بۇگىن ماۋلەن اشىمباەۆتىڭ توراعالىق ەتۋىمەن سەنات وتىرىسى بولدى, دەپ حابارلايدى Egemen.kz.
دەپۋتاتتار «قازاقستان رەسپۋبليكاسىنىڭ ديپلوماتيالىق قىزمەتى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى.
زاڭدا قازاقستاندىق ديپلوماتتارعا قىزمەتكە كىرۋ كەزىندە قويىلاتىن تالاپتار كۇشەيتىلەتىن بولدى. قۇجاتتا ولارعا مەملەكەتتىك تىلمەن قاتار شەت تىلدەرىن ءبىلۋى قاجەتتىگى كوزدەلىپ وتىر. قۇقىق بۇزۋشىلىق جاساعانى ءۇشىن ديپلوماتيا سالاسى قىزمەتكەرلەرىنىڭ ديپلوماتيالىق دارەجەسى تومەندەتىلەدى نەمەسە ودان ايىرۋ دا قارالادى.
ماۋلەن اشىمباەۆ اتالعان زاڭ جوباسىنىڭ ەرەكشە ماڭىزىن اتاپ ءوتتى. حالىقارالىق ارەنادا قازاقستاننىڭ مۇددەلەرىن ىلگەرىلەتۋدە وتاندىق ديپلوماتيالىق قىزمەتتىڭ ەرەكشە ءرول اتقاراتىنى ەسكەرىلدى.
«قۇجات ەلىمىزدىڭ ديپلوماتيالىق قىزمەتىنىڭ قۇقىقتىق بازاسىن جەتىلدىرەدى جانە رەتتەيدى. جوبا سونداي-اق ديپلوماتيالىق سالا ارداگەرلەرىن الەۋمەتتىك قولداۋعا باعىتتالعان نورمالاردى دا قامتيدى. قابىلدانعان زاڭ ەلىمىزدىڭ ديپلوماتيالىق قىزمەتىنىڭ تيىمدىلىگىن ارتتىرۋعا ءوز ۇلەسىن قوسادى دەپ ۇمىتتەنەمىز», - دەدى ماۋلەن اشىمباەۆ.
دەپۋتاتتار زاڭ جوباسىن قاراۋ بارىسىندا وعان بىرقاتار تۇزەتۋلەر ەنگىزۋدى ۇسىندى. سەناتورلار, اتاپ ايتقاندا, «ديپلوماتيالىق قىزمەت ارداگەرى» ۇعىمىن تۇزەتۋدى جانە وسى ساناتقا جاتاتىن ادامدار توبىن قايتا قاراۋدى ۇسىندى. سونداي-اق ديپلوماتيالىق پوشتانى ەلشىلىكتەر قىزمەتكەرلەرى مەن ولاردىڭ وتباسى مۇشەلەرىنىڭ جەكە پايدالانۋىنا ارنالعان زاتتار مەن تەحنيكانى جىبەرۋگە پايدالانۋ قۇقىعىن الىپ تاستاۋدى سۇرادى. زاڭ جوباسى سەناتتىڭ وسى جانە باسقا دا تۇزەتۋلەرىمەن ماجىلىسكە قايتارىلدى.
بۇگىن دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اتوم ەنەرگياسىن پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا قارادى.
قۇجات اتوم ەنەرگەتيكاسى سالاسىنداعى مەملەكەتتىك ورگانداردىڭ وكىلەتتىكتەرى مەن مىندەتتەرىنىڭ اراجىگىن ناقتى اجىراتادى. بۇل قازاقستاندىقتاردىڭ قاۋىپسىزدىك دەڭگەيىن ارتتىرۋدا, سونداي-اق وكىلەتتىكتەردىڭ قايتالانۋىن بولدىرماۋدا ماڭىزدى بولىپ وتىر. قۇجات وتاندىق زاڭنامانىڭ كەيبىر ەرەجەلەرىن ماگاتە-ءنىڭ قاۋىپسىزدىك جونىندەگى حالىقارالىق تالاپتارىنا سايكەس كەلتىرەدى. زاڭ قابىلدانعاننان كەيىن مەملەكەت باسشىسىنا قول قويۋعا جىبەرۋ تۋرالى شەشىم قابىلداندى.
«قابىلدانعان زاڭ اتوم ەنەرگەتيكاسى سالاسىنداعى قىزمەتتىڭ قاۋىپسىزدىگىن قامتاماسىز ەتۋى جانە وسى سالاداعى زاڭنامانى جەتىلدىرۋى ءتيىس. قۇجات سونداي-اق رادياتسيالىق قاۋىپسىزدىكتى كۇشەيتۋ ماسەلەلەرىن دە قامتيدى. زاڭ قورشاعان ورتا مەن حالىق دەنساۋلىعىن قورعاۋ سالاسىنداعى مەملەكەتتىك ساياساتتىڭ تيىمدىلىگىن ارتتىرادى», - دەدى ماۋلەن اشىمباەۆ.
سەناتورلار وتىرىستا دەپۋتاتتىق ساۋالداردى دا جاريا ەتتى. اقمارال ءالنازاروۆا سانيتارلىق اۆياتسيانى دامىتۋ ماسەلەسىن كوتەردى. ناريمان تورەعاليەۆتىڭ ساۋالىندا ەرەكشە قاجەتتىلىكتەرى بار ادامداردىڭ پروبلەمالارى جانە ولاردى تۇرعىن ۇيمەن قامتاماسىز ەتۋ جايى ايتىلدى. نۇرتورە ءجۇسىپ بالالار كارديوحيرۋرگياسى سالاسىندا ەرەكشە نازار اۋدارۋدى تالاپ ەتەتىن ماسەلەلەرگە توقتالدى, ال سۇلتان دۇيسەمبينوۆ جۇمىرتقا مەن قۇس ەتىنىڭ قىمباتتاۋىنا بايلانىستى پروبلەمالاردى شەشۋ جولدارىن ۇسىندى.