سولتۇستىك قازاقستان وبلىسىندا دا بۇگىن مەملەكەت باسشىسى قىسىم-جومارت توقاەۆتىڭ تاپسىرماسىنا سايكەس جامان ىندەتكە قارسى ەرىكتىلەرگە رەسەيدە شىققان «سپۋتنيك V» ۆاكتسيناسىن ەگۋ باستالدى, دەپ حابارلايدى Egemen.kz
بۇگىنگى تاڭدا 17 ەگۋ تىرەگىندە وسى جۇمىس باستالىپ كەتتى, ال جالپى ەكپەگە جاتاتىن ادامدار سانى وبلىستا 115 مىڭ.
ال ءساۋىر ايىنان باستاپ وتاندىق QazCovid-in ۆاكتسيناسى ەگىلە باستايتىن بولادى. بۇعان دەيىن ايتىلعانىنداي ۆاكتسينا الدىمەن مەديتسينا مەن پوليتسيا قىزمەتكەرلەرىنە, اسكەري قىزمەتشىلەرگە ەگىلە باستايدى. الايدا ادامنىڭ ۆاكتسيناعا توزىمدىلىگى سىناق ارقىلى الدىمەن تەكسەرىلەدى, سونىمەن قاتار دارىگەردىڭ باقىلاۋىنان وتەدى.
مەديتسينالىق بيكەلەردىڭ ءبارى بۇرىننان ەكپە جۇمىستارىن جۇرگىزىپ كەلە جاتسا دا بۇل جولى ولاردىڭ 2 مىڭداي مەدبيكەگە قوسىمشا نۇسقاۋلىقتار بەرىپ, ارنايى قىسقا دايىندىقتان وتكىزىلگەن.
بارلىق ەلدەردىڭ ماماندارى دالەلدەگەنىندەي جامان ىندەتتىڭ جايىلۋىن تەك ۆاكتسيناتسيالاۋ ارقىلى توقتاتۋعا بولادى. تەك ونىڭ ساپاسى جاقسى بولسىن دەڭىز.
ۆاكتسيناتسيا ينفەكتسيادان ءتيىمدى قورعاۋ جانە جاپپاي يممۋنداۋ ناتيجەسىندە حالىقتىڭ ينفەكتسيا مەن اۋرۋشاڭدىق قاۋپىن ازايتاتىن ناقتى يممۋندىق جاۋاپتى ىنتالاندىرادى.
دەنساۋلىق ساقتاۋ مينيسترلىگىنىڭ مالىمەتىنشە, سوڭعى 20 جىلدا ۆاكتسيناتسيالاۋدىڭ ارقاسىندا مىنانشا اۋرۋلار ازايعان:- قىزامىق - 56 ەسەدەن استام;- ەپيدەميالىق پاروتيت - 119 ەسەدەن استام;- حالىق اراسىندا ۆيرۋستى «ۆ» گەپاتيتى 34,7 ەسە, ال وسى ينفەكتسياعا قارسى ۆاكتسيناتسيالانعان بالالار اراسىندا 262 رەتكە اۋرۋ ازايدى (ۆگۆ-عا قارسى ۆاكتسيناتسيا 1998 جىلدان باستاپ ەنگىزىلگەن).
وبلىستىڭ باس مەملەكەتتىك سانيتارلىق دارىگەرى اسەت جۇماتاەۆتىڭ ايتۋىنا قاراعاندا قازىر وبلىسقا «سپۋتنيك V» ۆاكتسيناسىنىڭ 1200 دوزاسى كەلىپ تۇسكەن.
جوعارىدا ايتقانىمىزداي ءبىرىنشى كەزەڭدە ينفەكتسيالىق اۋرۋحانالاردىڭ, قابىلداۋ بولمەلەرىنىڭ, جان ساقتاۋ جانە قارقىندى تەراپيا بولىمشەلەرىنىڭ, ەمحانالار «سۇزگىلەرىنىڭ» مەديتسينالىق قىزمەتكەرلەرى, سانيتاريالىق-ەپيدەميولوگيالىق قىزمەتتىڭ قىزمەتكەرلەرى ەگىلەدى.
العاشقىلاردىڭ ءبىرى بولىپ ۆاكتسينانى سولتۇستىك قازاقستان وبلىستىق دەنساۋلىق ساقتاۋ باسقارماسىنىڭ باستىعىنىڭ ورىنباسارى نۇرلان ايمانوۆ سالدىردى.
«كادىمگى ەكپە سياقتى, ەشقانداي اۋىرتقانى دا سەزىلمەدى. ماسانىڭ شاققانىنداي عانا اسەرى بولدى. ءبارىمىز دە امان بولايىق», دەدى ول ەكپە سالدىرىپ شىققان سوڭ.