ۆەدومستۆوارالىق مەملەكەتتىك كوميسسيانىڭ وتىرىسى ءوتتى

وتىرىس بەينەسەلەكتورلىق رەجيمدە ءوتتى. وعان ورتالىق مەملەكەتتىك ورگانداردىڭ باسشىلارى, وبلىستاردىڭ, نۇر-سۇلتان, الماتى جانە شىمكەنت قالالارى اكىمدەرىنىڭ ورىنباسارلارى, توتەنشە جاعدايلار دەپارتامەنتتەرىنىڭ باستىقتارى, سونىمەن قاتار كوميسسيا مۇشەلەرى قاتىستى.

وتىرىستا تج, ەكولوگيا, گەولوگيا جانە تابيعي رەسۋرستار, يندۋستريا جانە ينفراقۇرىلىمدىق دامۋ مينيسترلىكتەرىنىڭ, كازگيدرومەت باسشىلارى مەن وكىلدەرى ءسوز سويلەدى. قارالعان ماسەلەلەر بويىنشا بىرقاتار وبلىس اكىمدەرىنىڭ ورىنباسارلارى تىڭدالدى.

ۋاقىتىلى قابىلدانعان شارالاردىڭ ارقاسىندا (الدىن الۋ شارالارىنىڭ كەشەنى, جول كارتاسىن ىسكە اسىرۋ) سوڭعى ەكى جىلداعى سۋ تاسقىنى كەزەڭى تۇراقتى وتكەندىگىن اتاپ وتكەن ءجون.

سونىمەن قاتار, سۋ باسۋ قاۋپى 276 (30,5%) ەلدى مەكەن ۇشىن (حالقىنىڭ سانى 270 مىڭ ادامنان اساتىن) ساقتالادى.

سۋ تاسقىنى قاۋپىنىڭ الدىن الۋ جانە جويۋ جونىندەگى جول كارتاسىن ىسكە اسىرۋ اياقتالدى (2017-2020 جىلدار), ول 315 (34,8%) ەلدى مەكەندەردى قورعاۋدى قامتاماسىز ەتۋگە جانە 314 (34,7%) اۋىل مەن كەنت ءۇشىن قاۋىپتى تومەندەتۋگە مۇمكىندىك بەردى. جالپى, ءتورت جىل ىشىندە بوگەتتەر مەن بىلىكتەردى سالۋ, قورعانىس قۇرىلىستارىن جوندەۋ, سۋ تاسقىنى قاۋپى بار وزەندەردىڭ جاعالاۋ سىزىعىن نىعايتۋ بويىنشا جۇمىستار جۇرگىزۋدى قوسا العاندا, ءتورت جۇزدەن استام ينجەنەرلىك-قورعاۋ ءىس-شارالارى ورىندالدى. 2023 جىلعا دەيىن سۋ تاسقىنىنا قارسى ءىس-شارالاردىڭ جاڭا جول كارتاسى بەكىتىلدى.

قازىرگى ۋاقىتتا وڭىرلەردە كوكتەمگى سۋ تاسقىنىنا دايىندىق اياسىندا ەلدى مەكەندەردەن قاردى شىعارۋ, ارىقتاردى, اۆتوموبيل جانە تەمىرجول سۋ وتكىزۋ قۇرىلىستارىن تازالاۋ جالعاسۋدا, قاۋىپتى ۋچاسكەلەردە ينجەنەرلىك جۇمىستارى جۇرگىزىلۋدە. ينەرتتى, جانار-جاعارماي ماتەريالدارىنىڭ قورى دايىندالدى. قۇرامىندا 40 مىڭنان استام ادام, 13 مىڭ بىرلىك تەحنيكا بار قۇرىلىمدار انىقتالدى. شۇعىل شىعىندارعا توتەنشە رەزەرۆتەر دايىندالدى, شامامەن 38 ميلليارد تەڭگە الدىن الا سالىندى.

اسا ءىرى 60 سۋ قويماسىنىڭ (اقمولا, اقتوبە, الماتى, شىعىس قازاقستان, جامبىل, باتىس قازاقستان, قاراعاندى, قوستاناي, سولتۇستىك قازاقستان جانە تۇركىستان وبلىستارى) تولتىرىلۋىنا اپتا سايىن مونيتورينگ جۇرگىزىلەدى.

رەسپۋبليكالىق دەڭگەيدە اۆاريالىق-قۇتقارۋ بولىمشەلەرىنىڭ كۇشتەرى مەن قۇرالدارىنىڭ توبى قۇرىلدى. بۇل 10 مىڭنان استام قىزمەتكەر, 1 880 بىرلىك تەحنيكا. تجم ازاماتتىق قورعانىس اسكەري بولىمدەرىندە ارقايسىسى مىڭ ادامعا ارنالعان 3 شاتىرلى لاگەر دايىندالعان. حالىقتى حاباردار ەتۋ ماسەلەلەرى پىسىقتالدى.

ناۋرىز ايىنىڭ باسىندا سۋ تاسقىنىنا نەعۇرلىم بەيىم وڭىردە (پاۆلودار ق.) «كوكتەم» رەسپۋبليكالىق كوماندالىق-شتابتىق وقۋ-جاتتىعۋىن وتكىزۋ جوسپارلانۋدا, ول ازاماتتىق قورعاۋدىڭ مەملەكەتتىك جۇيەسىنىڭ اعىمداعى جىلعى سۋ تاسقىنىن قاۋىپسىز وتكىزۋگە دايىندىق دەڭگەيىن ايقىنداۋعا مۇمكىندىك بەرەدى.

وتىرىس قورىتىندىسى بويىنشا سۋ تاسقىنى كەزەڭىندەگى تج تۋىنداۋىن ازايتۋ جانە ادامداردىڭ قازا بولۋىنا جول بەرمەۋ بويىنشا الدىن الا شارالار قابىلداۋ ۇسىنىلدى. كوميسسيا وتىرىسىنىڭ سوڭىندا حاتتامالىق شەشىم قابىلداندى.