وبلىستىق پوليتسيا دەپارتامەنتىندە وتكەن جىلدى قورىتىندىلاعان ونلاين وتىرىس بولدى. 2020 جىلى بارلىعى 4766 قىلمىس تىركەلگەن. بۇل الدىنداعى جىلدان 25%-عا ازايدى دەگەن ءسوز. پوليتسيا قىزمەتىندە قىلمىستىڭ الدىن الۋعا جانە اشۋعا, اسىرەسە اۋىر جانە اسا اۋىر تۇرلەرىن اشۋعا ەرەكشە نازار اۋدارىلدى. بارلىق قىلمىس تۇرلەرىنىڭ سانى ازايدى, ونىڭ ىشىندە ادام ءولتىرۋ, دەنساۋلىققا زيان كەلتىرۋ, قاراقشىلىق, توناۋ بار.
ىشكى ىستەر ورگاندارى جۇيەسى ءۇشىن 2021 جىل قۇقىق بۇزۋشىلىقتاردىڭ الدىن الۋ جانە «جۇرتقا جاقىن پوليتسيا» قاعيداتىن قامتاماسىز ەتۋ جىلى دەپ جاريالاندى. وسى ورايدا پوليتسيا جۇيەسىنىڭ ساپالىق وزگەرۋى باسىم مىندەت, ياعني سەرۆيستىك, اشىق بولۋى جانە ادامداردىڭ وتىنىشتەرىنە جەدەل دەن قويۋ قاجەت ەكەنى ايتىلدى.
«باسشىلاردان ءار قىزمەتكەرگە قىزمەتتىك جانە اسكەري ءتارتىپتى بۇزعاندارعا ەشقانداي اياۋشىلىق بولماعانىن جانە بولمايتىنىن جەتكىزۋدى سۇرايمىن. بۇل ەلىمىزدىڭ باسشىلىعىنىڭ, ءمينيسترىمىزدىڭ ۇستانىمى جانە مەنىڭ جەكە پىكىرىم. مەن سىزدەرگە زاڭ شەڭبەرىندە ءوزىمىزدىڭ قاتارىمىزدى لايىقسىز قىزمەتكەرلەردەن تازارتۋ جونىندەگى جۇمىستى جالعاستىرۋ ءۇشىن بارلىق وكىلەتتىكتەردى بەرەمىن», دەدى ءوزىنىڭ سوزىندە پد باستىعى, پولكوۆنيك مارات تولەباەۆ.
وتىرىستا وزدەرى باسشىلىق ەتەتىن ءبولىنىستىڭ جۇمىسىنداعى كورسەتكىشتەردىڭ تومەندەۋىنە جول بەرگەن باسشىلار تىڭدالدى. الداعى جىلى پوليتسيا قىزمەتىنە تسيفرلاندىرۋدى, «حالىق ۇنىنە قۇلاق اساتىن مەملەكەت» تۇجىرىمداماسىنىڭ قاعيداتتارىن سەنىمدى ەنگىزۋ بويىنشا كوپتەگەن جۇمىس كۇتىپ تۇر.