قىزىلوردا وبلىسىندا كوپتەگەن ءىس-شارا ونلاينعا قايتا كوشىرىلىپ جاتىر. وڭىرلىك كوممۋنيكاتسيالار قىزمەتىندە وتەتىن بريفينگتەر دە وسى فورماتقا اۋىستىرىلدى. اپتا باسىنداعى بريفينگتە وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆ ايماقتا ەپيدەميالىق احۋالدىڭ الدىن الۋ باعىتىنداعى جۇمىستاردى باياندادى. اقپان ايىنان بەرى وبلىستا 20 مىڭعا جۋىق تۇرعىن ەكپە العان. بىلتىردان بەرى 4 798 ادام كوروناۆيرۋس ىندەتىن جۇقتىرىپتى. 18 ساۋىردە ولاردىڭ قاتارىنا تاعى 35 تۇرعىن قوسىلدى.
– ينفەكتسيالىق جانە پروۆيزورلىق ستاتسيونارلاردا 3 200 توسەكتىك ورىن دايىن. ونىڭ 500-دەن استامى ورتالىقتاندىرىلعان وتتەگىمەن قامتىلعان. ايماقتاعى مەديتسينالىق ۇيىمداردا 686 وتتەگى كونتسەنتراتورى, 251 وكپەنى جاساندى جەلدەتۋ, 8 كومپيۋتەرلىك توموگراف جانە 66 رەنتگەن اپپاراتى بار, – دەيدى باسقارما باسشىسى.
مەديتسينالىق مەكەمەلەر مەن ءدارىحانالار قورعانىش كيىمدەرىمەن قامتاماسىز ەتىلدى. ءدارى-دارمەكتىڭ 2 ايعا جەتەتىن قورى جاساقتالىپ تۇر. مەديتسينا قىزمەتكەرلەرىنىڭ ىندەتتى جۇقتىرۋ كورسەتكىشى ازايىپتى. باسقارما باسشىسى تاۋەكەل توبىنداعىلاردىڭ ەرەكشە باقىلاۋدا تۇرعانىن دا ايتىپ ءوتتى. وسى كۇنى 138 دارىگەرلىك موبيلدىك توپ ۇيدەن ەم جاساۋدا. ايماقتا 6 وتتەگى ستانساسى بار. 200 ورىندىق مودۋلدىك جۇقپالى اۋرۋلار اۋرۋحاناسىنىڭ قۇرىلىسى اياقتالدى, الداعى ايدا پايدالانۋعا بەرۋ جوسپارلانۋدا. ۆاكتسينالاۋ وبلىس ورتالىعىنداعى 5 ەمحانادا, وبلىستىق كەڭەس بەرۋ دياگنوستيكالىق ورتالىعىندا, «ينتەرتيچ» كلينيكاسىندا, بارلىق اۋدان مەن بايقوڭىر قالاسىندا جۇرگىزىلۋدە. ەكپە تالاپقا ساي, تەمپەراتۋرالىق رەجىمدى قاداعالايتىن ارنايى ماشينامەن حالىق سانىنا قاراي ەگۋ ورىندارىنا جەتكىزىلىپ تۇر.
ونلاين بريفينگكە بىلتىر ىندەت ءورشىپ تۇرعان شاقتا «سەيحۋن» پروۆيزورلىق ستاتسيونارىندا جۇمىس ىستەگەن دارىگەرلەردىڭ ءبىرى نۇرلان نۇرپەيىسوۆ تە قاتىستى. كەنەتتەن جابىسقان كەسەلدەن ناۋقاستاردىڭ قينالعان ءساتىن كورگەن تاجىريبەلى مامان ىندەتتىڭ ەتەك جايۋىنا ءوزىمىزدىڭ ساقتىق شارالارىنا سالعىرت قاراۋىمىز سەبەپ بولىپ وتىرعانىن ايتادى.
– مەن ءوز ەركىممەن ەكپە سالدىرعان مەديتسينا سالاسى قىزمەتكەرلەرىنىڭ ءبىرىمىن. ۆاكتسينادان كەيىن ءوزىمدى جاقسى سەزىندىم. قازىر دەنساۋلىعىمدا ەشقانداي كىنارات جوق. ەڭ باستىسى, دەرتكە شالدىعىپ قالۋ قورقىنىشىنان ارىلدىم. ءوزىم جانە جاقىندارىم ءۇشىن الاڭىم ازايدى. دەگەنمەن قوسىمشا ساقتىق شارالارىن ساقتاپ ءجۇرمىن, – دەيدى دارىگەر.
بەتپەردە تاعىپ, اراقاشىقتىقتى ساقتاۋدىڭ ماڭىزدىلىعى از ايتىلىپ جاتقان جوق. وسىعان شىنداپ قۇلاق اساتىن كەز كەلدى. كۇندىز ماماننىڭ كەڭەسىن باس شۇلعي تىڭداپ, كەشكە جاسىرىن توي-تومالاقتىڭ تورىنەن تابىلاتىندار كوپ. ءوزىمىزدىڭ وسى ادەتىمىزدى جەڭسەك, كەسەلدىڭ دە بەتى قايتار ەدى.
قىزىلوردا وبلىسى