بۇگىن ۇكىمەت وتىرىسىندا پرەمەر-مينيستر اسقار مامين بارلىق دەڭگەيدەگى اكىمدەر ۆاكتسيناتسيا ماسەلەسىن جەكە باقىلاۋعا الۋى ءتيىس ەكەنىن ايتتى, دەپ حابارلايدى Egemen.kz.
«جالپى سانيتاريالىق-ەپيدەميولوگيالىق جاعداي جاقساردى. ۆيرۋس جۇقتىرۋ دەڭگەيى تومەندەپ كەلەدى, ءبىر اپتادا 30 پايىزعا ازايدى.
ەلوردا عانا «قىزىل» ايماقتا قالدى. وسى رەتتە, اكىمدىك قوسىمشا شارالار قابىلداۋى كەرەك. جالپى 10 ءوڭىر, ياعني باسىم بولىگى «جاسىل» ايماقتا, 6 ءوڭىر «سارى» ايماقتا. تۇرعىنداردىڭ ۆاكتسينا الۋى مەن ەپيدەمياعا قارسى جۇرگىزىلگەن شارالاردىڭ ناتيجەسىندە قازاقستان «جاسىل» ايماققا كىردى», دەدى ا. مامين.
پرەمەر-ءمينيستردىڭ ايتۋىنشا, بۇگىنگى كۇنى 2,4 ميلليونعا جۋىق ادام ۆاكتسينانىڭ ءبىرىنشى كومپونەنتىن جانە شامامەن 1,3 ميلليون ادام ەكىنشى كومپونەنتىن الدى.
«اكىمدىكتەر مەن دەنساۋلىق ساقتاۋ مينيسترلىگى جاز كەزىندە ۆاكتسينالاۋ قارقىنىن بارىنشا ۇلعايتۋى قاجەت, اسىرەسە ماڭعىستاۋ, اقمولا, قوستاناي وبلىستارى مەن نۇر-سۇلتان قالاسىندا. بارلىق دەڭگەيدەگى اكىمدەر ۆاكتسيناتسيا ماسەلەسىن جەكە باقىلاۋعا الۋى ءتيىس», دەدى ۇكىمەت باسشىسى.