ماۋلەن اشىمباەۆ ساۋد ارابياسىنىڭ قازاقستانداعى توتەنشە جانە وكىلەتتى ەلشىسى ابدۋلازيز بەن ابدۋللا ءال-داۋدتى قابىلدادى, دەپ حابارلادى سەناتتىڭ ءباسپاسوز قىزمەتى.
تاراپتار كەزدەسۋ بارىسىندا ەكى ەلدىڭ ىنتىماقتاستىعى مەن پارلامەنتارالىق بايلانىستار بويىنشا ءوزارا ءىس-قيمىلى ماسەلەلەرىن تالقىلادى.
سەنات سپيكەرى ساۋد ارابياسى قازاقستاننىڭ تاياۋ شىعىستاعى ماڭىزدى سەرىكتەسىنىڭ ءبىرى ەكەنىن ايتتى.
«قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ كۇش-جىگەرىنىڭ ارقاسىندا ءبىزدىڭ ەلدەرىمىز اراسىندا ءوزارا قۇرمەت پەن سەنىمگە نەگىزدەلگەن ساۋدا-ەكونوميكالىق, مادەني جانە ساياسي بايلانىستار قالىپتاستى. قازىرگى تاڭدا مەملەكەت باسشىسى قازاقستان مەن ساۋد ارابياسىنىڭ اراسىنداعى كوپ قىرلى ىنتىماقتاستىقتى ودان ءارى نىعايتۋعا باسا نازار اۋدارىپ وتىر», دەدى ماۋلەن اشىمباەۆ.
پالاتا توراعاسى ءوزارا پارلامەنتارالىق ديالوگتى ودان ءارى دامىتۋعا دا بارلىق مۇمكىندىك بار ەكەنىنە نازار اۋداردى. ول سونداي-اق قازاقستاندا وتكىزىلىپ كەلە جاتقان الەمدىك جانە ءداستۇرلى دىندەر كوشباسشىلارىنىڭ سەزىنە ساۋد ارابياسىنىڭ وكىلدەرى بەلسەندى قاتىسقانى ءۇشىن ەلشىگە العىس ايتتى جانە پاندەميادان كەيىنگى كەزەڭدە مەملەكەتارالىق ىنتىماقتاستىققا قارقىن بەرۋ قاجەتتىگىن اتاپ ءوتتى.
ء«بىزدىڭ ەلدەرىمىزدى تاريحي, رۋحاني جانە مادەني تىعىز بايلانىستار جاقىنداستىرادى. ساۋد ارابياسىنىڭ ەكونوميكالىق دامۋى ءبىزدىڭ كوز الدىمىزدا. ەكونوميكانى ارتاراپتاندىرۋعا, دەنساۋلىق ساقتاۋدى, ءبىلىم بەرۋدى, ينفراقۇرىلىمدى جانە ءتۋريزمدى دامىتۋعا باعىتتالعان «Saudi vision 2030» باعدارلاماسىن جەكە اتاپ وتكىم كەلەدى. ءبىز ۇقساس ماسەلەلەردى شەشىپ كەلەمىز. ءبىزدىڭ ەلدەرىمىزدەگى ەكونوميكالىق رەفورمالاردىڭ كوپتەگەن اسپەكتىلەرى مەن باعىتتارى دا ۇقسايدى, ويتكەنى ولاردىڭ باستى ماقساتى – ءبىزدىڭ مەملەكەتتەرىمىزدەگى حالىقتاردىڭ ءال-اۋقاتىن ارتتىرۋ», دەدى ماۋلەن اشىمباەۆ.
سونىمەن قاتار سەنات توراعاسى «G-20» ۇيىمىنا تابىستى توراعالىق ەتۋىنە وراي ساۋد ارابياسىنىڭ ۇكىمەتىنە قۇتتىقتاۋىن جەتكىزدى.