اقمولا وبلىسى: ەكولوگيالىق جاعدايدى جاقسارتۋ جونىندەگى جول كارتاسىنا وزگەرىس ەنگىزىلەدى

وتىرىستا اقمولا وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى رۋسلان اۋباكىروۆ وڭىردە ەكولوگيالىق جاعدايدى وڭالتۋ بويىنشا اتقارىلىپ جاتقان جۇمىستار تۋرالى باياندادى. ونىڭ ايتۋىنشا, جول كارتاسى اياسىندا ارشالى اۋدانىندا «SIO Consulting» جشس-ءنىڭ جەكە ينۆەستيتسيالارى ەسەبىنەن جىلدىق قۋاتتى 30 مىڭ توننا قوقىس وڭدەيتىن وندىرىستىك كەشەن سالۋ جوسپارلانۋدا. ءوڭىردىڭ بىرقاتار قالالارى مەن كەنتتەرىندە قايتالاما شيكىزاتتى قابىلداۋدىڭ 15 قوسىمشا پۋنكتىن اشۋ, ارشالى, استراحان اۋداندارى مەن كوكشەتاۋدا گيدروتەحنيكالىق قۇرىلىستارعا جوندەۋ جۇرگىزۋ جانە استراحان اۋدانى مەن وبلىس ورتالىعىندا جاعالاۋدى نىعايتۋ جانە ارنانى كەڭەيتۋ جۇمىستارىن جۇرگىزۋ جوسپارلانىپ وتىر.

اقمولا وڭىرىندە تۇرمىستىق قالدىقتار توگەتىن زاڭداستىرىلعان پوليگونداردىڭ جوقتىعى جانە تۇرمىستىق قالدىقتاردى بولەك جيناۋ جانە سۇرىپتاۋ بويىنشا دامىعان ينفراقۇرىلىمنىڭ بولماۋى ۇلكەن ماسەلەگە اينالىپ وتىر. كوكشەتاۋ قالاسىندا قالدىقتاردى بولەك جيناۋ جۇيەسىن ەنگىزۋ كوپتەگەن سۇراقتار تۋعىزادى. جوبا 2016 جىلدىڭ قىركۇيەگىندە باستالدى, كوكشەتاۋ اكىمدىگىنىڭ قولداۋىمەن «LS Kokshetau» جشس كاسىپورنى قاتتى تۇرمىستىق قالدىقتاردى بولەك جيناۋدى ەنگىزۋ بويىنشا جۇمىستى باستادى. بولەك جيناۋ ءۇشىن 15 كونتەينەر ورناتىلىپ, وبلىس ورتالىعىنىڭ بارلىق شاعىن اۋداندارىندا قايتا شيكىزاتتى قابىلدايتىن 9 پۋنكت ۇيىمداستىرىلدى. «كوكشە تازالىق» جشس قاتتى تۇرمىستىق قالدىقتاردى وڭدەۋ سۇرىپتاۋ جەلىسىن ورناتتى, قالدىقتاردى ورنالاستىرۋ ءۇشىن الاڭ دايىندالدى. قوقىستى بولەك جيناۋعا ارنالعان 36 كونتەينەر ورناتىلدى.

وتىرىستا «Nur Otan» پارتياسى اقمولا وڭىرلىك فيليالى توراعاسىنىڭ ءبىرىنشى ورىنباسارى عالىم بەكماعامبەتوۆ وسى باعىتتاعى الداعى بەس جىلعا ارنالعان جوسپارلار تۋرالى ماسەلەنى كوتەردى.

جول كارتاسى اياسىندا وڭىردە ششۋچە, اقكول, ارشالى, قورعالجىن, قوسشى قوياندى, زەرەندىدە قالدىقتاردى سۇرىپتاۋ جانە قايتا وڭدەۋ جەلىلەرى بار جەتى قاتتى تۇرمىستىق قالدىقتار پوليگونىن سالۋ جوسپارلانۋدا. ازىرگە اقمولا وڭىرىندە قاتتى تۇرمىستىق قالدىقتار پوليگوندارىنىڭ تارالۋى بىركەلكى ەمەس: مىسالى, جاقسى اۋدانىندا بىردەن جەتى پوليگون, ال زەرەندى جانە بۋراباي اۋداندارىندا بىردە – ءبىر پوليگون جوق. ششۋچەدەگى پوليگون جابىلدى, ويتكەنى ول جەر استى كوزدەرىنىڭ ورنىندا ورنالاسقان. الايدا جەرگىلىكتى تۇرعىندار قوقىستى ادەتتەگى ورنىنا تاستاۋدى جالعاستىرۋدا.

«اقمولا وبلىسىندا قاتتى تۇرمىستىق قالدىقتار توگەتىن 130 پوليگون بولسا, ونىڭ 23-ءنىڭ عانا رۇقسات قۇجاتتارى بار. وسىلايشا, ەكولوگيالىق تالاپتار مەن سانيتارلىق ەرەجەلەرگە سايكەس كەلەتىن قاتتى تۇرمىستىق قالدىقتاردى ورنالاستىرۋ وبەكتىلەرىنىڭ ۇلەسى 17,6 پايىزدى قۇرايدى», دەپ اتاپ ءوتتى اقمولا وبلىسى بويىنشا ەكولوگيا دەپارتامەنتى باسشىسىنىڭ مىندەتىن اتقارۋشى ەرجان احمەتوۆ.

زاڭداستىرىلعان پوليگون بولماعاندىقتان, رۇقسات ەتىلمەگەن قوقىس ورىندارى پايدا بولۋدا. 2020 جىلى اقمولا وبلىسىندا عارىشتىق مونيتورينگ بويىنشا وسىنداي 1593 قوقىس ورنى انىقتالدى, ولاردىڭ 910-ى جويىلدى.

«اۋدان ورتالىقتارىندا قاتتى تۇرمىستىق قالدىقتارعا ارنالعان جەتى پوليگون سالۋمەن بىرگە بارلىق ەلدى مەكەندەردە قالدىقتاردى ۋاقىتشا ساقتاۋ الاڭدارىن ۇيىمداستىرۋ, قايتالاما شيكىزاتتى ساتىپ الۋ پۋنكتتەرىن ورناتۋ قاجەت. بۇدان باسقا, قوقىس جينالعان جاعدايدا ونى شىعارۋ تەتىگىن پىسىقتاۋ قاجەت. اقمولا وبلىسىندا 2020 جىلى 243 مىڭ توننا قاتتى تۇرمىستىق قالدىقتار جيناقتالعان. بۇل رەتتە قايتا وڭدەۋ ۇلەسى بار بولعانى 15 پايىزدى قۇرايدى», دەپ اتاپ ءوتتى ول.