الماتى قالاسىنداعى ۇلتتىق كىتاپحانادا قازاقستان مۇسىلماندارى ءدىني باسقارماسىنىڭ ۇيىمداستىرۋىمەن تاۋەلسىزدىكتىڭ 30 جىلدىق مەرەيتويىنا ارنالعان «تاۋەلسىزدىك جانە يسلام» رەسپۋبليكالىق عىلىمي-تاجىريبەلىك ونلاين كونفەرەنتسياسى ءوتتى, دەپ حابارلايدى Egemen.kz.
كونفەرەنتسيا الماتى قالاسىنىڭ باس يمامى ەركىنبەك قاري شوقايدىڭ قۇران وقۋىمەن باستالسا, باس ءمۇفتي ناۋرىزباي قاجى تاعان ۇلى دۇعا جاسادى.
كەزدەسۋدى اشقان قمدب توراعاسى شاراعا قاتىسۋشى زيالى قاۋىم وكىلدەرى مەن عالىمدارعا العىس ايتىپ, اللانىڭ حالقىمىزعا ءناسىپ ەتكەن ەڭ ۇلى نىعمەتى – تاۋەلسىزدىك پەن يسلام قۇندىلىقتارى تۋرالى بايانداما جاسادى.
سودان كەيىن الماتى قالاسى ءدىن ىستەرى باسقارماسىنىڭ باسشىسى نۇرلان كيكيموۆ قۇتتىقتاۋ ءسوزىن ايتتى. كەزەكپەن ءسوز العان مۇرات جۇرىنوۆ, مامبەت قويگەلديەۆ, احان بيجانوۆ, سماعۇل ەلۋباي, قۇل-كەرىم ەلەمەس, باقىتجان ساتەرشينوۆ, ءشامشادين كەرىم تاۋەلسىزدىك جانە يسلام قۇندىلىقتارى, رۋحاني جاڭعىرۋ مەن جاستار تاربيەسى, تاۋەلسىز قازاقستانداعى يسلامي ءبىلىم جۇيەسىنىڭ قالىپتاسۋى, ساياسي قۋعىن-سۇرگىنگە ۇشىراعان ءدىن وكىلدەرىن انىقتاۋ مەن اقتاۋ جانە وزگە دە وزەكتى ماسەلەلەردى تالقىلاپ, بايانداما وقىدى.
ونلاين جيىن سوڭىندا قمدب قىزمەتىن دامىتۋ باعىتىندا بىرقاتار پىكىر ايتىلدى. ناۋرىزباي قاجى تاعان ۇلى ايتىلعان ۇسىنىستار جۇمىس جوسپارىنا ەنگىزىلەتىنىن جەتكىزدى.
ەسكە سالساق, جۇقپالى ىندەتتىڭ الدىن الۋ جانە كارانتيندىك تالاپتاردى ساقتاۋ ماقساتىندا كونفەرەنتسيا ونلاين رەجيمدە ءوتتى.