جاڭا وندىرىستەردى ىسكە قوسقاننىڭ ناتيجەسىندە سوڭعى جىلدارى قايتا وڭدەلگەن كۇرىش ءوندىرىسى قارقىن الدى, دەپ حابارلايدى Egemen.kz اۋىل شارۋاشىلىعى مينيسترلىگىنە سىلتەمە جاساپ.
الداعى بىرنەشە جىلدا ەگىس القاپتارىن ارتاراپتاندىرۋعا بايلانىستى كۇرىشتى ىشكى نارىققا جەتەتىندەي كولەمدە عانا ءوندىرۋ جوسپارلانىپ وتىر. 2020 جىلى قازاقستاندا 199,4 مىڭ توننا وڭدەلگەن كۇرىش ءوندىرىلدى, بۇل رەسپۋبليكانىڭ ىشكى نارىقتاعى قاجەتتىلىگىن 185,9%-كە قامتاماسىز ەتەدى.
سالىستىرۋ ءۇشىن: 2019 جىلى 166 مىڭ توننا ءونىم ءوندىرىلدى. ياعني ءبىر جىل ىشىندە ءوندىرىس ءوسىمى 20%-تەن استى. وتكەن جىلى ءوندىرىس ءوسىمىنىڭ ارقاسىندا وڭدەلگەن كۇرىشتىڭ ەكسپورتى 12,7%-كە ارتىپ, 101,2 مىڭ توننانى قۇرادى. سونىڭ ناتيجەسىندە يمپورت 57,7 %-كە, ياعني, 9 مىڭ تونناعا دەيىن تومەندەدى.
قازىرگى ۋاقىتتا وتاندىق ءوندىرىستىڭ ارقاسىندا يمپورتتىڭ ۇلەسى 8,4% عانا. 2015 جىلدان بەرى قازاقستاندا كۇرىشتى ءوندىرۋ مەن قايتا وڭدەۋ سالاسىندا جالپى قۇنى 2,3 ملرد تەڭگە بولاتىن 8 ينۆەستيتسيالىق جوبا ىسكە اسىرىلدى. سونىڭ ناتيجەسىندە ءوندىرىس ءوسىمى قارقىن الدى. مەملەكەتتىك قولداۋ شارالارى اياسىندا جاڭا كاسىپورىندار سالۋ, جۇمىس ىستەپ تۇرعان قايتا وڭدەۋ كاسىپورىندارىن كەڭەيتۋ جانە جاڭعىرتۋ جۇمىستارىن جۇزەگە اسىرعاندا ينۆەستيتسيالىق سۋبسيديالار قاراستىرىلدى.
بۇدان بولەك, «قاراپايىم زاتتار ەكونوميكاسى» اياسىندا قايتا وڭدەۋ كاسىپورىندارىن ينۆەستيتسيالاۋعا جانە اينالىم قاراجاتىن تولىقتىرۋعا مۇمكىندىك بەرەتىن جىلدىق سىياقى مولشەرى 6%-دىق جەڭىلدەتىلگەن نەسيەلەر بار. سونىمەن قاتار ەكىنشى جىل قاتارىنان رەسپۋبليكانىڭ اگروونەركاسىپ كەشىنىندە ەگىس القاپتارىن ءارتاراپتاندىرۋ ساياساتى جۇرگىزىلىپ جاتىر. ماسەلەن, بيىل وبلىس اكىمدىكتەرىنىڭ دەرەكتەرى بويىنشا, كۇرىش ەگەتىن الاڭ 8,4 مىڭ گەكتارعا قىسقارعان. ياعني ەلىمىزدەگى جالپى كۇرىش ەگىس القابى 95,6 مىڭ گەكتارعا دەيىن ازايدى.
كۇرىش القاپتارىنىڭ كولەمىن بىرتىندەپ ازايتىپ, ونىڭ ورنىنا ءتيىمدى ءارى ىلعالدى از قاجەت ەتەتىن باقشا ونىمدەرىنىڭ, جەم-ءشوپ پەن مايلى داقىلداردىڭ القاپتارىن ۇلعايتۋ جوسپارلانىپ وتىر.