قازاقستاندا ەل اۋماعىنداعى كيىكتەر سانىن انىقتاۋ ءۇشىن اۋەدەن ەسەپ جۇرگىزۋ جۇمىستارى جالعاسۋدا. بۇل تۋرالى ەكولوگيا, گەولوگيا جانە تابيعي رەسۋرستار مينيسترلىگىنەن ءمالىم ەتتى, دەپ حابارلايدى Egemen.kz.
«ەستەرىڭىزگە سالا كەتەيىك, 2020 جىلى كارانتيندىك شەكتەۋلەرگە بايلانىستى اۋە ەسەبى جۇرگىزىلمەي قالعان بولاتىن.
اۋەدەن ەسەپتى «وحوتزووپروم» رمقك قىزمەتكەرلەرى, ورمان شارۋاشىلىعى جانە جانۋارلار دۇنيەسى كوميتەتىنىڭ وبلىستىق اۋماقتىق ينسپەكتسياسى جانە قازاقستانداعى بيوالۋانتۇرلىلىكتى ساقتاۋ قاۋىمداستىعىنىڭ عىلىمي ماماندارى بىرلەسىپ جۇرگىزۋدە», دەدى مينيسترلىكتەن.
ءمالىم ەتىلگەندەي, كيىك ەسەبىنە وحوتزووپروم ينسپەكتورلارىنىڭ ەكى توبى جۇمىلدىرىلعان. ولاردىڭ ءبىرىنشىسى – بەتپاقدالا پوپۋلياتسياسىنا, ەكىنشىسى – ورال جانە ءۇستىرت پوپۋلياتسيالارىنا ساناق جۇرگىزەدى. وسى ماقساتتا تىكۇشاقپەن 200-گە جۋىق ۇشۋ ساعاتىن ورىنداۋ جوسپارلانعان.
«2019 جىلى جۇرگىزىلگەن ەسەپكە الۋ جۇمىستارىنا سايكەس قازاقستانداعى كيىكتەردىڭ سانى 334 400 باستى قۇرادى.
وسى كەزەڭدە اقبوكەندەردىڭ اۋە ەسەبى باتىس قازاقستان, اقتوبە جانە ماڭعىستاۋ وبلىستارىندا (ورال جانە ءۇستىرت تارالىمى) اياقتالدى جانە بەتپاقدالا پوپۋلياتسياسىن ەسەپكە الۋ بويىنشا قاراعاندى, اقمولا وبلىستارىنىڭ اۋماقتارىندا جالعاسۋدا.
كيىكتەردىڭ اۋە ەسەبىن 2021 جىلدىڭ 5 مامىرىنا دەيىن اياقتاۋ جوسپارلانۋدا», - دەپ قوستى ۆەدومستۆودان.