ەلىمىزدە وتكەن سايلاۋدى باقىلاعان شانحاي ىنتىماقتاستىق ۇيىمىنىڭ وكىلدەرى مالىمدەمە جاساپ, تۇتاستاي ساياسي شارانى وڭ باعالادى. حالىقارالىق ۇيىمنىڭ بايقاۋشىلار توبىن شىۇ باس حاتشىسىنىڭ ورىنباسارى چجان حايچجوۋ باستاپ كەلدى.
حالىقارالىق بايقاۋشىلاردىڭ قۇرامىندا 15 ادام, اتاپ ايتقاندا, زاڭ شىعارۋشى, سايلاۋ ورگاندارىنىڭ وكىلدەرى, شىۇ-عا مۇشە مەملەكەتتەردىڭ ديپلوماتتارى, سونداي-اق شىۇ حاتشىلىعىنىڭ لاۋازىمدى تۇلعالارى اككرەديتتەلدى. داۋىس بەرۋ كۇنى ميسسيا مۇشەلەرى سايلاۋ ۋچاسكەلەرىن اشۋعا, ستاتسيونارلىق جانە تاسىمالداناتىن جاشىكتەردى پلومبالاۋعا, داۋىس بەرۋ پروتسەسىنە جانە بيۋللەتەندەردى ساناۋعا قاتىستى. قازاقستان اۋماعىنداعى سايلاۋ بارىسىن مەيىلىنشە قامتۋ ماقساتىندا ميسسيا وكىلدەرى نۇر-سۇلتان قالاسى مەن قازاقستاننىڭ باسقا دا وڭىرلەرىندە باقىلاۋ جۇرگىزدى. سايلاۋ قارساڭىندا جانە داۋىس بەرۋ كۇنى بايقاۋشىلار 118 سايلاۋ ۋچاسكەسىنە باردى.
«سايلاۋ الدىنداعى ناۋقاننىڭ بارلىق اسپەكتىسىن ەسكەرىپ, ەلدە ساياسي باسەكەلەستىكتىڭ, سايلاۋ ناۋقانىنىڭ اشىقتىعى مەن ايقىندىعىنىڭ بار ەكەنى بايقالدى. ميسسيا اتالعان ناۋقان قازاقستاننىڭ سايلاۋ زاڭناماسىنىڭ تالاپتارىنا جانە ەلدىڭ قابىلداعان حالىقارالىق مىندەتتەمەلەرىنە سايكەس كەلەتىنىن, سول سەكىلدى سايلاۋ ناتيجەلەرىنە اسەر ەتەتىن بۇزۋشىلىقتار انىقتالعان جوق دەپ سانايدى. ميسسيا وتكەن سايلاۋدى ەركىن, ءادىل, سەنىمدى جانە دەموكراتيالىق قاعيداتتار تۇرعىسىندا ءوتتى دەپ ەسەپتەيدى. سايلاۋدىڭ زاڭدىلىعى كۇمان تۋدىرمايدى», دەدى چ.حايچجوۋ.
ۇيىم بايقاۋشىلارىنىڭ ايتۋىنشا, ەلدەگى زاڭ شىعارۋشى ورگاندى سايلاۋ قازاقستاننىڭ دەموكراتيالىق مەملەكەتتى دامىتۋ جولىنداعى ماڭىزدى قادامى.
«ۇيىم قازاقستان حالقىن سايلاۋدىڭ اياقتالۋىمەن قۇتتىقتاپ, مەملەكەتتىلىكتى نىعايتۋ مەن الەۋمەتتىك-ەكونوميكالىق دامۋ باعىتىن ودان ءارى جۇزەگە اسىرۋدا تابىس تىلەيدى», دەدى شىۇ باس حاتشىسىنىڭ ورىنباسارى.