ورتالىق كوممۋنيكاتسيالار قىزمەتىندە ەلدەگى ەپيدەميالىق جاعداي بويىنشا ءباسپاسوز ءماسليحاتى ءوتتى. ءىس-شاراعا دەنساۋلىق ساقتاۋ ۆيتسە-ءمينيسترى – باس مەملەكەتتىك سانيتارلىق دارىگەر ەرلان قياسوۆ, دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتى توراعاسىنىڭ ورىنباسارى نۇرلىبەك اسىلبەكوۆ, «سق-فارماتسيا» جشس باسقارۋشى ديرەكتورى, باسقارما مۇشەسى گۇلنارا وماروۆا قاتىستى.
سوڭعى اپتادا كوروناۆيرۋسقا شالدىققان ناۋقاستار سانى 12 پايىزعا ارتتى. بۇل تۋرالى دەنساۋلىق ساقتاۋ ۆيتسە-ءمينيسترى – باس مەملەكەتتىك سانيتار دارىگەر ەرلان قياسوۆ ايتتى.
– 17 ناۋرىزداعى جاعداي بويىنشا قازاقستاندا سovid-19-عا وڭ ناتيجەمەن 226 767 ناۋقاس, ال كۆي-ءدىڭ تەرىس ناتيجەسىمەن 49 896 جاعداي تىركەلدى. كۆي وڭنان 208 074 جانە كۆي تەرىستەن 45 428 ناۋقاس ساۋىعىپ شىقتى. اقپاندا قاڭتارمەن سالىستىرعاندا ناۋقاستار سانى 30 پايىزعا تومەندەگەنى بايقالدى. سونىمەن قاتار سوڭعى 5 كۇننىڭ ىشىندە تاۋلىگىنە 1 مىڭنان استام جاعداي انىقتالدى. سوڭعى اپتادا الدىڭعى اپتامەن سالىستىرعاندا ناۋقاستار سانى 12 پايىزعا ءوسۋى بايقالادى, – دەدى ە.قياسوۆ.
ونىڭ سوزىنشە, قازاقستان تاۋەكەلى تومەن نەمەسە «جاسىل ايماقتان» تاۋەكەلى ورتاشا ايماققا, ياعني «سارى ايماققا» اۋىستىرىلدى. «قىزىل ايماقتا» 3 ءوڭىر – نۇر-سۇلتان مەن الماتى قالالارى جانە باتىس قازاقستان وبلىسى تۇر. «سارى ايماقتا» الماتى, اقمولا, اتىراۋ, قاراعاندى وبلىستارى ورنالاسقان. قالعان وبلىستار «جاسىل ايماقتا».
سونىمەن قاتار ۆيتسە-مينيستر قازاقستان اۋماعىندا كوروناۆيرۋستىڭ جاڭا شتامدارى انىقتالماعانىن مالىمدەدى.
– قازاقستاندا كوروناۆيرۋستىڭ تسيركۋلياتسياسى بويىنشا ەپيدەميالىق مونيتورينگ جۇرگىزىلەدى. قىركۇيەكتەن باستاپ قاڭتارعا دەيىنگى ارالىقتا جۇرگىزىلگەن گەنومدىق زەرتتەۋلەردىڭ قورىتىندىسىندا ەل اۋماعىندا كوروناۆيرۋستىڭ جاڭا شتامى, ناقتىراق ايتقاندا بريتاندىق, وڭتۇستىك-افريكالىق, برازيليالىق شتامدار انىقتالعان جوق. ناۋرىز ايىنىڭ سوڭىندا كەزەكتى گەنومدىق زەرتتەۋلەر ناتيجەسى الىنادى, – دەدى باس سانيتار دارىگەر.
وكىنىشتىسى, مەكتەپ وقۋشىلارى اراسىندا دا كوروناۆيرۋس جاعدايلارىنىڭ تىركەلۋى جالعاسىپ جاتىر. وقۋ جىلى باستالعاننان بەرى 10 مىڭنان استام مەكتەپ وقۋشىسى كوروناۆيرۋسپەن اۋىرعان. ونىڭ ىشىندە 3 324 بالا – وفلاين رەجىمدە ءبىلىم العاندار. قازىرگى ۋاقىتتا كارانتيندىك ءىس-شارالار وڭىرلەردەگى جانە جەكەلەگەن مەكتەپتەگى كوروناۆيرۋسقا شالدىعۋ جاعدايلارىن ەسكەرە وتىرىپ تەڭگەرىمدى تۇردە قولدانىلادى.
– ساۋىردە كوروناۆيرۋسقا قارسى ۆاكتسينا الاتىن كونتينگەنت كەڭەيتىلەدى. رەسپۋبليكادا كوروناۆيرۋس ينفەكتسياسىنا قاتىستى ۆاكتسينالاۋ جالعاسىپ جاتىر. بۇگىندە ءبىرىنشى كومپونەنتپەن 83 839 ادامعا ەكپە جاسالدى. 22 اقپاننان باستاپ ەكىنشى كومپونەنتپەن ۆاكتسينالاۋ باستالادى. بۇگىندە 19 312 ادام ەكپە الدى. قولايسىز جاعدايلار تىركەلگەن جوق. ۆاكتسينالاۋ ەلىمىزدىڭ بارلىق وڭىرىندە ءجۇرىپ جاتىر. 628 ەكپە پۋنكتى قۇرىلعان. ونىڭ 451-ءى جۇمىس ىستەپ تۇر. بارلىعى دا ۆاكتسينانى سالقىن جەردە ۇستاۋعا قاجەتتى قۇرال-جابدىقپەن قامتاماسىز ەتىلگەن, – دەدى ە.قياسوۆ.
ناۋرىز ايىنىڭ سوڭىنا دەيىن ەلىمىزدە سپۋتنيك V ۆاكتسيناسىنىڭ 150 مىڭ دوزاسى جەتكىزىلەدى. بۇل ەلىمىزدىڭ بارلىق وڭىرىنە 1 ساۋىرگە دەيىن ءبولىنىپ بەرىلەدى. وسىعان بايلانىستى ساۋىردە كوروناۆيرۋسقا قارسى يممۋنداۋعا جاتاتىن كونتينگەنتتىڭ كەڭەيەتىندىگى كۇتىلىپ وتىر.
سونداي-اق باس مەملەكەتتىك سانيتار دارىگەر ەرلان قياسوۆ كوروناۆيرۋستىڭ شەتەلدەن تاسىمالدانۋ قاۋپى ءالى دە بارىن العا تارتتى. مەملەكەتتىك شەكارادا 14 ەلمەن اۋە قاتىناسى قايتا جاندانىپ, رەيستەر سانى اپتاسىنا 95-كە دەيىن ۇلعايىپ وتىر. جولاۋشىلاردىڭ باسىم بولىگى نۇر-سۇلتان مەن الماتى قالاسىنا كەلەدى. ءالى دە بولسا شەتەلدەن كوروناۆيرۋستىڭ تاسىمالدانۋ قاۋپى ساقتالۋدا. 2020 جىلدىڭ 6 قازانىنان بەرى حالىقارالىق اۋە رەيستەرىمەن 322 مىڭنان استام جولاۋشى ۇشىپ كەلدى. ولاردىڭ ىشىندە 44 805 ادام نەمەسە جولاۋشىلاردىڭ 14 پايىزى تەست تاپسىردى. ونىڭ ىشىندە 239 ادامدا كوروناۆيرۋس انىقتالدى. ال مەملەكەتتىك شەكاراداعى اۆتوموبيل وتكىزۋ بەكەتتەرى ارقىلى قازاقستانعا 835 مىڭنان استام ادام كەلدى. ولاردىڭ 20 پايىزى تەست تاپسىرىپ, قورىتىندىسىندا 809 ادامدا وڭ ناتيجە انىقتالىپ وتىر.
ءساۋىر ايىنىڭ سوڭىندا «QazQovid-In» ۆاكتسيناسىنىڭ العاشقى ونەركاسىپتىك پارتياسى شىعارىلادى. بۇل تۋرالى دەنساۋلىق ساقتاۋ ۆيتسە-مينيسترلىگى مەديتسينالىق جانە فارماتسەۆتيكالىق باقىلاۋ كوميتەتى توراعاسىنىڭ ورىنباسارى نۇرلىبەك اسىلبەكوۆ اتاپ ءوتتى.
– وزدەرىڭىز بىلەتىندەي, ۆاكتسينانى ازىرلەۋمەن بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى اينالىسادى. ول ءبىلىم جانە عىلىم مينيسترلىگىنىڭ قۇرىلىمىنا كىرەدى. ولاردىڭ مالىمەتتەرىنە سايكەس بۇگىندە بارلىعى دا جوسپارعا ساي جۇرگىزىلىپ جاتىر. كلينيكالىق سىناقتىڭ ءبىرىنشى جانە ەكىنشى ساتىسى اياقتالعانىن بىلەمىز. ءبىرىنشى ساتىسى 2020 جىلدىڭ ناۋرىزىندا, ەكىنشىسى ساۋىردە اياقتالدى. وتكەن جىلدىڭ جەلتوقسان ايىنىڭ سوڭىندا ءۇشىنشى ساتىسى باستالدى. سوندىقتان ءبارى رەت-رەتىمەن كەلە جاتىر. ءساۋىر ايىنىڭ سوڭىندا ۆاكتسينا دايىن بولادى دەپ كۇتىپ وتىرمىز. ءبىرىنشى كولەمى 50 مىڭ دوزاعا دەيىن. ءساۋىردىڭ سوڭىندا العاشقى ونەركاسىپتىك پارتياسىنىڭ شىعارىلاتىندىعى كۇتىلەدى, – دەدى ول.
«سارى جانە جاسىل ايماقتاردا» ورنالاسقان وڭىرلەردە كارانتين رەجىمى بارىنشا جەڭىلدەتىلگەن. سونىمەن قاتار مونيتورينگتىك توپتاردىڭ جۇمىسى جالعاسۋدا. ماسەلەن, اقپاندا قاڭتارمەن سالىستىرعاندا رەيد سانى 1,3 ەسەگە (15 450-دەن 19 923-كە دەيىن) ارتتى, شەكتەۋ شارالارىن بۇزعاندار 3,6% قۇرادى. كەلۋشىلەردىڭ كوپتىگىنە (تۇنگى كلۋب, مەيرامحانا مەن كومپيۋتەرلىك زالدار) بايلانىستى وبەكتىلەر ءالى دە زاڭسىزدىققا بارۋدا. 2021 جىلعى اقپاندا سانيتارلىق-پروفيلاكتيكالىق جانە شەكتەۋ شارالارىنىڭ تالاپتارىن بۇزعانى ءۇشىن جەكە تۇلعالارعا قاتىستى اكىمشىلىك ءىس 1,7 ەسە (726-دان 1 282 ادامعا دەيىن) وسكەن.