بۇگىندە وبلىستاعى 304 مەكتەپتىڭ 302-ىنە, 30 كوللەدجدىڭ بارلىعىنا 4828 بەينەباقىلاۋ كامەراسى ورناتىلدى. ونىڭ 3134-ءى عيمارات ىشىنە, 1694-ءى سىرتىنا قويىلعان. بۇل تۋرالى وڭىرلىك كوممۋنيكاتسيالار قىزمەتىندە وبلىستىق پوليتسيا دەپارتامەنتى جەرگىلىكتى پوليتسيا قىزمەتىنىڭ باستىعى باۋىرجان يبراەۆ مالىمدەدى, دەپ جازادى Egemen.kz.
قالاداعى 14 مەكتەپتىڭ 420 بەينەباقىلاۋ كامەراسى جەدەل باسقارۋ ورتالىعىنا, اۋداندارداعى 56 مەكتەپتىڭ 594 كامەراسى كەزەكشى بولىمدەردەگى جۇيەگە قوسىلعان. قالعان ورتا مەكتەپتەردىڭ بەينەباقىلاۋ كامەرالارىن پوليتسيا ورگاندارىنا قوسۋ ماسەلەسى قارالۋدا.
«مەملەكەتتىك ورگاندارمەن بىرلەسىپ ءاربىر ءبىلىم بەرۋ ۇيىمدارىندا ورناتىلعان بەينەباقىلاۋ كامەرالارىنىڭ ستاندارتقا سايكەستىگى نازارعا الىنىپ, جەكە كۇزەت مەكەمەلەرىمەن كەلىسىم-شارتقا وتىرۋ ماسەلەلەرى بويىنشا جۇمىستار جۇرگىزىلۋدە. تەك پوليتسيا كۇشىمەن كامەلەتتىك جاسقا تولماعانداردىڭ جانە ولارعا قارسى جاسالاتىن قىلمىستاردى تىيۋ مۇمكىن ەمەس. سوندىقتان, بالا تاربيەسىنە مۇددەلى ورگاندارمەن بىرىگىپ بالالار مەن اتا-انالارعا تۇسىندىرمە جۇمىستارىن جۇرگىزۋ وڭ ناتيجە بەرەتىنى انىق. بەيمەزگىل ۋاقىتتا بالالارىڭىزدىڭ ويىن الاڭدارىندا, كوپقاباتتى ءۇي اۋلالارىندا, كوشەلەردە جانە باسقا دا ورىنداردا جالعىز جۇرۋىنە جول بەرمەڭىزدەر», دەدى وپد جەرگىلىكتى پوليتسيا قىزمەتىنىڭ باستىعى باۋىرجان يبراەۆ.
بيىل 25 مامىردا سوڭعى قوڭىراۋ كەشىن وتكىزۋگە رۇقسات ەتىلدى. وسىعان وراي, وقۋشىلاردىڭ قاۋىپسىزدىگىن پوليتسيا قىزمەتكەرلەرى قاتاڭ باقىلايتىن بولادى. ورتالىق الاڭ, پارك, كوشەلەرگە پاترۋلدىك قىزمەتكەرلەر رەيدكە شىعادى.