وسى جىلدىڭ 11 ناۋرىز كۇنى ساعات 11.30 شاماسىندا ۇيالى تەلەفوننان ارال اۋداندىق №3 ءورت ءسوندىرۋ بولىمىنە قوڭىراۋ شالىنىپ, «عيماراتتا بومبا بار» دەگەن حابارلاما تۇسكەن. قوڭىراۋ شالۋشىنىڭ ۇيالى بايلانىس ءنومىرى انىقتالعان. قازىر اتالعان دەرەك بويىنشا ءىس قوزعالىپ, تەكسەرۋ جۇمىستارى جۇرگىزىلۋدە, دەپ حابارلايدى Egemen.kz.
– وقيعا ورىن الا سالىسىمەن تەرروريزمگە قارسى ءىس-قيمىل سالاسى بويىنشا جەدەل ىزدەستىرۋ شارالارى جۇرگىزىلدى. ناتيجەسىندە «جالعان تەرروريزم» تۋرالى حابار ءتۇسىرۋشى ارال قالاسىنىڭ تۇرعىنى, 2012 جىلى تۋعان, 3-ءشى سىنىپ وقۋشىسى ەكەنى انىقتالدى. جالپى مۇنداي قىلمىستار قر قىلمىستىق كودەكسىنىڭ 273-بابىندا قاراستىرىلعان. ياعني جالعان اقپارات تاراتقان ادام 6 جىلعا دەيىن باس بوستاندىعىنان ايىرىلىپ جانە تەكسەرىس جۇمىستارىنا تارتىلعان مەملەكەتتىك ورگانداردىڭ ماتەريالدىق شىعىنىن وتەۋى مۇمكىن, – دەدى وبلىستىق پوليتسيا دەپارتامەنتىنىڭ ەكسترەميزمگە قارسى ءىس-قيمىل باسقارماسىنىڭ ورىنباسارى قۋانىش ورازوۆ.
– جالپى «جالعان تەرروريزم» تۋرالى حابارلاما تاراتۋ قىلمىستىڭ اۋىر تۇرىنە جاتادى. سونداي-اق, زاڭعا سايكەس, كامەلەتكە تولماعانداردىڭ جاساعان ارەكەتى ءۇشىن ونىڭ اتا-اناسى جاۋاپكەرشىلىككە تارتىلادى. بىرەۋلەرگە مۇنداي ارەكەتتەر بالانىڭ ويىنى, ەش زيانى جوق بولىپ كورىنۋى مۇمكىن. بىراق تۇسكەن اقپاراتتى ويىن دەپ ەسەپتەپ, ءتيىستى شارالار اتقارىلماي قالسا, ونىڭ سوڭى ادام شىعىنى, باسقا دا ماتەريالدىق زالالدارعا اكەلىپ سوعۋى مۇمكىن. ءارى جالعان اقپارات تاراتۋشىنى تابۋ ءۇشىن دە قۇزىرلى ورگاندار بەلگىلى ءبىر ماتەريالدىق-تەحنيكالىق, قاراجاتتى جانە جۇمىس ۋاقىتىن شىعىنداۋعا ءماجبۇر بولادى, – دەدى وبلىستىق جۇمىلدىرۋ دايىندىعى باسقارماسىنىڭ باسشىسى مەدەت ۋساين.
ايتا كەتەيىك, وبلىستا مۇنداي جالعان اقپارات بەرۋ سوڭعى رەت ءۇش جىل بۇرىن تىركەلگەن.