ەلوردانىڭ 30 جاستاعى تۇرعىنى مامىر ايىنىڭ باسىندا وكپەسىنىڭ 90%-ى زاقىمدانۋىمەن №3 كوپبەيىندى قالالىق اۋرۋحاناعا تۇسكەن. دارىگەرلەردىڭ جۇمىسىنىڭ ناتيجەسىندە ناۋقاس بۇگىن ەمدەلىپ شىقتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
4 مامىر كۇنى 30 جاستاعى ەر ادام كوۆيدتىك اۋرۋحانا رەتىندە قايتا بەيىمدەلگەن №3 كوپسالالى قالالىق اۋرۋحاناعا جاتقىزىلدى. ناۋقاس اۋىر جاعدايدا رەانيماتسياعا 90% وكپە زاقىمدانۋىمەن ستاتسيونارلىق ەمگە جاتقىزىلعان بولاتىن.
ناۋقاستىڭ ايتۋى بويىنشا اۋرۋ بىرتىندەپ ءورشي باستادى. 2-3 كۇننەن كەيىن ناۋقاسپەن بايلانىستا بولعان ايەل دە سول اۋرۋحاناعا جاتقىزىلدى.
«الدىمەن مەن ۇيدە ەمدەلۋگە تىرىستىم. ءوزىن-ءوزى ەمدەۋ اۋىر جاعدايعا اكەلدى. ەكى كۇننەن كەيىن مەنىڭ تۋىسىمدى ەمدەۋگە جاتقىزدى, وعان دا COVID-19 دياگنوزى قويىلدى», دەيدى ناۋقاس.
ەر ادام جانساقتاۋ بولىمىندەگى مەدبيكەلەر مەن سانيتارلارعا ەرەكشە العىسىن بىلدىرەدى.
«سانيتارلار مەنى قاسىقپەن تاماقتاندىردى, سەبەبى مەن ءوزىم دەم الا المادىم, تاماق ىشە المادىم. سونىڭ ءبىرى – ازيا, ەسىمى ەسىمدە قالدى. تاعى ەكى سانيتار بار ەدى, اتى مەن تەگى ەسىمدە قالماپتى. وكىنىشكە وراي, مەن ولاردى كوشەدە كورسەم تانىمايمىن, ويتكەنى ولار جقق-مەن جۇمىس ىستەيدى – ەشتەڭە كورىنبەيدى», دەيدى ەر ادام.
سونداي-اق, ەگەر مەديتسينا قىزمەتكەرلەرىنىڭ مۇنداي مەيىرىمدى, قامقور قارىم-قاتىناسى بولماسا, ساۋ قالپىنا ءوزى كەلە الماس ەدى دەيدى ناۋقاس.
ء«بىزدى ەمدەۋدە مەدبيكەلەر دە, دارىگەرلەر دە ماڭىزدى ءرول اتقاردى. ولاردىڭ ءبارى وتە ۇيلەسىمدى جانە بىرلەسە وتىرىپ جۇمىس ىستەيدى. سول سەبەپتى وسى ناتيجەگە قول جەتكىزدى. ارينە, كوپ نارسە باسشىلىققا بايلانىستى. دۇرىس ۇيىمداستىرۋ كوپ نارسەنى شەشەدى. مەن جۇمىستى ورىندى ۇيىمداستىرعان № 3 كقا ديرەكتورىنا العىس بىلدىرەمىن. مەنىڭ ەمدەلىپ شىعۋىما جانە ساۋىعۋىما ۇلەستەرىن قوسقان مەديتسينا قىزمەتكەرلەرىنىڭ بارىنە العىسىمدى بىلدىرەمىن», دەدى ناۋقاس.
كارديولوگ داريگا ءبىلالوۆا ناۋقاستىڭ جاعدايى وتە اۋىر بولعانىن اتاپ ءوتتى. دارىگەردىڭ ايتۋىنشا, شتاتتان تىس ماماندارمەن ەمدەۋ تاكتيكاسى بويىنشا كەڭەس بىرنەشە رەت وتكىزىلدى.
«ەرەكشە اۋىر جاعداي بولدى. كۆي تەك وكپەنىڭ عانا ەمەس, باۋىردىڭ, بۇيرەكتىڭ جانە ناۋقاستىڭ جۇرەگىنە قاتتى اسەر ەتتى. ناۋقاس دۇرىس رەجيمدى ۇستانىپ, ءبىز تاعايىنداعان ەمدەۋدى ودان ءارى ساقتاسا, وندا ول تولىق قالپىنا كەلەدى دەپ سەنەمىز», دەپ تولىقتىردى ورتالىق دارىگەرلەرى.