بالۋاندار بولگاريادا بەلدەسەدى

تاياۋ كۇندەرى توكيو

سول جەردە ءالى دە جولداماعا قول جەتكىزە الماعان ساڭلاقتار ءوزارا كۇش سىناسىپ, عالامدىق دوداعا بارۋعا كىمدەر لايىق ەكەندەرىن انىقتايدى. جەڭىسكە جەتكەندەرى جاپونياعا بارسا, جەڭىلگەندەرى جەر سيپاپ قالادى.

بيىل توكيودا الاۋى تۇتاناتىن وليمپيا ويىندارىنىڭ العاشقى جولدامالارى 2019 جىلى نۇر-سۇلتاندا وتكەن الەم چەمپيوناتىندا ساراپقا سالىنعانى بەلگىلى. ودان كەيىن ءار قۇرلىقتا ىرىكتەۋ تۋرنيرلەرىنىڭ شىمىلدىعى ءتۇرىلدى. اتاپ ايتساق, امەريكانىڭ اپايتوستەرى كوروناۆيرۋس دەرتى بەلەڭ الماي تۇرىپ, بىلتىرعى جىلدىڭ كوكتەمىندە كانادانىڭ استاناسى – وتتاۆادا ليتسەنزيالىق جارىستى ۇيىمداستىرىپ ۇلگەردى. بيىل ناۋرىز ايىنىڭ ەكىنشى جارتىسىندا ەۋروپانىڭ ورەندەرى ماجارستاننىڭ باس شاھارى – بۋداپەشتە باس قوستى. ءساۋىر ايىنىڭ باسىندا افريكانىڭ سايىپقىراندارى تۋنيستە كۇش سىناستى. ال ودان كەيىن ازيانىڭ ارلاندارى الماتىدا ايقاستى. الەمدىك دودادا 108 جولداما ءوز يەسىن تاپسا, قۇرلىقتىق باسەكەلەردىڭ ارقايسىندا 36 ليتسەنزيادان تاراتىلدى.قازىرگى كەزدە اقش قۇراماسى كۇرەستىڭ ءۇش ءتۇرى بويىنشا ەڭ كوپ جولدامانى ولجالاپ وتىر. امەريكانىڭ 15 بالۋانى توكيوعا باراتىنداردىڭ تىزىمىندە. ەكىنشى ورىندا – رەسەي. ولاردىڭ 13 سپورتشىسى ءدال سونداي قۇرمەتكە بولەندى. ءۇشىنشى ساتىداعى كۋبانىڭ 12 قابىلانى تورتجىلدىقتىڭ باستى دوداسىندا باق سىنايدى. قازاقستان, قىتاي جانە يراننىڭ دا جاعدايى جامان ەمەس. سارى قۇرلىقتا ورنالاسقان وسى ءۇش مەملەكەتتىڭ ارقايسىنان 11 بالۋان كۇن شىعىس ەلىنە اتتانادى. جاپونيا مەن ءتۋنيستىڭ – 10, الجير, بەلارۋس, مىسىر, تۇركيا, قىرعىزستان, وزبەكستاننىڭ – 8, گرۋزيا, گەرمانيا, ۋكراينا, موڭعوليانىڭ – 7, ءۇندىستاننىڭ – 6, ءازىربايجان, ماجارستان, نيگەريانىڭ – 5, ارمەنيا, بولگاريا, كانادا, پولشا, شۆەتسيانىڭ – 4, برازيليا, كولۋمبيا, سەربيانىڭ – 3, ەستونيا, ۇلىبريتانيا, وڭتۇستىك كورەيا, مەكسيكا جانە سولتۇستىك كورەيانىڭ – 2 ساڭلاعىنىڭ اسىعى الشىسىنان ءتۇستى. تاعى 24 مەملەكەت وكىلدەرىندە ءبىر-ءبىر جولدامادان بار.وزدەرىڭىز بايقاعانداي ەڭ كوپ جولدامانى يەلەنگەن كوماندالار اراسىندا قازاقستان ۇزدىكتەر ساناتىندا. ياعني ءبىز وزىق التى مەملەكەتتىڭ قاتارىندامىز. ارينە, بۇل – وتە جاقسى كورسەتكىش. بىراق كوڭىلگە كىربىڭ تۇسىرەتىن جايتتار دا جوق ەمەس. ماسەلەن, گرەك-ريم كۇرەسىنەن قورجىنىمىزدا ازىرگە بار-جوعى ءۇش جولداما عانا بار. ول ليتسەنزيالاردى مەيرامبەك ايناعۇلوۆ (60 كيلو), اسحات دىلمۇحامەدوۆ (77 كيلو) جانە نۇرسۇلتان تۇرسىنوۆ (87 كيلو) يەلەندى. بۇل جاعداي سپورت سالاسىنىڭ تىزگىنىن ۇستاعان ازماتتارعا وي سالۋعا ءتيىس. ويتكەنى, كۇرەستىڭ بۇل تۇرىندە ءبىزدىڭ ەلدىڭ جەڭىسپەن ورىلگەن تاماشا ءداستۇرى بار. وليمپيا ويىندارى مەن الەم چەمپيوناتىندا جەڭىس تۇعىرىنا كوتەرىلگەن اناتولي كولەسوۆ, ۆلاديمير باكۋلين, ۆالەري رەزانتسەۆ, اناتولي نازارەنكو, اناتولي بىكوۆ, جاقسىلىق ۇشكەمپىروۆ, ءشامىل سەرىكوۆ, داۋلەت تۇرلىحانوۆ, يۋري مەلنيچەنكو, باقتيار بايسەيىتوۆ, مكحيتار مانۋكيان جانە تاعى باسقا كوپتەگەن داڭقتى جەرلەستەرىمىزدىڭ سپورتتىق ارەنالارداعى ەرلىگىن كوزى قاراقتى كورەرمەندەر كۇنى بۇگىنگە دەيىن اۋىزدارىنان سۋلارى قۇرىپ اڭگىمەلەۋدە. مىنە, وسىنداي ءداستۇرى بار مەملەكەتتىڭ عالامدىق دودادا ءۇش-اق بالۋانى بەلدەسكەنى ىڭعايسىز جاعداي. سول ولقىلىقتىڭ ورنى سوفيادا تولادى دەپ ۇمىتتەنەمىز.

ايەلدەر كۇرەسىن سەرىك ەتكەن بۇرىمدىلدارىمىز دا ءۇش جولدامانى قاناعات تۇتىپ وتىر. ونى ۆالەنتينا يسلاموۆا (50 كيلو), تاتيانا احمەتوۆ (53 كيلو) جانە ەلميرا سىزدىقوۆا (76 كيلو) يەلەندى. بۇل جاعداي دا كوڭىلىمىزگە سەلكەۋ تۇسىرەدى. كۇرەستىڭ بۇل ءتۇرى دە قازاقستاندا قازىر جاقسى قارقىنمەن دامىپ كەلەدى. 2016 جىلى ريو-دە-جانەيرودا الاۋى تۇتانعان وليمپيادادا ءبىزدىڭ قىزداردىڭ ءۇش جۇلدە الۋى جوعارىدا ايتىلعان ءسوزىمىزدىڭ ايقىن دالەلى. ونىڭ الدىنداعى بەيجىڭ مەن لوندونداعى دودالاردان دا قۇر قول قايتقان جوق ەدىك. بولگاريادا ارۋلارىمىز بارىن سالىپ, قورجىنىمىزدى كەمىندە ەكى ليتسەنزيامەن تولىقتىرادى دەپ ۇمىتتەنەمىز.ەركىن كۇرەس شەبەرلەرىنىڭ اياقالىسى وتە جاقسى. 2019 جىلى نۇر-سۇلتاندا ولار ءتورت جولداما السا, بيىل الماتىدا تاعى ءبىر ليتسەنزياعا قول جەتكىزدى. ونىڭ يەگەرلەرى – نۇريسلام ساناەۆ (57 كيلو), داۋلەت نيازبەكوۆ (65 كيلو), دانيار قايسانوۆ (74 كيلو), الىشەر ەرعالي (97 كيلو) جانە يۋسۋپ باتىرمۇرزاەۆ (125 كيلو). تەك قانا 86 كيلو سالماقتا بەلدەسەتىن جىگىتتەرىمىز كوزدەگەن ماقساتىنا قول جەتكىزە الماي ءجۇر. ەگەر بولگاريادا ءبىر بالۋانىمىزدىڭ باعى جانسا, وندا توكيودا تولىق قۇراممەن ونەر كورسەتەمىز. سول جولداما ءۇشىن كىمنىڭ ايقاساتىنىن الداعى كۇندەرى ۇلتتىق قۇرامانىڭ باس باپكەرى اسەت سەرىكباەۆ جاريالايتىن بولادى.