قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىق ەتۋىمەن قالىپتاسقان سانيتارلىق-ەپيدەميالىق تالاپتاردى ساقتاي وتىرىپ, «ارحيۆ ءىسىنىڭ وزەكتى ماسەلەلەرى جانە دامۋ جوسپارلارى» تاقىرىبىندا رەسپۋبليكالىق كەڭەس وتكىزىلدى.
كەڭەستە وتاندىق ارحيۆ سالاسىنىڭ قازىرگى جاي-كۇيى, ارحيۆ ءىسى جانە قۇجاتتاما سالاسىندا نورماتيۆتىك-قۇقىقتىق بازانى جەتىلدىرۋ, ارحيۆ ىسىندە زاماناۋي اقپاراتتىق تەحنولوگيالاردى قولدانۋ, مەملەكەتتىك ارحيۆتەردىڭ ماتەريالدىق-تەحنيكالىق جابدىقتالۋى, «ارحيۆ – 2025» كەشەندى جوسپارىنىڭ ىسكە اسىرىلۋى, ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ ارحيۆتەرمەن جۇمىس جۇرگىزۋدىڭ جاي-كۇيى جانە باسقا دا وزەكتى ماسەلەلەر تالقىلاندى.
ارحيۆ ءىسىنىڭ وزەكتى ماسەلەلەرى مەن دامۋ جوسپارلارى تۋرالى مادەنيەت جانە سپورت ءمينيسترى ا.رايىمقۇلوۆا, پارلامەنت ءماجىلىسىنىڭ دەپۋتاتى ا.سارىم, قوعام قايراتكەرى س.قاسىموۆ, ارحيۆ ىستەرى جانە قۇجاتتامانى باسقارۋ كوميتەتىنىڭ توراعاسى ق.بوراش ءسوز سويلەدى.
بۇگىنگى تاڭدا ارحيۆ سالاسىنا مەملەكەت باسشىسى, ۇكىمەت جانە مينيسترلىك تاراپىنان ايرىقشا كوڭىل بولىنۋدە. قازاقستان رەسپۋبليكاسى پرەزيدەنتىنىڭ تاپسىرماسىنا سايكەس ارحيۆ سالاسىنداعى مەملەكەتتىك ساياساتتى ۇيلەستىرۋگە ۋاكىلەتتى ۆەدومستۆو رەتىندە مادەنيەت جانە سپورت مينيسترلىگىنىڭ ارحيۆ ىستەرى جانە قۇجاتتامانى باسقارۋ كوميتەتى قۇرىلدى. سونداي-اق ۇكىمەت قاۋلىسىمەن 22 جەلتوقسان «ارحيۆيستەر كۇنى» بولىپ بەلگىلەندى. سالا تاريحىندا العاش رەت «ارحيۆ سالاسىنىڭ ۇزدىگى» توسبەلگىسى تاعايىندالدى. مەملەكەت باسشىسىنىڭ تاپسىرماسى بويىنشا 2020 جىلعى 1 قاڭتاردان باستاپ رەسپۋبليكالىق مادەنيەت جانە ارحيۆتەر ۇيىمدارىنىڭ قىزمەتكەرلەرىنە 50% كولەمىندە, ال كوممۋنالدىق (وڭىرلىك) ۇيىمداردىڭ قىزمەتكەرلەرىنە لاۋازىمدىق جالاقىسىنىڭ 35% مولشەرىندە قوسىمشا اقى بەلگىلەۋ ارقىلى جالاقى كولەمى ارتتىرىلدى. ارحيۆيستەردىڭ جالاقىسىن كوتەرۋگە بايلانىستى جۇمىستار ودان ءارى جالعاسىپ جاتىر. تاياۋدا وتكەن قازاقستان رەسپۋبليكاسى قاۋىپسىزدىك كەڭەسى وتىرىسىنىڭ قورىتىندىسى بويىنشا ارحيۆ قىزمەتكەرلەرىنىڭ زياندى (ەرەكشە زياندى) جانە قاۋىپتى (ەرەكشە قاۋىپتى) ەڭبەگى ءۇشىن قوسىمشا اقى تولەۋدى قاراستىرۋ ماقساتىندا ەڭبەك كودەكسىنە سايكەس ءتيىستى تىزبەگە مەملەكەتتىك ارحيۆ مەكەمەلەرى قىزمەتكەرلەرىنىڭ لاۋازىمدارىن ەنگىزۋ بويىنشا ناقتى شەشىمدەر قابىلدانۋدا.
كەڭەس اياسىندا قۇجاتتىق كورمە ۇيىمداستىرىلىپ, العاش رەت ارحيۆ ىسىنە ۇلەس قوسقان سالا ارداگەرلەرى «ارحيۆ سالاسىنىڭ ۇزدىگى» توسبەلگىسىمەن ماراپاتتالدى.