سىر وڭىرىندە ىندەتتىڭ جاپپاي تارالۋىنىڭ الدىن الۋعا قاتىستى ءىس-شارالار جوسپارعا ساي اتقارىلىپ جاتىر. سوڭعى كۇندەردەگى ەپيدەميالىق احۋالعا توقتالار بولساق, ىندەت بەلگى بەرگەن ۋاقىتتان باستاپ بۇگىنگە دەيىن 3 675 ناۋقاس تىركەلىپ, ونىڭ 3 551-ءى ەمدەلىپ شىققان. سوڭعى تاۋلىكتە بويىنان ۆيرۋس بەلگىسى تابىلعان تاعى 9 ادام انىقتالدى. ونىڭ تورتەۋى وبلىس ورتالىعىنان بولسا, قازالى مەن سىرداريا اۋداندارىنان – ەكەۋدەن, شيەلىدەن 1 ادام تىركەلىپ وتىر. وسى كۇنى ينفەكتسيالىق ستاتسيوناردا 27 ناۋقاس بار, ونىڭ ەكەۋى جانساقتاۋ بولىمىندە ەم قابىلداۋدا.
قازىر ءوڭىر «جاسىل ايماقتا» تۇر. ەپيداحۋال كۇردەلەنگەن جاعدايدا ستاتسيونارلار مەن جەدەل جۇمىلاتىن مەديتسينالىق-سانيتارلىق مەكەمەلەر ساي تۇر. فيلتر كابينەتتەرى, تەلەفونمەن كەڭەس بەرۋ دە قاراستىرىلعان. سونداي-اق ءۇي جاعدايىندا قىزمەت كورسەتۋ ءۇشىن قوسىمشا اۆتوكولىكتەر سانى ناقتىلاندى.
ەپيدماۋسىم باستالعالى بەرى 205 142 سىناما الىنىپتى. كەشە زەرتحاناعا 1 309 سىناما تاپسىرىلدى, ماماندار ونىڭ 596-سىن تەكسەرىپ ۇلگەردى. ادامنىڭ بويىندا دەرت بەلگىسى بار-جوعىن انىقتايتىن تەستتەر وبلىستىق فتيزيوپۋلمونولوگيا ورتالىعى, ۇلتتىق ساراپتاما ورتالىعى, «ينۆيۆو» مەن «وليمپ» كلينيكالارى, ارال وباعا قارسى لابوراتورياسى ارقىلى تەكسەرىلەدى.
وسى جىلعى 1 اقپاننان قىزىلوردادا دا COVID-19 ينفەكتسياسىنا قارسى ەگۋ جۇمىستارى باستالعانى بەلگىلى. سول كۇنى رەسەيلىك سپۋتنيك V ۆاكتسيناسىنىڭ 1 مىڭ دوزاسى جەتكىزىلىپ, مەديتسينا سالاسىنىڭ قىزمەتكەرلەرى, ونىڭ ىشىندە قابىلداۋ, جۇقپالى اۋرۋلار, جانساقتاۋ جانە حيرۋرگيالىق ءبولىم ماماندارىنا ەگىلە باستادى. ەكپە قالاداعى №1, №3, №6 ەمحانالارىندا جۇرگىزىلۋدە.
الداعى ۋاقىتتا مۇعالىمدەرگە جانە جۇقتىرۋ قاۋپى جوعارى سانالاتىن سالا وكىلدەرىنە دە سالىنادى. ازىرشە ۆاكتسينالاۋ وبلىس ورتالىعىندا عانا جۇرگىزىلۋدە. جالپى, باستاپقى جوسپار بويىنشا وبلىسقا 80 مىڭ دوزا ۆاكتسينا كەزەڭ-كەزەڭىمەن اكەلىنەدى.
العاشقى ون كۇننىڭ قورىتىندىسى بويىنشا 640 تۇرعىنعا ەكپە جاسالعانى بەلگىلى بولىپ وتىر. ولاردىڭ 617-ءسى – دەنساۋلىق ساقتاۋ سالاسىنىڭ ماماندارى. ەكپە العانداردىڭ بارلىعى دارىگەرلەر باقىلاۋىندا, دەنساۋلىق جاعدايلارىنا شاعىمدارى جوق.
– وبلىس بويىنشا مەديتسينا ۇيىمدارىندا 154 ەكپە كابينەتى بار. سونىڭ ىشىندە كوروناۆيرۋس ينفەكتسياسىنا قارسى ۆاكتسينالاۋعا 32 ەكپە كابينەتى مەن 12 جىلجىمالى ەگۋ بريگاداسى دايىندالدى. وسى كەزگە دەيىن ۆاكتسينا سالدىرعاندار اراسىندا شاعىم بولعان جوق. دەنساۋلىقتارى تۇراقتى باقىلاۋدا, – دەيدى وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆ.
ەگۋ جۇمىستارى باستالعالى بەرى دەنساۋلىق ساقتاۋ باسقارماسى مەن سانيتاريالىق-ەپيدەميولوگيالىق باقىلاۋ دەپارتامەنتى ماماندارى قاۋىرت قيمىلعا كوشكەن. ماماندار ەكپە بارىسىن ۇدايى قاداعالاپ, باق وكىلدەرىمەن كەزدەسۋ وتكىزۋدى جيىلەتتى. ال مەديتسينالىق ۇيىمداردا ۆاكتسينالاۋدىڭ ماڭىزى تۋرالى ءتۇسىندىرۋ جۇمىستارى كەڭىنەن جۇرگىزىلۋدە. بۇل الداعى ۋاقىتتا جالعاسىن تابادى.
قىزىلوردا وبلىسى