ەڭبەك جانە حالىقتى الەۋمەتتىك قورعاۋ مينيسترلىگى مەن «ەڭبەك رەسۋرستارىن دامىتۋ ورتالىعى» اق skills.enbek.kz قىسقا مەرزىمدى ونلاين كۋرستارعا وقىتۋ پورتالىن ىسكە قوستى. قازىردىڭ وزىندە ونلاين كۋرستاردىڭ 70 اۆتورى مەن ازىرلەۋشىسى مۇددەلى ازاماتتار ءۇشىن وزدەرىنىڭ وقىتۋ باعدارلامالارىن ۇسىنۋعا دايىن.
پورتال ماركەتپلەيس (قىزمەتتەر نارىعى) قاعيداتى بويىنشا ونلاين كۋرستارعا قولجەتىمدىلىكتى ۇسىناتىن حالىقارالىق وقىتۋ الاڭدارىنىڭ قازاقستاندىق بالاماسى سانالادى. رەسۋرس جالپى ەل حالقىنىڭ ءبىلىم دەڭگەيى مەن كاسىبيلىگىن ارتتىرۋ, مانساپتىق دامۋىن ىنتالاندىرۋ جانە ء«ومىر بويى وقىتۋ» تۇجىرىمداماسىن ىلگەرىلەتۋ ماقساتىندا قۇرىلدى.
ىسكە قوسۋ كەزىندە قازاقستاندىق اۆتورلار مەن ازىرلەۋشىلەر اسپازدىق جانە كۋليناريالىق ءىس, كوسمەتيكالىق, زاڭگەرلىك جانە بۋحگالتەرلىك قىزمەتتەر, قۇرىلىس, قوناقۇي جانە مەيرامحانا ءىسى, ءىس جۇرگىزۋ, IT, SMM سالالارى بويىنشا كۋرستار ۇسىنادى.
كەز كەلگەن ازامات https://skills.enbek.kz/ سىلتەمەسى ارقىلى نەمەسە enbek.kz ەلەكتروندى ەڭبەك بيرجاسىندا «ونلاين وقىتۋدى» تاڭداۋ ارقىلى تالاپ ەتىلەتىن بىلىكتىلىككە وقىتۋعا نەمەسە بىلىكتىلىكتى ارتتىرۋ كۋرستارىنا قول جەتكىزە الادى.
كۋرستاردىڭ اۆتورلارى مەن ازىرلەۋشىلەرى – قازاقستاندىق زاڭدى تۇلعالار مەن جەكە كاسىپكەرلەر, سونىڭ ىشىندە وقۋ ورتالىقتارى, ءبىلىم بەرۋ ۇيىمدارى. ولار قازىردىڭ وزىندە كۋرستاردى ورنالاستىرۋ ءۇشىن تەگىن الاڭ ۇسىنۋدا, ونلاين وقىتۋدى دامىتۋعا جاردەمدەسۋدە, قوسىمشا كىرىس كوزىن الۋدا پورتالدىڭ ارتىقشىلىقتارىن كورىپ وتىر.
جاڭا باستاعان اۆتورلار مەن ازىرلەۋشىلەر ءۇشىن پورتالدا ونلاين كۋرستاردى قۇرۋ بويىنشا ادىستەمەلىك ۇسىنىمدار جانە ولارعا قويىلاتىن تالاپتار ازىرلەندى جانە ورنالاستىرىلدى.
Skills.enbek.kz پورتالىندا تىركەلۋ مەن جۇمىس ىستەۋدىڭ بارلىق ماسەلەلەرى بويىنشا ەڭبەك جانە حالىقتى الەۋمەتتىك قورعاۋ مينيسترلىگى «ەردو» اق جاۋاپتى قىزمەتكەرلەرىمەن بايلانىسۋ قاجەت.
«ەگەمەن-اقپارات»