كاسپي كاسىپكەرلىك ورتالىعى اشىلدى

قازىرگى تاڭدا, ەلىمىزدە كاسىپكەرلىك قىزمەتتى دامىتۋعا كوپتەگەن قولداۋلار جاسالۋدا, وقىتۋ باعدارلامالارىنىڭ بارلىق كەزەڭدەرىنە كاسىپكەرلىك ارقىلى ءبىلىم بەرۋ جوبالارى ەنگىزىلۋدە. وسى ماقساتتا, ەسەنوۆ ۋنيۆەرسيتەتىندە 2018 جىلى كاسىپكەرلىكتى قولداۋ جانە دامىتۋ ورتالىعى قۇرىلىپ, كاسىپكەرلىك مادەنيەتتى قالىپتاستىرۋ جولىندا كوپتەگەن شارالار وتكىزىپ, جاستاردى بىرىكتىرە باستادى. كاسىپكەرلىك ورتالىعى 2019 جىلى ناۋرىز ايىندا جاستار قاجەتتىلىگىنە سايكەس زاماناۋي قۇرال-جابدىقتارمەن, تەحنيكامەن جابدىقتالعان كوۆوركينگ رەتىندە قايتا جاساقتالىپ, «كاسپي كاسىپكەرلىك ورتالىعى» اتاۋى بەرىلىپ سالتاناتتى تۇردە اشىلدى. بۇل اتاۋدىڭ بەرىلۋ سەبەبى, ورتالىق تەك ۋنيۆەرسيتەت جاستارىمەن شەكتەلمەي, كاسپي ءوڭىرى ەلدەرىنىڭ جاستارىنا كاسىپكەرلىك ءبىلىم بەرۋ باعىتىندا قولداۋ كورسەتۋ.

ورتالىقتىڭ ماقساتى - كاسىپكەرلىك ءبىلىم بەرۋ باعىتىندا كاسپي ءوڭىرى جاستارىنىڭ, جاڭا باستاۋشى كاسىپكەرلەردىڭ جانە وقىتۋشىلار قۇرامى اراسىندا يننوۆاتسيالىق جانە كاسىپكەرلىك الەۋەتتى ارتتىرۋ, داعدىلار قالىپتاستىرۋ, ستارتاپ يدەيالاردى تابىستى بيزنەسكە اينالدىرۋ. بۇل ورتالىقتا ۋنيۆەرسيتەتكە وقۋعا كەلگەن ستۋدەنت ءوز ماماندىعى بويىنشا ءبىلىم الىپ قويماي, ءوز بيزنەسىن دامىتۋىنا مۇمكىندىك بار.

وسى ۋاقىت ارالىعىندا ورتالىقتا كوپتەگەن شارالار ۇيىمداستىرىلىپ, ءبىراز cتارتاپ جوبا قولداۋ تاۋىپ ۇلگەردى. اتاپ ايتاتىن بولساق, ورتالىق اشىلعان  العاشقى جىلدارى قر بعم مەن بولاشاق اسسوتسياتسياسىنىڭ ۇيىمداستىرۋىمەن وتكەن «Startup Bolashaq-Menin Armanym» رەسپۋبليكالىق مەگا بايقاۋىندا ماڭعىستاۋ ءوڭىرى بويىنشا بارلىق مەكتەپ, كوللەدج ستۋدەنتتەرىنە سەمينارلار, ترەنينگتەر وتكىزىلىپ ناتيجەسىندە 250 دەن اسا جوبا قاتىسۋعا ءوتىنىم بەردى. بۇل قاتىسۋشىلاردىڭ بارلىعىنىڭ كاسىبي داعدىلارىن قالىپتاسىرتۋدا ورتالىق قىزمەتكەرلەرى جەرگىلىكتى كاسىپكەرلەرمەن بىرگە مەنتورلىق جۇمىس اتقاردى, 5 كەزەڭنەن تۇراتىن ۇلتتىق بايقاۋدا ماڭعىستاۋلىق 5 جوبا نۇر-سۇلتان قالاسىندا وتكەن فينالدا باقتارىن سىنادى. سونىمەن قاتار, ماڭعىستاۋ وبىلىسى قاتىسۋشىلارىنا قولداۋ كورسەتكەن مەنتور, جەرگىلىكتى كاسىپكەر, سارىەۆ باۋىرجان «ەڭ ۇزدىك مەنتور» نوميناتسياسىن يەلەندى.

كاسىپكەرلىك ورتالىعى ماڭعىستاۋ وبلىستىق «اتامەكەن» ۇلتتىق  كاسىپكەرلەر پالاتاسىمەن بىرلەسىپ جۇمىس جاساۋدا, وسى ۋاقىتقا دەيىن ورتالىقتا 100 اسا ستۋدەنت, 50 اسا ۋنيۆەرسيتەت وقىتۋشىلارى «اتامەكەن» ۇكپ بيزنەس ترەنەرلەرىنىڭ ءار ءتۇرلى وقۋ كۋرستارىمەن ترەنينگتەرىنە قاتىسىپ, بىلىكتىلىگىن كوتەردى.

سونىمەن قاتار, كاسىپكەرلىك ورتالىعىندا جىل سايىن ەلىمىزدىڭ مەكتەپ وقۋشىلارى مەن كوللەدج ستۋدەنتتەرىنە «Jas kasipker» بايقاۋىن ءداستۇرلى تۇردە ۇيىمداستىرىپ كەلەدى, ماقسات – بارلىق وڭىردەن ستارتاپ جوبالارى بار, كرەاتيۆتى, جاڭاشىل وقۋشىلار مەن ستۋدەنتتەردى ىرىكتەپ, ۋنيۆەرسيتەتتە ءبىلىم الۋعا جەڭىلدىكتەر بەرۋ. قازىردە وسى بايقاۋ ناتيجەسىندە ۇزدىك بولعان 30-دان اسا ستۋدەنت ۋنيۆەرسيتەتتە 100%, 75%, 50% پايىزدىق جەڭىلدىكتەرمەن وقۋىن جالعاستىرۋدا.

قازىرگى تاڭدا ورتالىقتا ۇزدىك ناتيجەلەرگە قول جەتكىزگەن, ءوز جوبالارىن جۇزەگە اسىرعان ءساتتى جوبالارعا توقتالساق, ەسەنوۆ ۋنيۆەرسيتەتىنىڭ تۇلەگى - قاليەۆ قازبەكتىڭ جوباسى - 4D گالاكتيكا. بۇل بالالار مەن جاسوسپىرىمدەرگە ارنالعان AR قىزمەتى بار قوسىمشا جاساۋ ارقىلى ءبىلىم سالاسىن قىزىقتى ءارى ءتيىمدى ەتىپ دامىتۋ. بۇل ءونىم ارقىلى وقۋشىلاردىڭ بىلىمگە دەگەن تالپىنىسى, قىزىعۋشىلىعى ارتادى سول ءۇشىن بۇل ءونىم ءبىلىم سالاسى ءۇشىن وتە ماڭىزدى, جوبا نارىقتا جۇمىس جاساۋدا. بۇل جوبانىڭ جەتىستىكتەرى, «جاستار سينەرگياسى» رەسپۋبليكالىق بايقاۋىنىڭ جەڭىمپازى, «Mediana» كومپانياسىنىڭ ۇيىمداستىرۋىمەن وتكەن RIFMO-2019 حالىقارالىق IT فورۋمى اياسىندا وتكەن ستارتاپ جوبالار بايقاۋىنىڭ 3 ورىن يەگەرى. 2020 جىلى جوبا اۆتورلىق قۇقىق يەلەندى.

سونىمەن قاتار, مۇمكىندىگى شەكتەۋلى جانداردىڭ ماسەلەلەرىن ازايتۋ, پايدالى ءونىم ءوندىرىپ, ساتۋ  ماقساتىندا جاسالعان «اقىلدى تاياقشا» جوباسى, اۆتورلارى – ەسەنوۆ ۋنيۆەرسيتەتى ينجينيرينگ فاكۋلتەتى ستۋدەنتتەرى مۇحانبەتوۆ بەكبەردى, قۋانوۆا اينۋر. بۇل جوبادا بىرنەشە جەتىستىكتەرگە جەتىپ ۇلگەردى, اتاپ ايتساق, 2018 جىلى وتكەن تOM-Aktau: Makeathon حالىقارالىق الەۋمەتتىك جوبالار بايقاۋىنىڭ جەڭىمپازدارى,  2019 جىلى قازان ايىندا وتكەن «KazEnergy» يننوۆاتسيالىق جوبالار بايقاۋىنىڭ جەڭىمپازدارى, 2020 جىلى جوبا اۆتورلارى پايدالى مودەلگە پاتەنت يەلەندى.

ينجينيرينگ فاكۋلتەتى ستۋدەنتى - ۇلىقپانوۆ نۇراحمەت سۋ تازالايتىن قۇرىلعى قۇراستىرىپ, «بيزنەستىڭ جول كارتاسى 2020» باعدارلاماسى اياسىندا 3 ملن تەڭگە قارجىلاندىرۋ الىپ, قازىردە بيزنەسىن جۇرگىزىپ وتىر.

ادام دەنساۋلىعىنا پايدالى جەمىستەردەن ەرەكشە رەتسەپتەر بويىنشا چيپستەر دايىنداپ, حالىق اراسىندا سالاۋاتتى ءومىر سالتىن قالىپتاستىرۋ ماقساتىندا Fruit ءchىرs جوباسىمەن «بيزنەس جانە قۇقىق» فاكۋلتەتىنىڭ ستۋدەنتى – ايتباەۆا ايلارا  «RIFMO 2019» فورۋمى اياسىندا وتكەن ستارتاپ جوبالار بايقاۋنىڭ 2 ورىن جەڭىمپازى اتانىپ, 300 000 تەنگە قارجى يەلەندى.

سونىمەن قاتار, بىرنەشە الەۋمەتتىك جوبالاردا «جاستار جەتىستىكتەرى» قوعامدىق قورىنىڭ ۇيىمداستىرۋىمەن وتكەن بايقاۋلاردا «تەنگيزشەۆرويل» كومپانياسىنىڭ قارجىلىق قولداۋىن جەڭىپ, قوعامعا پايدالى, قايىرىمدىلىق شارالار ۇيىمداستىردى.

- كاسپي كاسىپكەرلىك ورتالىعى 2020 جىلى حالىقارالىق Triple E Awards Entrepreneurship and Engagement Excellence Awards (جوعارى ءبىلىم بەرۋ سالاسىنداعى كاسىپكەرلىك جانە ۇزدىك جەتىستىكتەر) ماراپاتىنا قاتىسىپ, ازيا-تىنىق مۇحيتى ايماعىنداعى 30دان اسا ەلدىڭ 200-دەن استام جوو قاتىسقان بايقاۋدا «جىلدىڭ يننوۆاتسيالىق جانە ىنتىماقتاستىق كەڭىستىگى» نوميناتسياسى بويىنشا ۇزدىك 5 فيناليستەرىنىڭ قاتارىنا ەندى, Triple E Awards ماراپاتى بارلىعى 12 نوميناتسيا بويىنشا ءوتتى. اتالمىش ماراپاتتى شتاب-پاتەرى امستەردامدا (نيدەرلاندى) ورنالاسقان ۋنيۆەرسيتەتتەگى كاسىپكەرلىكتى جانە بىرەگەيلىكتى اككرەديتتەۋ جونىندەگى كەڭەس (ACEEU) ۇيىمداستىردى, كەڭەس (ACEEU) كاسىپكەرلىكتىڭ ساپاسىن جانە ونىڭ جوعارى بىلىمگە قاتىسۋىن قامتاماسىز ەتەتىن الەمدەگى جەتەكشى ۇيىم بولىپ تابىلادى.

Triple E Awards ماراپاتى – ۋنيۆەرسيتەتتىڭ جوعارى ءبىلىم سالاسىندا كاسىپكەرلىكتى زەرتتەۋدەگى كۇش-جىگەرىن الەمدىك مويىنداۋى. بۇل ۋنيۆەرسيتەت ميسسياسىنىڭ ءارتۇرلى اسپەكتىلەرىنە ارنالعان العاشقى ماراپات بولىپ تابىلادى. Triple E Awards ماراپاتى ۋنيۆەرسيتەتتەردەگى وزگەرىستەرگە قولداۋ كورسەتۋگە جانە ولاردىڭ قوعامداستىقتار مەن ەكوجۇيەلەردەگى ءرولىن اتاپ وتۋگە باعىتتالعان. قازىرگى تاڭدا ورتالىق جاستارعا كاسىپكەرلىك ويلاۋ جۇيەسىن, مادەنيەتتىن قالىپتاستىرۋدا جاڭا تىڭ جوبالار ۇيىمداستىرۋدا, دەيدى ورتالىق جەتەكشىسى  گۇلجازيرا ناعىمەتقىزى قوسماعانبەتوۆا.