قازاقستان رەسپۋبليكاسى پرەزيدەنتىنىڭ ءباسپاسوز قىزمەتى مەملەكەت باسشىسىنىڭ 2021 جىلعى باق سالاسىنداعى سىيلىقتارى مەن گرانتتارىن, سونداي-اق العىسىن الۋعا ۇمىتكەرلەردەن ۇسىنىمدار قابىلداۋ باستالعانىن حابارلايدى.
سىيلىقتار مەن گرانتتار الۋعا ۇمىتكەرلەردى, سونداي-اق العىس جاريالاۋعا شىعارماشىلىق ۇجىمداردى باق, شىعارماشىلىق وداقتار, قوعامدىق بىرلەستىكتەر, مەملەكەتتىك ورگاندار ۇسىنا الادى.
ءاربىر باق, شىعارماشىلىق وداق, قوعامدىق بىرلەستىك, مەملەكەتتىك ورگان سىيلىقتار مەن گرانتتار الۋعا ەكى ۇمىتكەر عانا ۇسىنۋعا قۇقىلى. گرانتتار جاسى وتىز بەستەن اسپاعان جاس جۋرناليستەرگە بەرىلەدى.
گرانت يەگەرىن سىيلىق الۋ ءۇشىن گرانت تاپسىرىلعاننان كەيىن كەمىندە بەس جىلدان كەيىن ۇسىنۋعا بولادى.
سىيلىقتار, گرانتتار الۋعا ۇمىتكەرلەردىڭ جانە العىس جاريالاۋعا شىعارماشىلىق ۇجىمداردىڭ ءوزىن-ءوزى ۇسىنۋىنا جول بەرىلمەيدى.
سىيلىقتار نەمەسە گرانتتار الۋعا بۇقارالىق اقپارات قۇرالىنىڭ, شىعارماشىلىق وداقتىڭ, قوعامدىق بىرلەستىكتىڭ, مەملەكەتتىك ورگاننىڭ رەسمي بلانكىسىنە جازىلعان, ءبىرىنشى باسشى نەمەسە ونىڭ ورنىنداعى ادام قول قويعان (ا4 فورماتتاعى كولەمى 2 پاراقتان اسپايتىن) ۇسىنىم جولدانادى. وعان مىناداي قۇجاتتار قوسا ۇسىنىلادى:
- سىيلىقتار نەمەسە گرانتتار الۋعا ۇسىنىلعان ۇمىتكەردىڭ اتى, اكەسىنىڭ اتى, تەگى جانە شىعارماشىلىق بۇركەنشىك ەسىمى (ەگەر بولسا), سونداي-اق اتقاراتىن لاۋازىمى كورسەتىلگەن نەگىزگى جۇمىس ورنىنان انىقتاما;
- سىيلىقتار نەمەسە گرانتتار الۋعا ۇسىنىلعان ۇمىتكەردىڭ جەكە كۋالىگىنىڭ نەمەسە تولقۇجاتىنىڭ كوشىرمەسى;
- سىيلىقتار نەمەسە گرانتتار الۋعا ۇسىنىلعان ۇمىتكەردىڭ شىعارماشىلىق قىزمەتىنىڭ قىسقاشا سيپاتتاماسى;
- نەگىزگى جاريالانىمدارىنىڭ ءتىزىمى جانە ولاردىڭ كوشىرمەلەرى, اۋديو جانە (نەمەسە) بەينەماتەريالدار نەمەسە سونداي ماتەريالداردىڭ ينتەرنەت-سىلتەمەلەرىنىڭ ءتىزىمى.
العىس جاريالاۋعا شىعارماشىلىق وداقتىڭ, قوعامدىق بىرلەستىكتىڭ, مەملەكەتتىك ورگاننىڭ رەسمي بلانكىسىنە جازىلعان ءبىرىنشى باسشى نەمەسە ونىڭ ورنىنداعى ادام قول قويعان بۇقارالىق اقپارات قۇرالىنىڭ قىزمەتى تۋرالى (ا4 فورماتتاعى كولەمى 2 پاراقتان اسپايتىن) ۇسىنىم ۇسىنىلادى.
كونكۋرسقا ءمان-ماڭىزى جوعارى نەگىزگى جاريالانىمدار, اۋديو جانە (نەمەسە) بەينەماتەريالدار نەمەسە سونداي ماتەريالداردىڭ ينتەرنەت-سىلتەمەلەرىنىڭ ءتىزىمى ۇسىنىلادى.
قاراۋعا 2020 جىلعى 1 ماۋسىم مەن 2021 جىلعى 31 مامىر ارالىعىندا جاريالانعان جانە (نەمەسە) ەفيرگە شىققان ماتەريالدار قابىلدانادى.
سىيلىقتار, گرانتتار الۋعا جانە العىس جاريالاۋعا ۇسىنىلعان ماتەريالدار مەن قۇجاتتار قايتارىلمايدى.
كىتاپتار باق سالاسىنداعى ناگرادالار الۋعا ۇسىنىلعان ماتەريال رەتىندە قاراستىرىلمايدى. مەرزىمدى باسىلىمداردا جارىق كورگەن ماقالالار توپتاماسىن ۇسىنۋعا بولادى.
مەملەكەت باسشىسىنىڭ سىيلىقتارىن, گرانتتارىن الۋعا جانە العىسىن جاريالاۋعا ۇسىنىمداردى قوعامدىق كوميسسيانىڭ توراعاسى – قازاقستان رەسپۋبليكاسى پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى د.ءا.اباەۆتىڭ اتىنا 2021 جىلعى 31 مامىرعا دەيىن ەلەكتروندى نۇسقادا press@akorda.kz پوشتاسىنا جولداۋ قاجەت.
مەملەكەتتىك ورگانداردىڭ ۇسىنىمدارى ەلەكتروندى قۇجات اينالىمىنىڭ بىرىڭعاي جۇيەسى ارقىلى تەك ەلەكتروندى فورماتتا قابىلدانادى.
قازاقستان پرەزيدەنتىنىڭ ءباسپاسوز قىزمەتى