ەلشى ەرلان الىمباەۆ ءۇندى مەگاپوليستەرىنىڭ ءبىرى حايدارابادتا تانىمال ءۇندى كاسىپكەرى جانە مەتسەناتى مير ناسير الي حان باسقارعان قازاقستاننىڭ قۇرمەتتى كونسۋلدىعىنىڭ اشىلۋ راسىمىنە قاتىستى, دەپ حابارلايدى Egemen.kz.
سالتاناتتى ءىس-شارادا سويلەگەن سوزىندە وتاندىق ديپلومات قازاقستان تاۋەلسىزدىگىنىڭ 30-جىلدىعىندا جانە ەكى ەل اراسىنداعى ديپلوماتيالىق قاتىناستاردىڭ 30 جىلدىعى قارساڭىندا ءۇندىستاندا قازاقستاننىڭ دوستار شەڭبەرىنىڭ كەڭەيۋىنىڭ ەرەكشە ءمانى بار ەكەنىن اتاپ ءوتتى.
ە.الىمباەۆ مير ناسير الي حان مىرزانىڭ پاندەميا كەزىندە قازاقستاننىڭ ەلشىلىگىنە جانە ازاماتتارىنا ۇلكەن قولداۋ كورسەتكەنىن اتاپ ءوتىپ, قۇرمەتتى كونسۋلدىقتىڭ اشىلۋى ۇندىستانمەن ەكىجاقتى ساۋدا-ەكونوميكالىق جانە مادەني بايلانىستاردى تەرەڭدەتۋگە ەلەۋلى ۇلەس قوساتىنىنا سەنىم ءبىلدىردى.
سونىمەن قاتار ەلشى 1884 جىلى نەگىزى قالانعان, وڭىردەگى ەڭ ەسكى قوعامدىق ۇيىمداردىڭ ءبىرى – ء«ۇندىستان نيزامدار كلۋبى» جانىنداعى حايداراباد قالاسىنداعى ەڭ بەدەلدى كىتاپحانالاردىڭ بىرىندە قازاقستاننىڭ مادەنيەتى مەن تاريحى تۋرالى اعىلشىن جانە حيندي تىلدەرىندەگى كىتاپتار مەن باسپا باسىلىمدارى قويىلعان «قازاق ادەبيەتى زالىن» اشتى.
وسىعان وراي وتكەن ءباسپاسوز كونفەرەنتسياسى بارىسىندا ەلشى جەرگىلىكتى اۋديتوريانى ەلىمىزدىڭ تاۋەلسىزدىك جىلدارىنداعى باستى جەتىستىكتەرىمەن, پرەزيدەنت قاسىم-جومارت توقاەۆتىڭ ساياسي رەفورمالارىنىڭ ءۇشىنشى پاكەتىنىڭ نەگىزگى مازمۇنىمەن, سونداي-اق ەلباسى نۇرسۇلتان نازارباەۆتىڭ قازاقستان مەن ءۇندىستان اراسىنداعى قارىم-قاتىناستاردى قالىپتاستىرۋ مەن نىعايتۋعا قوسقان ۇلكەن ءرولى مەن ۇلەسى تۋرالى ەگجەي-تەگجەيلى تانىستىردى.