ماقتاارال اۋدانىنىڭ تۇرعىندارى زاڭسىز اڭشىلىقپەن اينالىسقان

كەلەس اپب-ءنىڭ پوليتسيا قىزمەتكەرلەرى تابيعاتتى قورعاۋمەن وعان زالال كەلتىرۋشىلەردى انىقتاۋ ماقساتىندا, تۇراقتى رەيدتىك-پروفيلاكتيكالىق ءىس-شارالاردى وتكىزىپ كەلەدى. وسى ماقساتتا جۇرگىزىلگەن جۇمىس بارىسىندا پوليتسەيلەر 2021 جىلدىڭ اقپان ايىندا بىرنەشە زاڭسىزدىقتاردىڭ جولىن كەستى. ماسەلەن, كەلەس اپب جپق تابيعاتتى قورعاۋ توبىنىڭ ينسپەكتورى پوليتسيا كاپيتانى جانبولات ساپارباەۆ, كۇندىزگى ساعات 15:30 شاماسىندا سىرداريا وزەنى بويىندا زاڭسىز اڭشىلىقپەن اينالىسىپ جۇرگەن ءۇش ەر ادامدى بايقايدى. 

ءتارتىپ ساقشىسى ولاردىڭ قارۋلارىن تەكسەرۋ كەزىندە زاڭدى تىركەلگەنى بەلگىلى بولدى. الايدا ەشقايسىسىنىڭ اڭشىلىق جاساۋعا رۇقسات قاعازدارى بولماعان. وسىعان بايلانىستى كۇدىكتى 3 ەر ادامعا قاتىستى قر اقبتك-ءنىڭ 382-بابى (جانۋارلار دۇنيەسىن پايدالانۋ تالاپتارىن جانە اڭ اۋلاۋ قاعيدالالارىن بۇزۋ) بويىنشا حاتتاما تولتىرىلىپ, 5 اەك ايىپپۇل سالىندى.

ودان بولەك, پوليتسەيلەر كەشكى ساعات 17:00 شاماسىندا اقتوبە اۋىلدىق وكرۋگىنىڭ باتىس جاعىنان اعىپ وتەتىن سىرداريا وزەنى بويىندا تىركەلمەگەن اڭشىلىق قارۋىن الىپ جۇرگەن جەرگىلىكتى تۇرعىندى انىقتادى. وعان قاتىستى قر اقبتك-ءنىڭ 482-بابى (جەكە جانە زاڭدى تۇلعالاردىڭ قارۋدى زاڭسىز يەلەنىپ الۋى, بەرۋى, وتكىزۋى, ساقتاۋى, الىپ ءجۇرۋى, تاسىمالداۋى) بويىنشا حاتتاما تولتىرىلىپ, جيناقتالعان ءىس-قۇجاتتارى كەلەس اۋداندىق سوتىنا جولدانۋدا.

سونداي-اق, پروفيلاكتيكالىق ءىس-شارا كەزىندە زاڭسىز بالىق اۋلاۋشىلار دا انىقتالدى. ياعني ءۇش جەرگىلىكتى تۇرعىن قارماقپەن زاڭسىز بالىق اۋلاپ جۇرگەن. ۇشەۋىنە قاتىستى قر اقبتك-ءنىڭ 383-بابى (بالىق اۋلاۋ جانە بالىق رەسۋرستارى مەن باسقا دا سۋ جانۋارلارىن قورعاۋ قاعيدالارىن بۇزۋ) بويىنشا اكىمشىلىك حاتتاما تولتىرىپ, 5 اەك كولەمىندە ايىپپۇل سالىنعان.

ءوز كەزەگىندە پوليتسەيلەر ازاماتتاردى تابيعاتتى قورعاۋ زاڭناماسىن بۇزباۋعا كەڭەس بەرەدى. براكونەرلىك ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى. ءتارتىپ ساقشىلارى تاعى دا تۇركىستان وبلىسىنىڭ تۇرعىندارى مەن قوناقتارىن قازاقستان رەسپۋبليكاسىنىڭ تابيعاتىن, جانۋارلار مەن وسىمدىكتەر الەمىن قورعاۋعا شاقىرادى.