سولتۇستىك قازاقستان پد ءباسپاسوز قىزمەتىنىڭ حابارىنا قاراعاندا پەتروپاۆلدىڭ 38 جاستاعى (اتى-ءجونى ايتىلماعان) ءبىر تۇرعىنى قاڭتار ايىندا عانا ءۇش رەت دۇكەندەردەن ۇساق ۇرلىق قىلعانى ءۇشىن ۇستالعان. بارلىق جاعدايدا دا «ەكىجاقتى كەلىسىمگە كەلدى» دەگەن سەبەپپەن ول جازاسىز قۇتىلىپ وتىرعان.
جۋىردا ونىڭ كەزەكتى رەت دۇكەننەن ۇساق تاۋار ۇرلاپ تۇرعانى بەينەكامەراعا ءتۇسىپ, ونى دۇكەن يەسى الەۋمەتتىك جەلىلەرگە شىعارعان.
دۇكەننىڭ قوجايىنى ءوزىنىڭ پوليتسياعا شاعىم جاساۋعا قولى تيمەيتىنىن ايتىپ, تەك ۇرلىق پروتسەسىن جەلىگە سالىپ قويعان. ۇرى جازالانباسا قولى بىرەۋدىڭ زاتىن الۋدان قالمايتىنى بەلگىلى. جەلى قولدانۋشىلارى وسىنى ايتىپ شۋلاپ جاتقان سوڭ پوليتسيا دۇكەن يەسىنەن ارىز جازدىرىپ العان. ءسويتىپ, سۇعاناقتىڭ ءىسىن قك «ۇساق ۇرلىق» بابى بويىنشا سوتقا دەيىنگى تەرگەۋگە ىلەكتىرگەن. ەگەر ول بۇل جولى دا جازالانباي «ەكىجاقتىڭ كەلىسۋى بولدى» دەگەن سەبەپپەن جازادان بوساتىلسا ول ءوزىنىڭ ءىسىن جالعاستىرا بەرەرى ءسوزسىز. كەلىسىم ۇرىنىڭ ودان ءارى تايراڭداي بەرۋىنە مۇمكىنشىلىك تۋدىرىپ وتىر. سۇعاناقتى ەرەگەستىرمەۋدى ويلاعان دۇكەن يەلەرى ۇساق ۇرلىققا قول سىلتەپ, «كەلىسىمگە» كەلە سالادى. سايىپ كەلگەندە بۇل قوعام ءتارتىبىنىڭ بۇزىلا بەرۋىنە سوقتىرادى. ال پوليتسيا كەلىسىمگە كەلگەن جابىرلەنۋشىنى جازعىرادى. ودان دا ۇرىنىڭ ءبارىن ەركىنسىتىپ, دانىكتىرىپ قويعان زاڭنىڭ وسالدىعىن ايتساشى...