بۇگىندە تۇركىستان وبلىسىندا كۇن جىلى, تاۋلى اۋدانداردا عانا «قىستىڭ ءسانىن» كەلتىرىپ قار جاتىر. ال قىس باستالعالى بەرى جالپى 7 رەسپۋبليكالىق, وبلىستىق ماڭىزداعى اۆتوموبيل جولدارىنىڭ جابىلۋ وقيعالارى ورىن الىپ, اۆاريالىق قۇتقارۋ جۇمىستارىن جۇرگىزۋ ءۇشىن 21 تەحنيكا جۇمىلدىرىلعان. قار قۇرساۋىنان 5 ادام قۇتقارىلىپ, قاۋىپسىز جەرگە جەتكىزىلگەن, دەپ حابارلايدى Egemen.kz
وڭىرلىك كوممۋنيكاتسيالار قىزمەتىندە وتكەن بريفينگتە وسىنداي دەرەكتەر كەلتىرگەن تۇركىستان وبلىسى تجد توتەنشە جاعدايلاردى جويۋ باسقارماسىنىڭ باستىعى تالعات دوساليەۆ بارلىق جولدار باقىلاۋعا الىنعانىن مالىمدەدى.
«وڭىردە رەسپۋبليكالىق جانە وبلىستىق جولدارداعى اسۋلارداعى 11 جىلىتۋ بەكەتتەرى توسەك-ورىن, ەلەكتر قوزعالتقىشتارى جانە كومىر-وتىندارىمەن قامتاماسىز ەتىلگەن. جولداردى قاردان تازالاۋعا تۇز سەبۋ, قۇم شاشۋ جۇمىستارىنا جالپى 550-گە جۋىق ادام جانە 178 تەحنيكا تارتىلعان. سونداي-اق 1400 دانا «تايعاق جول» بەلگىلەرى ورناتىلعان», دەدى تالعات سەرىك ۇلى.
وبلىس اۋماعىنداعى 40 سۋ قويماسىنىڭ ۇشەۋىنە (اقسۇمبە, باقىرلى, اششى) كۇردەلى جوندەۋ جۇمىستارى جۇرگىزىلگەن. كوكتەمگى مەزگىلدە سۋ تاسقىنىن بولدىرماۋ, الدىن الۋ بويىنشا ءتيىستى جۇمىستار اتقارىلۋدا. سىرداريا وزەنىنە جانە قاۋىپتى ۋچاسكەلەرگە جەر ءۇستى, اۋەدەن شولۋ بويىنشا كۇندەلىكتى مونيتورينگ جۇمىستارى جۇرگىزىلۋدە.