قازاقستاننىڭ اۋسترياداعى ەلشىلىگىندە ۇلى قازاق اقىنىنىڭ ەسىمى مەن مۇراسىن ناسيحاتتاۋعا ەلەۋلى ۇلەس قوسقان قوعام قايراتكەرلەرىنە تۇركسوي-دىڭ «اباي 175 جىل» اتتى ەستەلىك مەدالدارى تابىس ەتىلدى. بۇل تۋرالى ءسىم ءباسپاسوز قىزمەتى حابارلادى.
اتالعان ماراپاتقا ەقىۇ پارلامەنتتىك اسسامبلەياسىنىڭ بۇرىنعى ءتورايىمى كريستين مۋتتونەن, سونداي-اق «قازاقستان دوستارى كلۋبىنىڭ» مۇشەسى رۋدولف لوبمايەر يە بولدى.
ولار اباي مۇراسىن ناسيحاتتاۋعا ءوز قىزمەتتەرىن جوعارى باعالاعانى ءۇشىن ريزاشىلىق ءبىلدىرىپ, ەكى ەل اراسىنداعى ىنتىماقتاستىقتى نىعايتۋعا ودان ءارى ىقپال ەتۋگە دايىن ەكەندىكتەرىن راستادى.
ايتا كەتەيىك, 2019 جىلدىڭ تامىزىندا قازاقستاننىڭ اۋسترياداعى ەلشىلىگىنىڭ قولداۋىمەن ورتالىق جانە شىعىس قازاقستاننىڭ كيەلى جەرلەرىنە «Silk Way Expedition Through The Great Steppe 2019» جوباسى اياسىندا ەكسپەديتسيا ۇيىمداستىرىلدى. وعان ك. مۋتتونەن دە قاتىستى. ساپار بارىسىندا قاتىسۋشىلار ابايدىڭ تۋعان جەرىنە بارىپ, وندا ەقىۇ پا-نىڭ بۇرىنعى ءتورايىمى اقىننىڭ «جاز» ولەڭىن نەمىس تىلىندە وقىدى.