تاسباقا تىرلىك. قازاقتىڭ تىرلىگىنە قاتتى ۇقسايدى. ميمىرت تا جايباسار. باعىتى بار, بىراق ءجۇرىسى باياۋ. ۋاقىتتىڭ ۇيىتقىپ سوققان جەلى توڭكەرىپ تاستاسا ەكەن دەپ تىلەيسىڭ. اۋزىنا تىستەگەن ءشوبى ارمانىنا جەتكىزە قويار ما ەكەن؟! ونى دا ويلايسىڭ. ۇزدىكسىز اۋىر, شابان ءجۇرىس ءالى اياقتالعان جوق. قازاق تاسباقانىڭ ۇستىندە ۇيىقتاپ جاتىر. استىنداعى ساۋىت قاتتى بولعانىمەن, ۇيقىسى ءتاتتى.
تاسباقانىڭ ءشوبىن العان ادامنىڭ قالاۋى بولاتىنى تۋرالى اڭىز بار. جازۋشى ءابىش كەكىلباەۆ «تاسباقا ءشوبى» اتتى اڭگىمەسىنە ارقاۋ بولعان ءاپسانا. ءۇمىتسىز كەلە جاتىپ, كەنەت ءۇمىتى ويانعان پەندەنىڭ تاعدىرىن سويلەتەدى. الىپ تاسباقانى بەسىك ەتكەن ءسابيدىڭ ارەكەتىندەي ويلى. ءبىز نازارلارىڭىزعا ۇسىنعان, مۇنداعى «كىشكەنتاي يمپەراتور» كارتيناسى سونى مەڭزەيدى. بەلگىلى سۋرەتشى داۋرەن قاستەەۆتىڭ تۋىندىسى اڭىزبەن استاسىپ جاتىر.
ۆەرتيكال ءپىشىندى كارتينادان بۋىرقانعان سارى-جاسىل بوياۋلاردىڭ اراسىنداعى تاسباقا ساۋىتىنىڭ ۇستىندە ۇيىقتاپ جاتقان كىشكەنتاي بالانى كورەمىز. بۇل كورەرمەننىڭ قىزۋ پىكىرىن تۋدىراتىن ەرەكشە ماڭىزدى ءارى فيلوسوفيالىق تۋىندى ءوز سەزىمدەرىڭدى جيناقتاپ, تولعانۋعا ماجبۇرلەيدى.
الەمدىك تۇسىنىكتە تاسباقانىڭ ءرولى ميفتىك قۇبىلىستارعا يە. ول ەجەلگى جانۋارلار تۇرىنە جاتادى جانە الەمدەگى كوپتەگەن مادەنيەتتىڭ سيمۆولى رەتىندە دە ءمانى جوعارى. شىعىس حالىقتارى جالپى الەم جاراتىلىسىنىڭ باستالۋىن وسىمەن بايلانىستىرادى. ەجەلگى گرەكتەر تاسباقا فيزيكالىق ۇردىستەردىڭ تۇراقتىلىعىن بىلدىرەدى دەسە, ءۇندىستان تۇرعىندارى وسى كۇنگە دەيىن تاسباقا جەر بەتىندەگى بارلىق جاندى نارسەنىڭ ءتۇپ اناسى دەپ سانايدى.
ەجەلگى ميفتەر تاسباقانىڭ ساۋىتى كوكتىڭ اسپان كۇمبەزى, ال سۋدىڭ ورتاسىندا قالقىپ جۇرگەن جەر بولسا, ونىڭ تىرشىلىگى دەپ ايتادى. ونى وتباسىنا مولشىلىق پەن سۇيىسپەنشىلىك اكەلەدى دەپ ساناعان. سيمۆولدىق انالوگيانىڭ قىتايلىق جۇيەسىندە تاسباقا قاسيەتتى بەس جانۋاردىڭ ءبىرى رەتىندە سولتۇستىكتى, سۋدى جانە قىستى بىلدىرسە, ال ونىڭ ساۋىتىنىڭ سىنىعىن ساۋەگەيلىككە پايدالانعان. بۇل جانۋار ۇزاق ءومىر ءسۇرۋدى, كەمەڭگەرلىكتى, تۇراقتىلىقتى, تاباندىلىقتى, دەنساۋلىقتى جانە قورعاۋشىنى بىلدىرەدى.
قىتايدا وتباسىنداعى جالعىز بالانى «كىشكەنتاي يمپەراتور» دەپ اتاعان, ويتكەنى مۇنداي بالالارعا بارىنە رۇقسات ەتىلەدى. قىتاي بالاسى اتا-اناسى دا, مۇعالىمدەرى دە, وتكەن-كەتكەن دە, ءتىپتى كۇن دە بارلىعى سول بالانىڭ توڭىرەگىندە اينالۋى قاجەت بۇكىل الەمنىڭ كىندىگىنە اينالادى.
سۋرەتشى جاسىل ءتۇستىڭ سۋىق رەڭكتەرىن جىلى سارى تۇسپەن كەرەمەت ۇيلەستىرە بىلگەن. بىزگە ءسابيدى كۇن ساۋلەسىنىڭ جىلۋى قورشاپ تۇرعانداي. ال كارى تاسباقا «كىشكەنتاي يمپەراتوردى» قاۋىپ-قاتەردەن, تاۋقىمەتتەن قورعاپ ۋاقىت پەن كەڭىستىكتە باياۋ قوزعالىپ بارا جاتقانداي كورىنەدى.
بىلەسىز بە, تاسباقا جەردىڭ استىنان سۇلدەرىن سۇيرەتىپ ارەڭ شىققاندا, داۋىل تاسباقانىڭ ءۇستىنىڭ شاڭىن قاعۋ ءۇشىن سوعادى ەكەن. ەڭ عاجابى تاسباقانىڭ داۋىلى تاسباقادان باسقانىڭ ءبارىن كوتەرىپ كەتەتىن قۇدىرەتكە يە. تاسباقا ورنىندا قالادى, باسقانى كوكتەن ىزدە, جەردەن ىزدە, تاپپايسىڭ. قازاق ەمەس دەڭىزشى, ناق ءوزى. قازاق دەگەن – ءدال قازىر «كىشكەنتاي يمپەراتور» سەكىلدى.