تۇركىستان وبلىسىندا جاڭا ساۋران اۋدانىن قۇرۋ تۋرالى قر پرەزيدەنتى قاسىم-جومارت توقاەۆقا ۇسىنىس بەرىلدى. بۇل تۋرالى حالىقپەن ەسەپتىك كەزدەسۋىندە ءوڭىر اكىمى ومىرزاق شوكەەۆ ءمالىم ەتتى.
تۇركىستان وبلىسىنىڭ اكىمى ەسەپتىك جيىندا تۇركىستاندىقتاردى جاڭا ساۋران اۋدانىنىڭ قۇرىلۋىمەن قۇتتىقتادى.
«وبلىس ورتالىعى تۇركىستان قالاسىنا كوشىرىلگەلى بەرى كەنتاۋ قالاسىنا ونىڭ بۇرىنعى 12 اۋىل وكرۋگى بەرىلگەن بولاتىن. كەنتاۋ قالاسى اۋماعىنداعى ەلدى مەكەندەردىڭ دامۋىنا قانشا كوڭىل بولىنگەنىمەن, ءوڭىردى ارى قاراي ءتيىمدى دامىتۋ باعىتتارى مەنى كوپتەن بەرى تولعاندىرىپ جۇرگەن ماسەلەلەردىڭ ءبىرى بولاتىن. بۇلاي دەيتىن سەبەبىم, قالا شەكاراسىنىڭ كەڭەيۋى, تۇرعىندار سانىنىڭ ەكى ەسەگە ارتۋى, بۇرىنعى كەنتاۋ قالاسى مەن اۋىلدىق وكرۋگتەردىڭ قارقىندى دامۋى مەن وزەكتى الەۋمەتتىك ماسەلەلەرىن ۋاقىتىلى, ساپالى شەشۋگە, اۋماقتى ۇتىمدى باسقارۋعا ءبىرشاما قيىندىقتار تۋىنداتتى. وسىعان وراي, جاڭا اۋدان قۇرۋ جانە جاڭا اۋدانعا ساۋران اتىن بەرۋ جونىندە مەملەكەت باسشىسىنا ۇسىنىس بەرىلدى», دەدى ومىرزاق شوكەەۆ.
بۇگىنگى تاڭدا, زاڭ تالاپتارىنا ساي ءتيىستى قۇجاتتار راسىمدەلۋدە. قورىتىندى قۇجاتتار ۇكىمەت پەن پرەزيدەنتتىڭ قاراۋىنا ەنگىزىلەتىن بولادى. ساۋران اۋدانى 2021 جىلى ناۋرىز مەيرامى قارساڭىندا قۇرىلادى دەپ جوسپارلانۋدا. ەسكە سالساق, جاڭا جىل مەرەكەسى قارساڭىندا ءو.شوكەەۆ كەنتاۋ قالاسى مەن ونىڭ اۋىلدىق وكرۋگتەرىنىڭ تۇرعىندارىمەن ارنايى كەزدەسىپ, ساۋران اۋدانىن قۇرۋ تۋرالى ۇسىنىسىن بىلدىرگەن بولاتىن. حالىق ءوڭىر باسشىسىنىڭ باستاماسىن قۋانىشپەن قولدادى. بۇعان دەيىن ومىرزاق شوكەەۆ كەنتاۋ قالاسى تۇركىستان قالاسىمەن قاتار دامىتىلاتىنىن ايتقان ەدى.