اياگوز قالاسىندا 2006 جىلى تۋعان كامەلەتكە تولماعان جەتكىنشەككە ارناۋلى الەۋمەتتىك قىزمەت كورسەتۋ ورتالىعىنىڭ تاربيەشىلەرى دەنە جاراقاتىن سالعان. بۇل فاكت بويىنشا سوتقا دەيىنگى تەرگەۋ باستالدى.
ءباسپاسوز كونفەرەنتسياسىندا اۋدان اكىمى سەيىلبەك ىسقاقوۆ, اۋدان پروكۋرورى رۋسلان مۇراتبەكوۆ, مەكەمە ديرەكتورى شولپان ماقاشەۆا وقيعا تۋرالى رەسمي اقپارات بەردى.
– دارىگەر-پسيحياتردىڭ قىراعىلىعى مەن بەينەباقىلاۋ كامەرالارىنىڭ ناتيجەسىندە بولعان وقيعاعا جەدەل مونيتورينگ جانە بەينەتىركەۋ جۇرگىزىلدى. قاتىگەز ءىس-ارەكەت دەرەگى بويىنشا بىردەن قۇقىق قورعاۋ ورگاندارىنا, پروكۋراتۋراعا, اۋدان- دىق اكىمدىككە حابارلانىپ, جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنا باياندالدى. بەينەجازبالار قۇقىق قورعاۋ ورگاندارىنا بەرىلدى. مەن قىزمەت الۋشىنىڭ قامقورشىسى بولعاندىقتان, قاتىگەزدىك فاكتىسى بويىنشا ارىز جازدىم, – دەدى ورتالىق ديرەكتورى ش.ماقاشەۆا.
اياگوز اۋداندىق پوليتسيا ءبولىمى جەدەل-تەرگەۋ توبىنىڭ قىزمەتكەرلەرى زارداپ شەگۋشىنىڭ بەتى مەن مويىن تۇسىندا سىزاتتار بارىن انىقتادى. اتالعان فاكتى بويىنشا قىلمىستىق كودەكستىڭ 140-بابىنىڭ 2-بولىگىمەن (كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ) قوزعالعان قىلمىستىق ءىس تىركەلدى. زاڭناماعا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى. قازىرگى ۋاقىتتا بۇلتارتپاۋ ماسەلەسى شەشىلۋدە. سوت-مەديتسينالىق ساراپتاما تاعايىنداۋ جوسپارلانۋدا.
ءباسپاسوز كونفەرەنتسياسىندا سپيكەرلەر اتاپ وتكەندەي, بىلتىر مەكەمەدە وبلىس پروكۋرورىنىڭ باستاماسىمەن تاربيەلەنۋشىلەردىڭ قاۋىپسىزدىگىن قامتاماسىز ەتۋ ماقساتىندا بەينەباقىلاۋ كامەرالارى ورناتىلعان بولاتىن. ەستەرىڭىزدە بولسا, بىلتىر اياگوز اۋدانىنداعى ارناۋلى الەۋمەتتىك قىزمەت كورسەتۋ ورتالىعىنداعى ءتورت بالانىڭ اۋىر دەنە جاراقاتىن الۋ دەرەگى بويىنشا قىلمىستىق ءىس قوزعالعان ەدى. تاربيەلەنۋشىلەردىڭ ولىمىنە قاتىستى تەرگەۋ بارىسىندا ەكى كوميسسيالىق سوت-مەديتسينالىق ساراپتاماسى جۇرگىزىلىپ, بالالار تۋا بىتكەن اۋرۋ سالدارىنان قايتىس بولدى دەگەن قورىتىندى جاسالعان-دى. الايدا مايىتتەردى تەكسەرۋ كەزىندە ءۇش بالانىڭ دەنەسىنەن جاراقاتتار انىقتالعان. ەندى مىنە, جىل وتپەي جاتىپ, 15 جاستاعى بالانى ۇرۋ دەرەگى تىركەلىپ وتىر. ايتا كەتەيىك, ءىس – وبلىس پروكۋرورىنىڭ ەرەكشە باقىلاۋىندا.