ءورتتىڭ الدىن الۋ – ماڭىزدى مىندەت

- وندا مەملەكەتتىك ءورت باقىلاۋ باسقارماسى باستىعىنىڭ ورىنباسارى, ازاماتتىق قورعاۋ پودپولكوۆنيگى ايدار مۇساتاەۆ جاڭا باستالعان جىلدا عانا وبلىستا 73 ءورتتىڭ (2020 جىلدىڭ وسى كەزەڭىمەن سالىستىرعاندا 2 ەسە كوپ) ورىن العانىن, وندا 8 ادام قازا تاۋىپ, 10 ادام زارداپ شەككەنىن اتاپ ءوتتى. «كوبىنەسە بۇل الەۋمەتتىك بەيىمدەلمەگەن ازاماتتار, زەينەتكەرلەر, سونداي - اق بەيالەۋمەتتىك ءومىر سالتىن جۇرگىزەتىن, سپىرتتىك ىشىمدىكتەرگە اۋەس جانە ءورت قاۋىپسىزدىگى قاعيدالارىن ەلەمەيتىن ادامدار, - دەپ اتاپ ءوتتى ايدار قوبلان ۇلى.

ءورتتىڭ ەڭ كوبى پەتروپاۆل قالاسى مەن تايىنشا اۋدانىندا بولعان. ونىڭ باسىم بولىگى پەشپەن جىلىتۋدى ورناتۋ جانە پايدالانۋ كەزىندە ءورت قاۋىپسىزدىگى قاعيدالارىن بۇزۋ, ەلەكتر جابدىعىن مونتاجداۋ جانە تەحنيكالىق پايدالانۋ قاعيدالارىن بۇزۋ, حالىقتىڭ وتپەن ابايسىز جۇمىس ىستەۋى سەبەبىنەن بولىپتى. سول سەبەپتى بارلىق ءورتتىڭ 73%-ى جەكەمەنشىك تۇرعىن ءۇي سەكتورىنا تيەسىلى ەكەن.

گازبەن ۋلانۋ قاۋپى دە جوعارى. «وتكەن اپتادا پەتروپاۆل قالاسىنداعى جەكەمەنشىك تۇرعىن ۇيدە ءورت بولماسا دا گازبەن ۋلانۋدىڭ ءبىر جاعدايى تىركەلدى, وندا 2 ادام زارداپ شەككەن. ەرلى-زايىپتىلار ۋلانىپ, ەكەۋى دە اۋرۋحاناعا جاتقىزىلدى. 1960 جىلى تۋعان ەر ادام رەانيماتسيادا, ال 1961 جىلى تۋعان ايەل تەراپەۆتيكالىق بولىمشەگە تۇسكەن. ۋلانۋدىڭ سەبەبى ءورت قاۋىپسىزدىگى تالاپتارىن بۇزۋ (مۇرجا قۇبىرىنىڭ كۇيەمەن بەكىتىلۋى) بولدى», - دەپ ءتۇسىندىردى ازاماتتىق قورعاۋ پودپولكوۆنيگى.

ءورت ءسوندىرۋ قىزمەتى ءورتتىڭ الدىن الۋ جۇمىستارىنا ەرەكشە نازار اۋدارادى. حالىقتى ورتكە قارسى قاۋىپسىزدىك تالاپتارىنا وقىتۋ جۇرگىزىلەدى. جىل باسىنان بەرى جەرگىلىكتى اتقارۋشى ورگاندارمەن, ەرىكتىلەرمەن بىرلەسىپ, شامامەن 18 مىڭ ادامدى قامتي وتىرىپ, 7 مىڭنان استام ءۇي ارالاپ, 9 مىڭعا جۋىق پاراقشالار تاراتىلعان. ورتتەن ەۆاكۋاتسيالاۋ بويىنشا 3 پراكتيكالىق جاتتىعۋ, 300-دەن استام وقۋشىنى قامتي وتىرىپ, 2 ينتەراكتيۆتى ساباق وتكىزىلگەن ەكەن.

تاقىرىپتى ەسىل اۋدانىنىڭ تج ءبولىمىنىڭ باستىعى, ازاماتتىق قورعاۋ پودپولكوۆنيگى جۇلدىز ەسەنعازين جالعاستىرىپ, پەشتەر مەن گاز جابدىقتارىن پايدالانۋ كەزىندە ءورت قاۋىپسىزدىگى ەرەجەلەرىن قاتاڭ ساقتاۋ قاجەتتىگىنە نازار اۋداردى. «2021 جىلدىڭ باسىنان بەرى ەسىل اۋدانىنىڭ اۋماعىندا 4 ءورت بولدى, ماتەريالدىق زالال 1 ملن 350 مىڭ تەڭگە. ورتسوندىرۋشىلەردىڭ قاتىسۋىمەن 5 ملن 650 مىڭ تەڭگەنىڭ ماتەريالدىق قۇندىلىقتارى قۇتقارىلدى, بۇل 2020 جىلعى دەرەكتەرمەن سالىستىرعاندا 39%-عا ارتىق», دەدى ول.

ءورتتىڭ ءجيى ورىن الاتىن ءبىر سەبەبى  - ەلەكتر سىمدارىنىڭ قىسقا تۇيىقتالۋى. زاماناۋي ەلەكتر سىمدارىنىڭ كوپ جاعدايدا ساپاسى تومەن بولادى, سوندىقتان كابەل نەمەسە سىمنىڭ ءب ۇلىنۋىن كوزبەن انىقتاۋ مۇمكىن ەمەس. ەلەكتر قوندىرعىلاردىڭ بەرىكتىگى مەن ۇزدىكسىز جۇمىسىنىڭ اپاتتى جاعدايلارعا جەتۋى, بىرقاتار مىندەتتى شارتتاردى ورىندالماۋىنا تىكەلەي بايلانىستى.

كەيدە كابەلدەردىڭ ءونىم وندىرۋشىدەن تۇتىنۋشىعا, ودان قويماعا, جەتكىزۋشىدەن دەلدالعا, ساتۋشىدان ساتىپ الۋشىعا تاسىمالداۋىنىڭ سالدارىنان مەحانيكالىق جانە فيزيكالىق اسەرلەرگە ءجيى ۇشىرايدى. كوپ جاعدايدا كابەلدىڭ زاقىمدالۋى ىستەن شىعۋ مەن قىسقا تۇيىقتالۋ سياقتى سالدارلارعا اكەلەدى.

سوندىقتان ەلەكترمەن جابدىقتاۋ بويىنشا وقيعالار مەن اپاتتارعا جول بەرمەۋ ءۇشىن كابەلدىك جەلىلەردى مەزگىل-مەزگىل تەكسەرۋ قاجەت. وسىنداي ءىس-شارالاردىڭ ۋاقتىلى جۇرگىزۋىنەن زاقىمدالعان كابەل جەلىسىن انىقتاپ, ادامداردىڭ توكپەن زارداپ شەگۋىنە جانە ادامداردىڭ قازا بولۋىمەن ءورتتىڭ پايدا بولۋىن الدىن الۋعا بولادى دەدى ماماندار.

سولتۇستىك قازاقستان وبلىسى