ەلىمىزدىڭ ونەركاسىپتىك كاسىپورىندارى جاڭا كونستيتۋتسياسىنىڭ جوباسىن قولدايتىنىن مالىمدەدى, دەپ حابارلايدى Egemen.kz.
«قازحروم» ترانسۇلتتىق كومپانياسى» اكتسيونەرلىك قوعامىنىڭ قۇرامىنا كىرەتىن اقتوبە فەرروقورىتپا زاۋىتىنىڭ ۇجىمى جاڭا كونستيتۋتسيانىڭ مانىنە توقتالىپ, ازاماتتاردى داۋىس بەرۋگە بەلسەندى قاتىسۋعا شاقىردى. كاسىپورىن قىزمەتكەرلەرىنىڭ پىكىرىنشە, رەفەرەندۋم مەملەكەتتىڭ الداعى دامۋ باعىتىن ايقىندايتىن ماڭىزدى قادام بولماق.
جاڭا كونستيتۋتسيا جوباسىن «پەتروپاۆل ەلەكتروتەحنيكالىق زاۋىتى» جشس قىزمەتكەرلەرى دە قولدادى. ولاردىڭ ايتۋىنشا, جاڭارتىلعان كونستيتۋتسيالىق نورمالار قۇقىقتىق مەملەكەتتى نىعايتۋعا, بيلىك ينستيتۋتتارىنىڭ ءرولىن ارتتىرۋعا جانە ازاماتتاردىڭ قۇقىقتارى مەن بوستاندىقتارىنىڭ كەپىلدىكتەرىن كۇشەيتۋگە باعىتتالعان.
سونداي-اق اباي وبلىسىنداعى اۋىل شارۋاشىلىعى تەحنيكاسىن وندىرەتىن جەتەكشى كاسىپورىنداردىڭ ءبىرى – «سەماز» جشس-دا كونستيتۋتسيالىق رەفورمانى قولدايتىنىن مالىمدەدى. 400-دەن استام مامان ەڭبەك ەتەتىن ۇجىم جاڭا كونستيتۋتسيا قۇقىقتىق كەپىلدىكتەردى نىعايتىپ, تۇراقتىلىق پەن دامۋ مۇمكىندىكتەرىن كەڭەيتەتىنىن, ءوڭىر مەن ەل ەكونوميكاسىنىڭ وسۋىنە سەرپىن بەرەتىنىن اتاپ ءوتتى.
ءۇش كاسىپورىن دا رەفەرەندۋمعا قاتىسۋدى ازاماتتىق جاۋاپكەرشىلىكتىڭ كورىنىسى رەتىندە باعالايدى. ولار جاڭارتىلعان كونستيتۋتسيا قازاقستاننىڭ تۇراقتى ءارى پروگرەسسيۆتى دامۋىنا بەرىك نەگىز قالايدى دەگەن سەنىم ءبىلدىردى.
كاسىپورىن قىزمەتكەرلەرى تۇراقتى جانە اشىق قۇقىقتىق ورتانى قالىپتاستىرۋ ءوندىرىستى دامىتۋعا, ينۆەستيتسيا تارتۋعا جانە ەلدىڭ الەۋمەتتىك-ەكونوميكالىق ءوسىمىن قامتاماسىز ەتۋگە مۇمكىندىك بەرەتىنىن ەرەكشە اتاپ ءوتتى.
ۇجىمدار رەفەرەندۋمعا قاتىسۋدى قازاقستاننىڭ بولاشاعىن قالىپتاستىرۋعا قوسىلعان ناقتى ۇلەس دەپ سانايدى.