قاتاڭ سوگىس الدى: ەلوردا اكىمىنىڭ ورىنباسارى قىزمەتىنەن كەتپەيتىن بولدى

"قر مەملەكەتتىك قىزمەتى تۋرالى" زاڭعا سايكەس مادەنيەت باسقارماسىنىڭ بۇرىنعى باسشىسىنا قاتىستى ۇكىم شىققاننان كەيىن وسى باسقارماعا جەتەكشىلىك ەتەتىن اكىم ورىنباسارى وتستاۆكاعا ءوتىنىش بەرگەن. ب. ماكەن جەتەكشىلىك ەتەتىندەردىڭ قاتارىندا ءبىلىم بەرۋ, ءدىن, جاستار ساياساتى, حالىقتىڭ الەۋمەتتىك وسال توپتارىمەن جۇمىس سەكىلدى الەۋمەتتىك ماڭىزدى سالالار بار ەكەنىن اتاپ وتكەن ءجون.

اكىم ورىنباسارى تاعايىندالعاننان بەرى ۇلكەن جۇمىس اتقارىلدى جانە جەتەكشىلىك ەتەتىن سالالارداعى نەگىزگى ينديكاتورلار جاقسارتىلدى: ءۇش اۋىسىمدى مەكتەپتەر سانى ەكى ەسەگە – 8-دەن 4-كە دەيىن, وقۋشى سانى كوپ مەكتەپ سانى 22-دەن 14-كە دەيىن قىسقارتىلدى. پاندەميا كەزىندە قىسقا مەرزىمدە جەدەل شتاب قۇرىلىپ, 43 مىڭنان استام ادام الەۋمەتتىك كومەك الدى. الەۋمەتتىك از قامتىلعان ازاماتتاردى قولداۋ ءۇشىن ءتيىستى الەۋمەتتىك ورتالىقتار اشىلدى, وندا ولار ء"بىر تەرەزە" قاعيداتى بويىنشا كومەك الا الادى, سونداي-اق قوسىمشا ءبىلىم الىپ, كەيىننەن جۇمىسقا ورنالاسۋىنا مۇمكىندىك قاراستىرىلدى.

بۇدان باسقا, پتر-زەرتحانالاردىڭ سانى 1-دەن 23-كە دەيىن ۇلعايتىلدى, ال تەست ناتيجەسىنىڭ ۋاقىتى 4-5 كۇننەن 4 ساعاتقا دەيىن قىسقارتىلدى. سونداي-اق, جۇمىس ورىندارىن قۇرۋ جانە ەرىكتىلەردى قولداۋ سەكىلدى وزگە دە ۇلكەن ءىس جۇرگىزىلدى.

الەۋمەتتىك سالادا جۇرگىزىلىپ جاتقان جۇمىستاردىڭ جوعارى تيىمدىلىگى مەن ناتيجەلىلىگىن, سونداي-اق قىلمىستىق ىسكە ەش قاتىسى جوق ەكەنى ەسكەرىلە وتىرىپ, ب.ماكەننىڭ قىزمەتىنەن كەتۋ تۋرالى ءوتىنىشى قابىلدانعان جوق. الايدا وعان قاتاڭ سوگىس جاريالاندى.