ەلىمىزدە جۇمىرتقا قىمباتتاۋى مۇمكىن. شارۋا قوجالىقتارىنىڭ بولجاۋىنشا, ون دانا جۇمىرتقانىڭ باعاسى 1000 تەڭگەگە دەيىن وسەدى, دەپ حابارلايدى Egemen.kz كتك ارناسىنا سىلتەمە جاساپ.
وتكەن جىلدان بەرى جۇمىرتقا باعاسى 30%-عا ءوستى. بۇگىندە قۇس فابريكالارى ءار داناسىن ورتا ەسەپپەن 17-20 تەڭگەگە ساتادى. ونىڭ ۇستىنە الىپ-ساتارلاردىڭ باعاسى قوسىلادى.
«مەن كوتەرمە باعامەن ءار جۇمىرتقانى 36 تەڭگەدەن الىپ, ۇستىنە تەك 2 تەڭگە قوسامىن. قۇس فابريكاسىنان السا, ارزانعا تۇسەتىن شىعار. ەستۋىمشە, باسقا جەرلەردە جۇمىرتقانى 50-55 تەڭگەدەن ساتىپ جاتىر ەكەن, بىراق نەگە ولاي بولىپ جاتقانىن بىلمەيمىن. ادەتتە جازدا باعا تۇسەدى. مىسالى, قىستا ءار داناسىن 42 تەڭگەدەن ساتقانمىن», دەيدى ساتۋشى كۇنسۇلۋ بەيسوۆا.
سوڭعى ايدا جۇمىرتقا باعاسى تومەندەدى. ساراپشىلار بۇنى سۇرانىستىڭ ازدىعىمەن بايلانىستىرادى. قازاقستان جۇمىرتقا وندىرۋشىلەر اسسوتسياتسياسىنىڭ ايتۋىنشا, نارىقتا سۇرانىس كوبەيسە, باعا دا كۇرت وسەدى.
«بۇل جىل سايىن بايقالاتىن قۇبىلىس. جۇمىرتقا ءوندىرىسى – ماۋسىمدىق جۇمىس. جازدا, مامىر-شىلدە ايى ارالىعىندا, سۇرانىس ازايادى. مىسالى, ماۋسىمدا سۇرانىس ازايعاندىقتان, فابريكالار جۇمىرتقانىڭ ءار داناسىن 17 تەڭگەدەن ساتا باستادى. ال كۇزدە قۇس فابريكالارى باعانى كوتەرىپ, ءار داناسىن 30 تەڭگەدەن ساتادى. سەبەبى باعا جۇمىرتقانىڭ وزىندىك قۇنىنان جوعارى بولۋى ءتيىس. ياعني, قۇس فابريكالارىنداعى باعا ءار داناسىنا 35-40 تەڭگە ارالىعىندا بولسا, دۇكەندەردە 500-600 تەڭگە بولادى دەپ بولجاپ وتىرمىز», دەپ ءتۇسىندىردى اسسوتسياتسيا باسشىسى ماكسيم بوجكو.
بۇگىندە جۇمىرتقانىڭ سۋپەرماركەتتەگى ەڭ ارزان باعاسى ون داناسىنا 465 تەڭگەنى قۇرايدى. ال بيىل وندىرۋشىلەر ەكى ميللياردان از جۇمىرتقا العان. بۇل بىلتىرعىمەن سالىستىرعاندا 13%-عا تومەن. ساراپشىلاردىڭ ايتۋىنشا, بۇعان قۇس تۇماۋى اسەر ەتكەن. 2020 جىلدىڭ سوڭىندا 2 ملن قۇس ءولىپ, بەس فابريكانىڭ جۇمىسى توقتاتىلعان ەدى.
قازىر شارۋا قوجالىقتارى ءۇي قۇستارىنىڭ ازىعى قىمباتتاپ كەتكەنىنە شاعىمدانۋدا. بۇل دا جۇمىرتقا باعاسىنا اسەر ەتەتىن فاكتورلاردىڭ ءبىرى.
«جەم-سۋ باعاسى الدىڭعى جىلى كيلوگرامىنا 100 تەڭگە بولعان, بىلتىر – 200, بيىل 360 تەڭگەگە شىقتى. مەكيەن تاۋىققا 4-5 كيلوگرامم ازىق كەرەك. بۇدان جۇمىرتقا باعاسى 70%-عا دەيىن ءوسىرۋى مۇمكىن. سەبەبى ازىق قۇنى 100% قىمباتتاپ كەتتى. ءۇي جۇمىرتقاسىنىڭ ون داناسى – 1000 تەڭگەگە, فابريكانىڭ جۇمىرتقاسى 700 تەڭگەگە دەيىن كوتەرىلۋى مۇمكىن», دەيدى شارۋا قوجالىق يەسى يۋليا بارسۋكوۆا.
قۇس وسىرۋشىلەر ازىق باعاسىنا مەملەكەت تاراپىنان باقىلاۋ بولسا دەيدى. ولاردىڭ ايتۋىنشا, جاعداي وزگەرمەسە, شارۋاشىلىقتار جابىلا باستايدى. سايكەسىنشە, تاۋار سانى ازايىپ, باعاسى وسە بەرەدى.
اسەل سارقىت