كاسىپكەرلەر پالاتاسى قىزىلوردادا ءتۋريزمدى دامىتۋعا قاتىستى ۇسىنىس بەردى

پالاتا باسشىسى ۇكىمەتتىڭ 2019 جىلى بەكىتكەن ەلىمىزدە ءتۋريزمدى دامىتۋعا ارنالعان مەملەكەتتىك باعدارلامادا 2025 جىلعا دەيىن جالپى ىشكى ونىمدەگى ءتۋريزمنىڭ ۇلەسىن 8 پايىزدان كەم قىلماۋدى قامتاماسىز ەتۋ جونىندە تاپسىرما بار ەكەنىن ايتا كەلە, وڭىردەگى جاعدايعا توقتالدى.

ء«بىزدىڭ ءوڭىرىمىز گەوگرافيالىق جاعدايى, سونداي-اق كليماتى دا قولايلى, مادەني-تاريحي مۇرا نىساندارىنا باي, ءتۋريزمدى دامىتۋ ءۇشىن ۇلكەن الەۋەتكە يە ايماق. رەسپۋبليكالىق تۋريستىك كارتاعا وبلىستىڭ 3 تۋريستىك نىسانى ەنگىزىلگەن. ولار: قامىستىباس دەمالىس ايماعى, جاڭاقورعان شيپاجايى جانە بايقوڭىر تۋريستىك ايماعى. وتكەن جىلدان باستالعان پاندەميا بۇل سالانى دا اينالىپ وتپەدى. بۇل جاعدايدا تۋريستىك فيرمالار عانا ەمەس, قوناق ءۇي, مەيرامحانا, جول بويى كەشەندەرى مەن وزگە دە سالاعا قىزمەت كورسەتەتىن كاسىپكەرلىك سۋبەكتىلەرى ايتارلىقتاي زارداپ شەكتى, ءالى دە وڭالا الماي وتىر», - دەيدى پالاتا ديرەكتورى.

كاسىپكەرلەر پالاتاسىنىڭ سالا كاسىپكەرلەرى اراسىندا جۇرگىزگەن ساۋالناماسىنىڭ ناتيجەسى بىرقاتار ماسەلەلەردى انىقتاۋعا مۇمكىندىك بەردى. تۋريزم سالاسىنداعى بيزنەس وكىلدەرى نەسيەلەردى تولەۋگە قاراجاتتىڭ جەتىسپەۋشىلىگىن, قىزمەتكەرلەرىنە جالاقى تولەۋ پروبلەمالارىن, شتاتتاردىڭ قىسقارۋىن, سونداي-اق كوممۋنالدىق تولەمدەردى تولەۋدى نەگىزگى ماسەلە رەتىندە كورسەتىپ وتىر.

كاسىپكەرلەر پالاتاسىنىڭ ديرەكتورى وزگە وڭىرلەردەگى جاعدايدى سارالاي وتىرىپ, كورشى شىمكەنت قالاسىندا وتكەن جىلى ءتۋريزمدى دامىتۋعا 125,7 ملن, الماتى قالاسىندا 51,3 ملن, ال الماتى وبلىسىندا 29,4 ملن تەڭگە بولىنگەندىگىن جەتكىزدى. وسى قارجىلار اياسىنداعى ساتىپ الۋلار تۋريزم باسقارمالارى ارقىلى جۇزەگە اسىرىلعان. قاراجات اقپاراتتىق-يميدجدىك قولداۋ, بەينەروليكتەر مەن جارنامالىق روليكتەر, كادەسىيلار, اتريبۋتتار, پوليگرافيا ونىمدەرىن شىعارۋ, جارناما قۇرىلىمدارىن جاساۋ, اقپاراتتىق كيوسك ساتىپ الۋ, ەكسكۋرسيالىق قىزمەتتەردى ۇيىمداستىرۋ جانە باسقا ماقساتتارعا قولدانىلعان.

مۇنان وزگە, جىل باسىنان بەرى شىمكەنت قالاسىندا ءتۋريزمدى ناسيحاتتاۋعا ارنالعان قىزمەتتەرگە مەملەكەتتىك تاپسىرىس جاريالانىپ, كورشى ءوڭىر بۇل باعىتتا بەلسەندى جۇمىسىن باستاپ كەتكەن ەكەن.

پالاتا باسشىسى عالىمبەك جاقسىلىقوۆ بۇل ماسەلەنى ايماق باسشىلىعىنا جازباشا دا, كەزدەسۋ بارىسىندا دا جەتكىزگەنىن ايتا كەلە, سالانى دامىتۋعا قاتىستى بەرگەن ۇسىنىستارىمەن ءبولىستى.

بىرىنشىدەن, 2021 جىلعا ارنالعان «جۇمىسپەن قامتۋدىڭ جول كارتاسى» جوبالارىنىڭ تىزىمىنە تۋريستىك نىسانداردى ينفراقۇرىلىممەن قامتاماسىز ەتۋ جوبالارىن قوسۋدى ۇسىندى. وتكەن جىلى اتالمىش جول كارتاسى اياسىندا وبلىس بويىنشا 40 ملرد تەڭگەنى قۇرايتىن 291 جوبا جۇزەگە اسىرىلعان. الايدا ىشىندە تۋريزم سالاسىنداعى ينفراقۇرىلىمعا ارنالعان بىردە ءبىر جوبا جوق ەكەن.

ەكىنشىدەن, ءتۋريزمدى دامىتۋ جونىندەگى ءىس-شارالاردى قارجىلاندىرۋعا جەرگىلىكتى بيۋدجەتتەن قاراجات ءبولۋ.

ۇشىنشىدەن, ۇكىمەتتىك ەمەس ۇيىمداردى تارتا وتىرىپ, مەملەكەتتىك الەۋمەتتىك تاپسىرىس تەتىگى ارقىلى تۋريستىك سالانىڭ الەۋەتىن ىلگەرىلەتۋگە قاتىستى الەۋمەتتىك ماڭىزى بار جوبالاردى جۇزەگە اسىرۋ.

تورتىنشىدەن, «قىزىلوردا» وڭىرلىك ينۆەستيتسيالىق ورتالىعى ارقىلى تۋريزم سالاسىنداعى جوبالاردى نەسيەلەندىرۋگە ارنايى قاراجات ءبولۋ.