ىندەتتىڭ الدىن الۋ شارالارى اياسىندا بىلتىر بيۋدجەت پەن دەمەۋشىلەر ەسەبىنەن قارماقشىداعى مەديتسينا مەكەمەلەرىنە 6 اۆتوكولىك الىندى. اقجار اۋىلدىق دارىگەرلىك ەمحاناسى مەن شيپاگەر دارىگەرلىك ەمحاناسىنا ءبىر-ءبىر اۆتوكولىكتەن, ورتالىق ەمحاناعا 1 جىلجىمالى مەديتسينالىق كەشەن جانە 3 اۆتوكولىك تابىستالدى.
– قازىر ەمحانالاردى ءتۇرلى تەحنيكا, قاجەتتى قۇرالدارمەن جابدىقتاۋ جالعاسۋدا. بۇل تۇستا كاسىپكەرلەر دە كومەگىن اياپ جاتقان جوق. ماسەلەن, وتكەن جىلى اۋدان كاسىپكەرلەرى مەن سىرتتا جۇرگەن ازاماتتارىمىز دەمەۋشىلىك جاساپ, قۇنى 54 ملن 223 مىڭ تەڭگە كولەمىندە قارجىلاي جانە زاتتاي كومەك جاسادى. ونىڭ ىشىندە ءدارى-دارمەك, كەرەكتى قۇرال-جابدىقتار, وتتەگى باللوندارى مەن كونتسەنتراتورلار, رەنتگەن مەن يۆل اپپاراتتارى الىندى. كوروناۆيرۋس ينفەكتسياسىن تارالۋىنا جول بەرمەۋ ماقساتىندا ساقتىق شاراسىنا اسا ءمان بەرۋدەمىز, – دەدى اۋدان اكىمى مۇسا قالداربەكوۆ.
قازىر اۋداندا 4 رەنتگەن اپپاراتى جۇمىس ىستەپ تۇر. ونىڭ ەكەۋى اۋداندىق اۋرۋحانادا, ەكەۋى تورەتام اۋىلدىق اۋرۋحاناسىندا. ايتا كەتەيىك, بىلتىر اۋدانعا دەمەۋشىلەر ەسەبىنەن 12 وكپەنى جاساندى جەلدەتۋ اپپاراتى, 46 وتتەگى كونتسەنتراتورى الىندى.