قىزىلوردا قالاسىنىڭ اكىمى قورىتىندى ەسەپ بەردى

«قالامىزدىڭ كوركەيۋىنە ءاربىر تۇرعىننىڭ قوسقان ۇلەسى زور. قاشاندا ىنتىماعى جاراسقان ەلدىڭ كوپتەن كوشى وزىپ, بولاشاققا باسقان قادامى نىق بولادى» دەپ باستاعان قالا باسشىسى بىلتىرعى جىل بەدەرىندەگى جەتىستىكتەرگە توقتالدى. 

جىل باسىندا قالا بيۋدجەتى 69 ملرد تەڭگە بولىپ بەكىتىلىپ, جىل سوڭىندا 94 ملرد تەڭگەگە جەتتى. ونەركاسىپ ونىمدەرىنىڭ ءوندىرىس كولەمى 480 ملرد تەڭگەگە جەتىپ, نەگىزگى كاپيتالعا سالىنعان ينۆەستيتسيا كولەمى ارتىعىمەن ورىندالدى. وبلىسقا سالىنعان ينۆەستيتسيانىڭ  52 پايىزى قىزىلوردا قالاسىنىڭ ۇلەسىنە ءتيىپ تۇر.

وبلىستا ناقتى جۇمىس جاساپ تۇرعان كاسىپكەرلىك سۋبەكتىلەرى بويىنشا قىزىلوردا قالاسىنىڭ ۇلەسى  48 پايىزعا جەتتى.

«يندۋستريالىق - يننوۆاتسيالىق دامىتۋدىڭ 2020-2025» باعدارلاماسى اياسىندا قالادا جالپى قۇنى  67 ملرد 600 ملن تەڭگەنى قۇرايتىن 8 جوبا جۇزەگە اسىرىلۋدا. جوبالار تولىق ىسكە قوسىلعاندا 1000-نان استام قىزىلوردالىق جۇمىسپەن قامتىلاتىن بولادى.

«بيزنەستىڭ جول كارتاسى» نەگىزىندە جالپى قۇنى 6 ملرد 500 ملن تەڭگە بولاتىن 161 جوبا قارجىلاندىرىلىپ, 30 تۇرعىن 57 ملن تەڭگە قايتارىمسىز گرانت الدى. «قاراپايىم زاتتار ەكونوميكاسى» بويىنشا  قۇنى 968 ملن تەڭگەلىك 13 جوبا قارجىلاندىرىلدى.

«وتكەن جىلى قارجىلاندىرۋدىڭ بارلىق كوزدەرى ەسەبىنەن جالپى اۋدانى 371 مىڭ 314 شارشى مەتر تۇرعىن ءۇي پايدالانۋعا بەرىلدى. جىل كولەمىندە 1 مىڭ 342 قىزىلوردالىق باسپانالى بولدى. قالاداعى قۇرىلىس جۇمىستارىنىڭ كولەمى 58 ملرد تەڭگەگە جەتتى. ايماقتا اتقارىلعان قۇرىلىس جۇمىستارىنىڭ 55 پايىزى قىزىلوردا قالاسىنا ۇلەسىندە» دەدى شاھار باسشىسى.

ءبىلىم بەرۋ ۇيىمدارىنداعى ورىن تاپشىلىعىن شەشۋ ءۇشىن وتكەن جىلى  جاپپاسباي باتىر كوشەسىنىڭ بويىنان  600 ورىندىق ءبىلىم ورداسى پايدالانۋعا بەرىلدى. جەكە ينۆەستور ەسەبىنەن سالىنعان 500 ورىندىق «زەردە» مەكتەبى ءوز جۇمىسىن باستادى. بۇدان بولەك بايتەرەك شاعىن اۋدانىندا «جول كارتاسى» اياسىندا 600 ورىندىق, "ساياحات" مولتەك اۋدانىنان جەكە ينۆەستور ەسەبىنەن 300 ورىندىق مەكتەپتىڭ قۇرىلىسى جۇرگىزىلۋدە. سپمك-70 مولتەك اۋدانىنان 600 ورىندىق جەكە مەكتەپتىڭ قۇرىلىسى جاقىن كۇندەرى باستالادى.

قالانىڭ ينجەنەرلىك – كوممۋنيكاتسيالىق ينفراقۇرىلىمىن دامىتۋ ماقساتىندا "نۇرلى جەر" باعدارلاماسى اياسىندا بارلىق دەڭگەيدەگى بيۋدجەتتەردەن 19 ملرد 200 ملن  تەڭگە ءبولىنىپ, ءتيىستى جۇمىستار ءوز دەڭگەيىندە ورىندالدى. «وڭىرلەردى دامىتۋ» باعدارلاماسى اياسىندا بىلتىر 2 ملرد 35 ملن تەڭگەگە 37 كوپقاباتتى تۇرعىن ءۇي قايتا جاڭعىرتۋدان وتكەن.

نۇرلىبەك ماشبەك ۇلى وبلىس ورتالىعىندا جول-كولىك ينفراقۇرىلىمىن دامىتۋدا دا جاڭا جوبالار جۇزەگە اسقانىن اتاپ ءوتتى. رەسپۋبليكالىق جانە جەرگىلىكتى بيۋدجەتتەن بولىنگەن 9 ملرد 112 ملن تەڭگەگە 408 كوشەگە اعىمداعى, ورتاشا جانە كۇردەلى جوندەۋ جۇمىستارى جۇرگىزىلدى. قالادا سوڭعى جىلدارى جول قۇرىلىسىن دامىتۋعا 30 ملرد تەڭگەگە جۋىق قارجى تارتىلىپ, 840 شاقىرىم بولاتىن 1 مىڭ 177 كوشە جوندەۋدەن وتكەن.

جىلدى جوعارى كورسەتكىشتەرمەن قورىتىندىلاۋعا  مەملەكەت باسشىسىنىڭ باستاماسىمەن جۇزەگە اسقان «جۇمىسپەن قامتۋدىڭ جول كارتاسى» وڭ اسەرىن تيگىزدى.                        

جول كارتاسى اياسىندا  قالا بيۋدجەتىنە 18 ملرد 356 ملن تەڭگە ءبولىنىپ, 107 جوبا قارجىلاندىرىلدى. بەس جۇزدەن استام ادام جۇمىسپەن قامتىلدى.

قالا باسشىسى كوپ شارۋانىڭ بيىل دا ءوز جالعاسىن تاباتىنىن اتاپ ءوتتى. قازىر  «نۇرلى جەر» باعدارلاماسى ارقىلى رەسپۋبليكالىق, وبلىستىق بيۋدجەتتەن 5 ملرد 500 ملن تەڭگە ءبولىندى. بۇل قاراجاتتار سپمك-70 جانە سىرداريا وزەنىنىڭ سول جاعالاۋىندا 1 مىڭ 290 پاتەرلى تۇرعىن ۇيلەر قۇرىلىسىن جۇرگىزۋگە, سپمك-70, شانحاي, تيتوۆ, ءال-فارابي مولتەك اۋداندارىنىڭ ينجەنەرلىك ينفراقۇرىلىمىن دامىتۋعا باعىتتالادى.

از قامتىلعان كوپبالالى وتباسىلارعا  192 تۇرعىن ءۇي ساتىپ الۋعا «نۇرلى جەر» باعدارلاماسى ارقىلى  1 ملرد 600 ملن تەڭگە قارالدى. جۇمىسپەن قامتۋدىڭ «جول كارتاسى» اياسىندا قالا بيۋدجەتىنە  5 ملرد 500 ملن تەڭگە ءبولىندى.  وسى باعدارلاما شەڭبەرىندە قىزىلجارما اۋىلدىق وكرۋگىندە  900 ورىندىق, بايتەرەك شاعىن اۋدانىندا 600 ورىندىق مەكتەپتەر بوي كوتەرەدى.  

قالادا كوگالداعى حوككەي الاڭى, تاسبوگەت كەنتىندە دەنەشىنىقتىرۋ–ساۋىقتىرۋ كەشەندەرى سالىنادى. الەۋمەتتىك قىزمەتتەر كورسەتۋ ورتالىعى, پوليتسيا بولىمشەسىنىڭ اكىمشىلىك عيماراتى قايتا جاڭعىرتۋدان وتەدى.

«اۋىل ەل بەسىگى» جوباسى شەڭبەرىندە قوسشىڭىراۋ, تالسۋات اۋىلدىق وكرۋگتەرىنىڭ ينجەنەرلىك ينفراقۇرىلىمىن دامىتۋ جۇمىستارى جاسالادى.  

سونىمەن قاتار جول جوندەۋ, ساياجايلىق ايماقتارعا اۋىز س قۇبىرىن تارتۋ, وسىعان دەيىن باستالعان ماگيسترالدىك جولداردى اياقتاۋعا دا قارجى قارالدى.

اكىم ەسەبىنەن كەيىن تۇرعىندار ساۋال قويىپ, ۇسىنىستارىن جەتكىزدى. ەسەپتى وبلىس اكىمى گۇلشارا ابدىقالىقوۆا قورىتىندىلاپ, قالا باسشىسىنا بىرقاتار تاپسىرما بەردى.