڭگەنىڭ 20 جىلدىعىنا ارنالعان 20 000 جانە 5 000 تەڭگەلىك بانكنوت, قر تاۋەلسىزدىگىنىڭ 25 جىلدىعىنا ارنالعان 10 000 تەڭگەلىك بانكنوت,  قر تاۋەلسىزدىگىنىڭ 20 جىلدىعىنا ارنالعان 10 000 تەڭگەلىك بانكنوت, 2011 جىلعى قازاقستانداعى 7-قىسقى ازيا ويىندارىنا ارنالعان 2 000 تەڭگەلىك بانكنوت,  قر «يسلام كونفەرەنتسياسى» ۇيىمىنا توراعالىق ەتۋىنە ارنالعان 1 000 تەڭگەلىك بانكنوت, قر 2010 جىلى ەۋروپاداعى قاۋىپسىزدىك جانە ىنتىماقتاستىق ۇيىمىندا (ەقىۇ) توراعالىق ەتۋىنە ارنالعان 1 000 تەڭگەلىك بانكنوت ساۋدا اينالىمدارى مەن اۋدارىمدار ءۇشىن جارامدى ەكەنى جازىلعان.

ەستەلىك  بانكنوتتاردىڭ تولىق ءتىزىمى, سونداي-اق ۇلتتىق بانك فيليالدارىنىڭ مەكەنجايى مەن بايلانىس دەرەكتەرى تۋرالى اقپارات قۇب سايتىندا ورنالاسقان.