سىرداريا وزەنىندە مۇز جارۋ جۇمىستارىن جۇرگىزۋ ءۇشىن ارنايى مەكەمەمەن 10 ملن تەڭگەگە كەلىسىم شارت جاسالدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق جۇمىلدىرۋ دايىندىعى باسقارماسىنىڭ توتەنشە جاعدايلاردىڭ الدىن الۋ جانە جويۋ ءبولىمىنىڭ باسشىسى اعايشا سماتوۆا مالىمدەدى.
«بۇگىندە وبلىس بويىنشا سىرداريا وزەنىنىڭ بويىندا 56 قاۋىپتى ۋچاسكە بار. ول جەرلەرگە قۇرامىندا 402 ارنايى تەحنيكا, 1178 ادام قامتىلعان 130 مەكەمە بەكىتىلدى. كۇن سايىن قالا مەن اۋدان بويىنشا مونيتورينگ جۇمىستارىن جۇرگىزىپ وتىرمىز. سۋ تاسقىنى بولا قالعان جاعدايدا الدىن الۋعا قاجەتتى زاتتار قورى دايىن», دەدى ا.قوجانتايقىزى.
قازىر شاردارا سۋ قويماسىنان سىرداريا وزەنىنە ءتۇسىپ جاتقان سۋ كولەمى ازايىپ, نەبارى 100 تەكشە مەتردى قۇراپ وتىر. ال وزەندەگى مۇز قالىڭدىعى ورتاشا 5-15 سم. سولتۇستىك اۋدانداردا 20-55 سم.
«قازسۋشار» رمك وبلىستىق فيليالى ديرەكتورىنىڭ ورىنباسارى جورابەك ەرنازاروۆ قازىر مۇز سىرداريا اۋدانى كەركەلمەس ۋچاسكەسىنەن تومەنگى اۋماقتا تۇرعانىن ايتادى. كۇن قاباعى سالقىن بولعاندىقتان مۇزدىڭ جىلجۋى تەجەلىپ تۇر. قالا توڭىرەگىنە ناۋرىز ايىنىڭ 20-25 ارالىعىندا كەلەدى دەپ بولجانىپ وتىر.
وبلىستىق تجد ماماندارى داريا بويىنداعى قاۋىپتى ۋچاسكەلەرگە تىكۇشاقپەن جانە اۆتوكولىكتەرمەن باقىلاۋ جۇرگىزىپ وتىر. ساقتىق شارالارىنا قۇرامىندا 361 تەحنيكا, 75 موتوپومپا بار ازاماتتىق قورعاۋ قىزمەتتەرىنىڭ كۇشتەرى مەن قۇرالدارى دايىن تۇر. بۇدان بولەك, وزەن بويىندا ورنالاسقان شارۋا قوجالىقتارى مەن تۇرعىندارعا قاۋىپسىزدىك شارالارى تۋرالى ءتۇسىندىرۋ جۇمىستارىن ۇنەمى جۇرگىزىلىپ كەلەدى.