ءدال قازىر ماماندار قىزىلوردا قالاسىنداعى ەپيداحۋالدى تۇراقسىز دەپ باعالاپ وتىر. بەس كۇن بۇرىن وبلىس ورتالىعى «قىزىل ايماقتا» تۇرعان وڭىرلەر قاتارىنا ەندى. سوڭعى اپتادا كۇنىنە 36-دان 44-كە دەيىن جاعداي تىركەلۋدە. وسىلايشا, سىرقاتتانۋشىلىق كورسەتكىشى الدىڭعى اپتادان 63,4 پايىزعا ۇلعايدى.
پاندەميا باستالعالى بەرى قالا بويىنشا اۋىرعاندار سانى – 3 170 ادام, وسىنىڭ 1 102-ءسى – جىل باسىنان بەرى انىقتالعاندار. قالادا تاۋلىگىنە ورتا ەسەپپەن 250-300 سىناما جۇرگىزىلەدى. سىناما قورىتىندىسىنا جاسالعان زەرتتەۋ ءساۋىر ايىندا COVID-19 ىندەتىمەن سىرقاتتانۋشىلىق كورسەتكىشى قاڭتاردان – 3,8, اقپان ايىنداعى كورسەتكىشتەن – 3,7, ال ناۋرىز ايىنداعى دەڭگەيدەن 4,9 ەسە اسقانىن كورسەتتى. جالپى, اۋىرعاندار اراسىندا ەرەسەكتەر كوپ – 81 پايىز. بالالار ۇلەسى – 19, ال جاسوسپىرىمدەر 1,9% بولىپ تۇر.
– ۆيرۋس جۇقتىرعاندار كوبەيۋىنىڭ نەگىزگى سەبەبى تۇرعىنداردىڭ كارانتيندىك شارالاردى ساقتاماۋى. قالاداعى 12 ەگۋ كابينەتىندە ۆاكتسينالاۋ جالعاسۋدا. سونداي-اق جىلجىمالى ەگۋ پۋنكتتەرى دە جۇمىس ىستەپ تۇر. الدا ءىرى ساۋدا-ويىن ورتالىقتارى مەن ساۋدا ۇيلەرىندە ەكپە ورىندارىن اشۋ جوسپاردا تۇر. قازىر بۇل باعىتتا دايىندىق جۇمىستارى جۇرگىزىلۋدە. ونداعى سانيتارلىق-ەپيدەميالىق تالاپتار دا مەديتسينالىق ۇيىمداعىداي قاتاڭ ساقتالاتىن بولادى. قالا بويىنشا 1 اقپاننان باستاپ 15 174 ادام ەگۋدىڭ ءبىرىنشى كومپونەنتىمەن, 5 002 تۇرعىن ەكىنشى كومپونەنتپەن قامتىلىپ وتىر, – دەدى قىزىلوردا قالاسىنىڭ باس مەملەكەتتىك سانيتارلىق دارىگەرى ەرلان ۇزاقباەۆ. – جىل باسىنان بەرى شەكتەۋ تالاپتارىنىڭ ساقتالۋىنا جاسالعان تەكسەرۋ بارىسىندا 62 ايىپپۇل سالىندى. 52 نىسان جوسپاردان تىس تەكسەرىلىپ, ۇيعارىم بەرىلدى.
ءدال قازىر 12 شۇعىل حابارلاما بويىنشا ءتيىستى تەكسەرۋ تاعايىندالدى. جالپى, جىل باسىنان بەرى كارانتيندىك رەجىم تالاپتارىن بۇزعاندارعا اكىمشىلىك قۇقىق بۇزۋشىلىق تۋرالى كودەكستىڭ 425-بابىنىڭ 1-بولىگىمەن 5 332 260 تەڭگە ايىپپۇل سالىنىپ وتىر.
قىزىلوردا