قاراعاندى وبلىسىنىڭ ساراپشىلارى مەن جاستار ۇيىمدارىنىڭ جەتەكشىلەرى قازاقستاننىڭ جاڭا كونستيتۋتسياسى جوباسىن تالقىلاپ, ونى قابىلداۋدى قولدايتىندارىن ءبىلدىردى, دەپ حابارلايدى Egemen.kz.
كەزدەسۋ ەل بولاشاعى, جاستاردىڭ ءرولى جانە ازاماتتاردىڭ ءومىرىن ايقىندايتىن نەگىزگى قاعيداتتار تۋرالى اشىق پىكىر الماسۋ الاڭىنا اينالدى. جاستار ۇسىنىلىپ وتىرعان باستامالاردىڭ پروگرەسسيۆتى ءارى يننوۆاتسيالىق سيپاتىن اتاپ ءوتىپ, ولاردىڭ قۇقىقتارىن قورعاۋدى كۇشەيتەتىنىنە سەنىم ءبىلدىردى.
جيىنعا قاراعاندى وبلىسىنىڭ اكىمى ەرماعانبەت بولەكپاەۆ, كونستيتۋتسيالىق كوميسسيا مۇشەلەرى نۇركەن كوبجانوۆ پەن بەكزات التىنبەكوۆ قاتىستى.
ءوز سوزىندە ءوڭىر باسشىسى جاڭا كونستيتۋتسيانى قابىلداۋ – تەك قۇقىقتىق قۇجاتتى جاڭارتۋ ەمەس, تەحنولوگيالىق رەۆوليۋتسيا جاعدايىندا مەملەكەتتىلىكتى نىعايتۋعا باعىتتالعان ستراتەگيالىق قادام ەكەنىن اتاپ ءوتتى.
«جاڭا كونستيتۋتسيانى قابىلداۋ بويىنشا بۇكىلحالىقتىق رەفەرەندۋم وتكىزۋ – ماڭىزدى ءارى تاريحي شەشىم. بۇل جەكەلەگەن نورمالاردى تۇزەتۋ عانا ەمەس, زاماناۋي سىن-قاتەرلەرگە جاۋاپ بەرەتىن مەملەكەتتىك قۇرىلىمنىڭ جاڭارتىلعان مودەلىن قالىپتاستىرۋ. ءبىز بۇل شەشىمگە اۋقىمدى ساياسي رەفورمالاردى كەزەڭ-كەزەڭىمەن جۇزەگە اسىرا وتىرىپ كەلدىك. جاڭا كونستيتۋتسيا بىرلىك, ادىلدىك جانە زاڭ ۇستەمدىگى قاعيداتتارىن ساقتاي وتىرىپ, جەكە تۇلعانى قورعاۋدى كۇشەيتەدى – كىناسىزدىك پرەزۋمپتسياسىن, جەكە بوستاندىقتاردى جانە ادۆوكاتتىڭ ءرولىن ناقتى بەكىتەدى. بۇگىن ءبىز بولاشاق ءومىرىمىزدىڭ نەگىزىن ايقىنداپ وتىرمىز, سوندىقتان دۇرىس تاڭداۋ جاساۋ ماڭىزدى», دەدى ەرماعانبەت بولەكپاەۆ.
وبلىس اكىمى 2019 جىلدان باستاۋ العان جانە قوعامدىق, مەملەكەتتىك ءارى ەكونوميكالىق جۇيەنى جاڭعىرتۋعا باعىتتالعان رەفورمالاردىڭ حرونولوگياسىنا توقتالىپ, ولاردىڭ زاڭدى جالعاسى رەتىندە جاڭا كونستيتۋتسيا ۇسىنىلىپ وتىرعانىن جەتكىزدى. سونىمەن قاتار رەفورمالاردى جۇزەگە اسىرۋداعى جانە قازاقستاننىڭ بولاشاعىن قالىپتاستىرۋداعى جاستاردىڭ رولىنە ەرەكشە ءمان بەردى.
كونستيتۋتسيالىق كوميسسيا مۇشەلەرى نۇركەن كوبجانوۆ پەن بەكزات التىنبەكوۆ كوميسسيا قۇرامىنداعى جۇمىس تاجىريبەلەرىمەن ءبولىسىپ, كونستيتۋتسيالىق رەفورمانى ازىرلەۋ بارىسىندا قوعامدىق قاتىسۋدىڭ ماڭىزىن اتاپ ءوتتى.
«تالداۋ قاراعاندى» وڭىرلىك اناليتيكا مەكتەبىنىڭ قاتىسۋشىسى اسىلجان تولەگەنوۆ ەكولوگيالىق قاعيداتتاردى كونستيتۋتسيالىق دەڭگەيدە بەكىتۋدىڭ ماڭىزدىلىعىنا توقتالدى.
«جاڭا كونستيتۋتسيا جوباسىندا ەكولوگيالىق ماسەلەلەر ورنىقتى دامۋ قاعيداتتارى ارقىلى كورىنىس تاپقان. مۇندا «تازا قازاقستان» تۇجىرىمداماسىنىڭ لوگيكالىق جالعاستىعى بايقالادى. ەكولوگيا – بۇل تەك جەكەلەگەن ەكولوگيالىق زاڭناما ماسەلەلەرى ەمەس, قورشاعان ورتا مەن تابيعي رەسۋرستارعا دەگەن كوزقاراسىمىز. جوبانى ازىرلەۋ بارىسىندا قوعام تاراپىنان جوعارى بەلسەندىلىك بولدى. بۇل قۇجاتتى ءبىز, قازاقستاندىقتار, ءوزىمىز ءۇشىن جازدىق», دەدى اسىلجان تولەگەنوۆ.
وبلىستىق جاستار ءىسى جونىندەگى كەڭەستىڭ مۇشەسى جانبوتا ەلۋباەۆ كونستيتۋتسيانىڭ زياتكەرلىك مەنشىكتى قورعاۋداعى جانە جاستاردىڭ شىعارماشىلىق الەۋەتىن دامىتۋداعى رولىنە توقتالدى.
«ۇلت قازىنا» جوباسىنىڭ مەنتورى سالتانات قايىربەك كونستيتۋتسيالىق رەفورما ادامي كاپيتال مەن كرەاتيۆتى سالانى دامىتۋعا جاڭا مۇمكىندىكتەر اشاتىنىن اتاپ ءوتتى.
«كونستيتۋتسيالىق رەفورما – بۇل جاڭا مۇمكىندىكتەرمەن قاتار ينستيتۋتتاردىڭ جاۋاپكەرشىلىگىن ارتتىرۋ. ءۇشىنشى باپتا ادامي كاپيتال مەملەكەتتىڭ نەگىزى ەكەنى ايقىن كورسەتىلگەن. دەمەك, عىلىمدى, ءبىلىمدى جانە مادەنيەتتى دامىتۋعا ايرىقشا ءمان بەرىلەدى. ءبىزدىڭ وڭىردە مادەني ءىس-شارالار فورماتىنان مادەني ءوندىرىس پەن كرەاتيۆتى يندۋستريانى دامىتۋعا كوشۋ باعىتىندا جاڭا باستامالار جۇزەگە اسىرىلۋدا. بۇل – جاڭا كونستيتۋتسيا تالاپتارىنا ساي كەلەتىن ۋاقتىلى قادام», دەدى ول.
كەزدەسۋ بارىسىندا قاتىسۋشىلار كونستيتۋتسيالىق رەفورمالاردىڭ نەگىزگى باعىتتارىن تالقىلاپ, پىكىر الماستى جانە وزدەرىن تولعاندىرعان سۇراقتارىن قويدى.