تايلاندتىڭ سايلاۋ كوميسسياسى ەلدە مەرزىمىنەن بۇرىن وتەتىن پارلامەنتتىك سايلاۋعا قاتىساتىن پارتيالاردى تىركەۋدى پوليتسيا بولىمىندە جۇزەگە اسىرۋعا ءماجبۇر بولدى.
جەرگىلىكتى باسىلىمداردىڭ جازۋىنشا, العاشىندا پارتيالىق تىزىمدەردى تىركەۋدى جاقىن ماڭداعى ستاديوندا وتكىزۋ جوسپارلانعان ەكەن. بىراق, وعان باراتىن جولدى وپپوزيتسيا قورشاپ العاندىقتان, ستاديون اۋماعىنا تەك توعىز پارتيانىڭ وكىلدەرى عانا كىرۋگە جول تاۋىپتى. قالعان پارتيالاردىڭ وكىلدەرى عيماراتقا كىرە الماعان. بۇل ەلدە پارلامەنتتىك سايلاۋ 2014 جىلدىڭ 2 اقپانىنا بەلگىلەنگەن. وتىنىشتەر 23-27 جەلتوقسان ارالىعىندا قابىلدانۋى ءتيىس. ال «پحىا تحان» بيلىك پارتياسىنىڭ تىزىمىندە پرەمەر-ءمينيستردىڭ مىندەتىن اتقارۋشى ينگلاك چيناۆات ءبىرىنشى بولىپ تۇر.
شاراينا
تايلاندتىڭ سايلاۋ كوميسسياسى ەلدە مەرزىمىنەن بۇرىن وتەتىن پارلامەنتتىك سايلاۋعا قاتىساتىن پارتيالاردى تىركەۋدى پوليتسيا بولىمىندە جۇزەگە اسىرۋعا ءماجبۇر بولدى.
جەرگىلىكتى باسىلىمداردىڭ جازۋىنشا, العاشىندا پارتيالىق تىزىمدەردى تىركەۋدى جاقىن ماڭداعى ستاديوندا وتكىزۋ جوسپارلانعان ەكەن. بىراق, وعان باراتىن جولدى وپپوزيتسيا قورشاپ العاندىقتان, ستاديون اۋماعىنا تەك توعىز پارتيانىڭ وكىلدەرى عانا كىرۋگە جول تاۋىپتى. قالعان پارتيالاردىڭ وكىلدەرى عيماراتقا كىرە الماعان. بۇل ەلدە پارلامەنتتىك سايلاۋ 2014 جىلدىڭ 2 اقپانىنا بەلگىلەنگەن. وتىنىشتەر 23-27 جەلتوقسان ارالىعىندا قابىلدانۋى ءتيىس. ال «پحىا تحان» بيلىك پارتياسىنىڭ تىزىمىندە پرەمەر-ءمينيستردىڭ مىندەتىن اتقارۋشى ينگلاك چيناۆات ءبىرىنشى بولىپ تۇر.
سەبەپ-سالدارىن تەكسەرەتىن كوميسسيا قۇرىلدى
ەگيپەتتە ەلدىڭ بۇرىنعى پرەزيدەنتى موحاممەد ءمۋرسيدى بيلىكتەن تايدىرۋعا قاتىستى ماسەلەلەردى تەكسەرۋمەن اينالىساتىن ارنايى كوميسسيا قۇرىلدى.
«فرانس-پرەسس» اگەنتتىگىنىڭ حابارلاۋىنشا, كوميسسيا قۇرۋ تۋرالى جارلىققا ەگيپەت پرەزيدەنتىنىڭ مىندەتىن اتقارۋشى ادلي مانسۋر قول قويعان. مانسۋردىڭ مالىمدەۋىنشە, بۇل تاۋەلسىز كوميسسيا مىسىردا 30 ماۋسىمنان باستاپ بۇگىنگى كۇنگە دەيىن بولعان جاعدايلاردى تەكسەرۋدەن وتكىزەدى. كوميسسيانىڭ قۇرامىندا بەس ادام بار. وعان سۋديا فۋاد رياد باسشىلىق ەتەدى. كوميسسيا جۇمىسىنىڭ العاشقى ناتيجەسى التى ايدان سوڭ شىعارىلماق.
داۋىل مەن جاۋىن ەلەكتر جارىعىنسىز قالدىردى
كانادادا قاتتى سوققان داۋىل مەن مۇز ارالاس جاۋىن سالدارىنان 400 مىڭعا جۋىق ادام ەلەكتر جارىعىنسىز قالدى. كەيبىر اقپاراتتارعا قاراعاندا, تابيعات اپاتىنان ەلدىڭ ونتاريو جانە تورونتو پروۆينتسيالارى ەداۋىر زارداپ شەككەن.
قازىر وسى پروۆينتسيالاردا ەلەكتر جەلىلەرىن قالپىنا كەلتىرۋ جۇمىستارى كۇنى-ءتۇنى جۇرگىزىلىپ جاتىر. وعان كەم دەگەندە 72 ساعاتتاي ۋاقىت كەرەك. اۋا رايىنىڭ قولايسىزدىعىنان ەل اۋماعىندا جۇزدەگەن اپات بولعان. سونىڭ سالدارىنان بەس ادام مەرت بولعان كورىنەدى. بۇلاردان بولەك بىرنەشە قالانىڭ اۋەجايلارىندا كوپتەگەن اۆيارەيس كەيىنگە قالدىرىلىپ وتىر.
قىسقا قايىرىپ ايتقاندا:
● تۇرمەدەن بوساتىلعان ميحايل حودوركوۆسكي بەرليندە وتكىزگەن ءباسپاسوز ءماسليحاتىندا ۋكراينا پرەزيدەنتى ۆيكتور يانۋكوۆيچتى رەسەيلىك ارىپتەسى ۆلاديمير پۋتيننەن ۇلگى الۋعا شاقىردى. بۇل يۋليا تيموشەنكوعا قاتىستى بولدى.
● توكيونىڭ ورتالىعىنداعى مەكتەپ اۋلاسىندا ەر ادام وزىنە جانە ويناپ جۇرگەن ءبىر بالاعا ءورت قويدى. ەكەۋى دە قاتتى كۇيگەندىكتەن, اۋرۋحاناعا جاتقىزىلدى. وقيعا كەشە تاڭەرتەڭ بولعان.
● بورتىندا 182 جولاۋشىسى بار ۇلىبريتانيا اۆياكومپانياسىنىڭ بوينگ 747 ۇشاعى يوحاننەسبۋرگ اۋەجايىندا ءبىر قاناتىمەن عيمارات قابىرعاسىنا سوعىلدى. زارداپ شەككەندەر جوق.
● شۆەتسيانىڭ ترانوس اتالاتىن قالاسىندا اتى-ءجونى اتالماعان ءبىر جاس جىگىت ىشىندە ءتورت جاستاعى بالا وتىرعان اۆتوماشينانى «قۋىپ» كەتىپتى. ماشينادا بالا بار ەكەنىن بىلگەن ول 100 مەتردەي جۇرگەننەن سوڭ ونى ءتۇسىرىپ تاستاعان. ال ءوزى ءۇش ساعاتتان كەيىن قولعا تۇسكەن.
سايلاۋ وتكىزۋ مۇمكىن ەمەستىگىن مويىندادى
ۋكراينا ىشكى ىستەر مينيسترلىگىنىڭ بۇرىنعى باسشىسى, قازىرگى «ەۋرومايدان» جەتەكشىلەرىنىڭ ءبىرى يۋري لۋتسەنكو ۋكراينادا مەرزىمىنەن بۇرىن پرەزيدەنتتىك سايلاۋ وتكىزۋ مۇمكىن ەمەستىگىن مويىندادى. مۇنى ول كيەۆ ورتالىعىنداعى اكتسياعا قاتىسۋشىلارمەن بەيرەسمي جاعدايدا بولعان اڭگىمە كەزىندە مالىمدەگەن.
ساياساتكەردىڭ اتاپ وتۋىنشە, وپپوزيتسيانىڭ باستى ماقساتى 2015 جىلى وتەتىن پرەزيدەنت سايلاۋىنا دايىندىق بولىپ تابىلادى. «بىزگە ءبىر عانا كوسەم كەرەك, ون كوشباسشىمەن سوعىسقا بارۋ مۇمكىن ەمەس, – دەپ ايتىپتى لۋتسەنكو. – سايلاۋدا وپپوزيتسيالىق كانديداتتىڭ 80 پايىزدىق ەسەپپەن جەڭۋىنە قول جەتكىزۋ قاجەت». «ەۋرومايدانعا» قاتىسۋشىلار تالابىنىڭ ءبىرى – ەلدە مەرزىمىنەن بۇرىن پرەزيدەنتتىك سايلاۋ وتكىزۋ بولاتىن.
اۋعاندىق بوسقىندار تالاپتارىن وسىلاي ءبىلدىردى
اۋعاندىق 200-دەن استام بوسقىن بەلگيانىڭ باتىسىنداعى مونس قالاسىندا قارسىلىق لاگەرىن ۇيىمداستىردى. «فرانس-پرەسس» اگەنتتىگىنىڭ حابارلاۋىنشا, ولار وسى ارقىلى ەلدىڭ پرەمەر-ءمينيسترى ەليو دە رۋپودان وزدەرىنە وسى ەلدە تۇراقتى تۇرۋعا كومەكتەسۋدى سۇراماق كورىنەدى.
بوسقىندار بريۋسسەلدەن مونس قالاسىنا دەيىنگى 70 شاقىرىمدىق جولدى جاياۋ ءجۇرىپ كەلىپتى. اۋعاندىق بوسقىندار قازىرگى كەزدە ەل استاناسىنداعى شىركەۋدە تۇرىپ جاتىر ەكەن. ۇكىمەت وكىلدەرى بۇل بوسقىنداردىڭ تالابى ستاندارتتىق تارتىپپەن قارالاتىندىعىن مالىمدەگەن. بەلگيا ۇكىمەتىنىڭ باسشىسى رۋپو, سونداي-اق, مونس قالاسىنىڭ مەرى دە بولىپ تابىلادى. قازىر ول ءىسساپاردا ءجۇر ەكەن.
سوت قالا باسشىسىنىڭ وكىلەتتىگىن توقتاتتى
ءتبيليسيدىڭ قالالىق سوتى گرۋزيا استاناسىنىڭ مەرى گيگي ۋگۋلاۆانىڭ وكىلەتتىگىن توقتاتتى. قالا باسشىسى وسىنىڭ الدىندا بيۋدجەت قارجىسىن تالان-تاراجعا سالدى دەپ ايىپتالعان بولاتىن.
تەرگەۋ مالىمەتتەرىنە قاراعاندا, گ.ۋگۋلاۆا 2012 جىلى ءتبيليسيدى دامىتۋ قورىنا تيەسىلى 30 ميلليون دوللارعا جۋىق قاراجاتتى «ءبىرتۇتاس ۇلتتىق قوزعالىسىنىڭ» سايلاۋالدى كامپانياسىنا پايدالانعان سياقتى. سونداي-اق, ونىڭ بەس ورىنباسارىنا دا ايىپ تاعىلىپ وتىر. ايتا كەتەيىك, قالا باسشىسى گرۋزيانىڭ ەكس-پرەزيدەنتى م.سااكاشۆيليدىڭ جاقتاسى بولىپ سانالادى.
ينتەرنەت ماتەريالدارى نەگىزىندە ازىرلەندى.