تۇركىستاندىق دارىگەرلەر شالا تۋعان ۇشەمدى امان الىپ قالدى. جىل باسىنان بەرى وڭىردە التىنشى ۇشەم دۇنيەگە كەلدى. وبلىستىق قوعامدىق دەنساۋلىق ساقتاۋ باسقارماسىنىڭ مالىمەتىنشە, نارەستەلەر تۇركىستان قالاسىندا ورنالاسقان №3 وبلىستىق پەريناتالدىق ورتالىقتا دۇنيەگە كەلدى.
ءۇش ۇل بالانى 39 جاستاعى ديلحۋمار يۋسۋپوۆا وتا ارقىلى بوسانعان. دارىگەرلەر تۋعاندا سالماعى نەبارى 1,7 كيلو شاماسىنداعى ءۇش ۇلدى 13 كۇن بويى كۇتىپ, جەتىلدىرگەن. مەرزىمىنەن ەرتە تۋعان ۇشەم پەرزەنتحانا دارىگەرلەرىنىڭ باقىلاۋىنا الىنعان.
مەديتسينا قىزمەتكەرلەرىنىڭ كومەگىمەن سابيلەر سالماق قوسىپ, جاعدايى جاقساردى. تۇركىستاندىق دارىگەرلەردىڭ بىلىكتىلىگى مەن كۇتىمىنىڭ, تىنىمسىز ەڭبەگىنىڭ ناتيجەسىندە شالا تۋعان شاقالاقتار امان قالىپ, انالارى ولاردى باۋىرىنا باستى.
مامانداردىڭ ايتۋىنشا, قازىر ولاردىڭ ومىرىنە تونەتىن ەش قاۋىپ جوق. نارەستەلەرگە جاقىندارى حاسان, حۋسان جانە مۋحامماد ەسىمدەرىن بەرگەن.
ايتا كەتسەك, ۇشەم دۇنيەگە كەلگەن وتباسىنىڭ ءتورت قىزى مەن ەكى ۇلى بار. 39 جاستاعى كەلىنشەك 9 بالانىڭ اناسى اتاندى. كوپبالالى انا ءۇي شارۋاسىندا, ال وتاعاسى – قاراپايىم جۇمىسشى.
بىلتىر وبلىس ورتالىعىندا 10 مىڭعا جۋىق ءسابي, ال جىل باسىنان بەرى 6 مىڭ نارەستە دۇنيەگە كەلدى. ورتالىق دارىگەرلەرى جىل سايىن جۇزدەگەن شالا تۋعان نارەستەلەردىڭ ءومىرىن ساقتاپ قالۋدا.
ەسكەندىر ەرتاي
تۇركىستان وبلىسى