ۇكىمەت پەن وبلىس اكىمدىكتەرى 2025 جىلعا دەيىن جەرگىلىكتى جەرلەردەگى جولداردىڭ 95 پايىزىن جوندەپ, رەتكە كەلتىرۋگە ءتيىس. بۇل تۋرالى پرەزيدەنت قاسىم-جومارت توقاەۆ اتىراۋ وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەستە ايتتى, دەپ حابارلايدى Egemen.kz.
مەملەكەت باسشىسىنىڭ ايتۋىنشا, 2019 جىلدان باستاپ بۇكىل ەلىمىز بويىنشا وسى ماقساتقا جىل سايىن رەسپۋبليكالىق بيۋدجەتتەن 50 ميلليارد تەڭگە بولىنۋدە. جول قۇرىلىسىنا جانە ونى جوندەۋگە جەرگىلىكتى بيۋدجەتتەن دە قارجى جۇمسالادى. ناتيجە جوق دەپ ايتۋعا بولادى. جوندەلگەن جولدىڭ كوبى ءبىر جىل وتپەي جارامسىز بولىپ قالادى. مۇنى اشىق ايتۋ كەرەك.
– مەردىگەرلەر وزدەرىنىڭ كەپىلدى مىندەتتەمەلەرىن قالاي ورىنداپ جاتىر؟ جالپى, وسى جۇمىسقا ۇزاق جىلدار بويى تەك بەلگىلى ءبىر مەردىگەرلەر عانا قاتىسادى. بۇل سۇراققا ۇكىمەت جاۋاپ بەرۋى كەرەك. مەملەكەتتىڭ تاپسىرىسىن ورىندايمىن دەپ كەلگەن كەز كەلگەن مەردىگەردىڭ باستى مىندەتى – ساپالى جۇمىس. سوندىقتان, ولارعا قويىلاتىن تالاپ تا قاتاڭ بولۋعا ءتيىس, – دەپ اتاپ ءوتتى قاسىم-جومارت توقاەۆ.