قۇرمانعازىنىڭ «ادايى», كۇيساندىقتا شەبەر ورىندالعان شوپەننىڭ شىعارماسى كيەلى تۇركىستان اسپانىندا قالىقتادى. ۇستازدار مەن مەكتەپ وقۋشىلارى حالىق اسپاپتار وركەسترىنىڭ ورىنداۋىنداعى كۇيلەر, كۇيساندىققا جان بىتىرگەن توعىزىنشى سىنىپ وقۋشىسى شۇعىلا ابىلقاسىنىڭ شەبەرلىگى كوپشىلىكتى ءتانتى ەتتى. قازىلار القاسىنىڭ مۇشەسى, «جىگىتتەر» كۆارتەتىنىڭ ءانشىسى ايدار تۇرعانبەكتىڭ ونەرى دە كورەرمەن كوڭىلىن كوتەردى.
وسىلايشا, تۇركىستان قالاسىندا «تۇركىستان: كونە مەن كەلەشەك كوپىرى» اتتى جاڭا وبلىستىق ونەر فەستيۆالىنىڭ قالالىق كەزەڭى باستاۋ الدى. اۋدان, قالالىق ىرىكتەۋ كەزەڭى جاس ونەرپازداردىڭ شابىتىن شىڭداپ, ۇلكەن ساحناعا جول اشپاق. «اقجايىق» مۋزىكا مەكتەبىندە وتكەن كەشتە تۇركىستاندىق تالانتتار ونەرلەرىن قازىلار القاسىنىڭ سىنىنا سالدى. جاس ونەرپازداردى قولداۋعا كەلگەن وبلىس اكىمى ومىرزاق شوكەەۆ جاستاردىڭ تانىلۋىنا جول اشاتىن ونەر دوداسىنىڭ قاتىسۋشىلارىنا ساتتىلىك تىلەدى. «ەلدەگى كارانتين شەكتەۋلەرىنە بايلانىستى وقۋشىلار ونەرىن كوپشىلىك الدىندا كەڭىنەن كورسەتۋگە مۇمكىندىكتەر بولماۋدا. دەگەنمەن تۇركىستان قالاسىندا باستاۋ الىپ وتىرعان ونەر فەستيۆالى ءارى قاراي اۋدان, قالالاردا جالعاسىن تابادى. بۇگىنگى ونەر دوداسىنا قاتىسقان بارلىق جاس دارىندارعا ساتتىلىك تىلەيمىن. شىعارماشىلىقتا ونەرلەرىڭىز شىڭدالىپ, بيىك بەلەستەردەن كورىنۋگە تىلەكتەسپىن!», دەدى ومىرزاق شوكەەۆ.
جاس تالانتتار فەستيۆالىندە «سىمبات» بي توبى «شاشۋ» ءبيىن بيلەپ, تۇركىستاندىق وقۋشىلار مەن تۇركىستان ساز مەكتەبىنىڭ ۇستازدارى بىرلەسە ساكسافون, فلەيتا, رويال, باراباندا ويناپ, ءوز ونەرىن كورسەتتى. سونداي-اق, «شابىت» دومبىراشىلار ءانسامبلىنىڭ ورىنداۋىندا ء«نار اعاشى» كۇيى كورەرمەن نازارىنا ۇسىنىلدى. حالىق اسپاپتار وركەسترىنىڭ كۆارتەتى كۇي تارتىپ, «بولاشاق» ۆوكالدى توبى, بالالار مەن جاسوسپىرىمدەر ورتالىعىنىڭ كۆارتەتى اننەن شاشۋ شاشتى.
ايتا كەتەلىك, وڭىردە 8 ونەر مەكتەبى, 13 ساز مەكتەبى جۇمىس ىستەيدى. ونىڭ ىشىندە «اقجايىق» ساز مەكتەبىن ەرەكشە اتاپ وتۋگە بولادى. مەكتەپ زاماناۋي ۇلگىدەگى مۋزىكالىق اسپاپتارمەن جابدىقتالعان.
تۇركىستان وبلىسى