ەلوردانىڭ ءموبيلدى توپتارى شەكتەۋ شارالارىن بۇزۋعا جول بەرمەۋ جانە جولىن كەسۋ بويىنشا قوعامدىق تاماقتانۋ ورىندارى مەن كارانتيندىك رەجيمدى ءالى كۇنگە دەيىن ەلەمەيتىن باسقا دا كاسىپكەرلىك وبەكتىلەرىن انىقتاۋ جالعاسۋدا. قالالىق بارلاردىڭ بىرىندە بىردەن بىرنەشە ورەسكەل بۇزۋشىلىق انىقتالدى, دەپ حابارلايدى ەلوردا اكىمدىگىنىڭ رەسمي سايتى.
ەسىل اۋدانىندا ورنالاسقان Chechil Pub بارىندا 17 ناۋرىزدان 18-ىنە قاراعان ءتۇنى ءبىر ۋاقىتتا 80 ادام بولعان, بۇل كارانتين رەجيمىن بۇزۋ بولىپ سانالادى. سونىمەن قاتار, ءبىر ۇستەلگە 9-10 ادام وتىرىپ, كەلۋشىلەردىڭ الەۋمەتتىك قاشىقتىقتى ساقتاماعانى بەلگىلى بولدى.
الماتى اۋدانىندا ءموبيلدى توپ Elite cyber sport كومپيۋتەرلىك كلۋبىن انىقتادى.كەشە تۇندە سارىارقا اۋدانىندا ەكى بۇزۋشىلىق تىركەلدى: "زاماندوستار" كافەسىنىڭ قىزمەتكەرلەرى جۇمىس ورنىندا بەتپەردەسىز جۇرسە, "بينكوۆسكي" بارى ساعات 00.00-دەن كەيىن جۇمىس ىستەدى.كارانتيندىك شارالاردىڭ بۇزىلعانى تۋرالى ماتەريالدار اكىمشىلىك جاۋاپكەرشىلىككە تارتىلۋ ءۇشىن ءتيىستى ورگاندارعا جىبەرىلدى.
ەستەرىڭىزگە سالا كەتەيىك, 10 ناۋرىزدان باستاپ نۇر-سۇلتان ەپيدەميولوگيالىق احۋال بويىنشا "قىزىل ايماققا" ەندى. كارانتيندىك شەكتەۋلەردى بۇزۋشىلىقتاردى انىقتاۋ جانە بولدىرماۋ بويىنشا مونيتورينگتىك توپتاردىڭ جۇمىسى كۇشەيتىلگەن رەجيمگە اۋىستىرىلدى.
جاقىندا ەلوردانىڭ باس سانيتارلىق دارىگەرى سارحات بەيسەنوۆا نۇر-سۇلتاندا كارانتيندىك شەكتەۋلەردى قاتايتۋ تۋرالى قاۋلىعا قول قويدى. وعان سايكەس جەكسەنبى كۇندەرى بىرقاتار كاسىپكەرلىك نىساندارىنىڭ جۇمىسىنا تىيىم سالىنادى. قۇجات بۇگىن, 18 ناۋرىزدا كۇشىنە ەندى.