بۇگىن ماجىلىستە قازاقستاندا تىركەلگەن پارتيا وكىلدەرىنىڭ كەزدەسۋى ءوتىپ, وتىرىس بارىسىندا پالاتا توراعاسى نۇرلان نىعماتۋلين ءماجىلىس جانىنان پارتياارالىق كەڭەس قۇرۋدى ۇسىندى, دەپ حابارلايدى Egemen.kz.
ماجىلىستە وتكەن جيىنعا «Adal», «اق جول», «اۋىل» پارتيالارىنىڭ جانە قازاقستان حالىق پارتياسىنىڭ, «Nur Otan» جانە جسدپ وكىلدەرى جينالدى.
«ارقايسىمىزدىڭ العا قويعان جوسپارلارىمىز, مىندەتتەرىمىز, جۇمىس جاساۋ تاسىلدەرىمىز ءارتۇرلى بولعانىمەن, ماقساتىمىز ءبىر. ول – ەلباسىمىز نۇرسۇلتان ءابىش ۇلى نازارباەۆتىڭ, مەملەكەت باسشىسى قاسىم-جومارت كەمەل ۇلى توقاەۆتىڭ ەلىمىزدى دامىتۋ باستامالارىن قولداپ, حالقىمىزدىڭ ءومىر ساپاسىن جاقسارتۋعا ىقپال ەتۋ, ۇلەس قوسۋ», دەدى وتىرىستا نۇرلان نىعماتۋلين.
- وسى جولدا ءماجىلىس ارقاشاندا قوعامدىق ۇيىمدارمەن, تاۋەلسىز ساراپشىلارمەن, جۋرناليستەرمەن اشىق, قولجەتىمدى جانە جاريا جۇمىس ىستەپ كەلە جاتقانىن العا تارتقان پالاتا سپيكەرى: -ءماجىلىس جانىنان پارتياارالىق كەڭەستى ۇيىمداستىرۋدى ۇسىنا وتىرىپ, ءبىز, ەڭ الدىمەن, پارلامەنتتىك جانە پارلامەنتتىك ەمەس پارتيالاردىڭ ديالوگىن كەڭەيتۋ ءۇشىن جاڭا مۇمكىندىكتەر اشقىمىز كەلەدى. وسى جاڭا پىكىرتالاس الاڭىندا ازىرلەنەتىن تالقىلاۋلار, ۇسىنىستار, ۇسىنىمدار زاڭ شىعارۋ پروتسەسىن ودان دا ءتيىمدى ەتۋگە مۇمكىندىك بەرەدى دەپ ۇمىتتەنەمىز. جالپى, ءبىزدىڭ پارتياارالىق كەڭەس اياسىنداعى ىنتىماقتاستىعىمىز وزەكتى ماسەلەلەردى شەشۋدىڭ تاعى ءبىر قۇرالى بولا الادى, - دەدى.
ءماجىلىس سپيكەرىنىڭ پىكىرىنشە, پارتياارالىق كەڭەس كونسۋلتاتيۆتىك-كەڭەسشى ورگان بولۋى ءتيىس. سونىمەن قاتار, نۇرلان نىعماتۋلين دەپۋتاتتىق كورپۋستىڭ پارتيا وكىلدەرىنىڭ قانداي دا ءبىر زاڭ جوبالارى بويىنشا جۇمىس توپتارىنىڭ قۇرامىنا كىرۋىنە مۇددەلىلىگىن ءبىلدىردى.
- ءسىزدىڭ يدەيالارىڭىز, ۇسىنىستارىڭىز ءىس جۇزىندە جۇزەگە اسىرىلۋى كەرەك. ءبىز بىرلەسكەن جۇمىسقا دايىنبىز. مۇنداي ىنتىماقتاستىق پارلامەنتتىك ەمەس پارتيالار ءۇشىن دە پايدالى بولادى دەپ ويلايمىن, - دەدى ءماجىلىس سپيكەرى كەزدەسۋگە قاتىسۋشىلارعا ارناعان سوزىندە.
وتىرىس بارىسىندا «اۋىل» پاتريوتتىق پارتياسى توراعانىڭ ءبىرىنشى ورىنباسارى ت. راحىمبەكوۆ, جالپىۇلتتىق سوتسيال-دەموكراتيالىق پارتيانىڭ توراعاسى ا. راحىمجانوۆ جانە «Adal» پارتياسىنىڭ حاتشىسى ە. جۇماعازيەۆ ءماجىلىس توراعاسى ۇسىنعان باستامانى قولداپ, بۇل ءماجىلىس جۇمىسىنداعى جاڭا بەتبۇرىس ەكەنىن ايتتى.
سونىمەن قاتار, نۇرلان نىعماتۋلين ۇلتتىق قوعامدىق سەنىم كەڭەسىنىڭ V وتىرىسىندا ەل پرەزيدەنتى قاسىم-جومارت توقاەۆتىڭ كوتەرگەن تاپسىرمالارىنا, سونىڭ ىشىندە جاڭا زاڭ جوبالارىن ازىرلەۋگە قاتىستى ماسەلەلەرگە نازار اۋداردى.
- ءبىز پارتياارالىق كەڭەستىڭ تۇراقتى جۇمىس ىستەيتىن جۇمىس الاڭىنا اينالۋىن قامتاماسىز ەتۋىمىز كەرەك. وندا ۇسىنىمدار ازىرلەنەدى, سودان كەيىن ولار پارلامەنتتەگى زاڭنامالىق پروتسەستىڭ بارلىق ساتىلارىندا پايدالانىلاتىن بولادى, - دەدى ءسوزىن قورىتىندىلاعان ءماجىلىس توراعاسى.