كەشە پەتروپاۆل قالاسىندا قىستىڭ اسەم شاعىرماق كۇنى تۇردى. الدىڭعى تۇندە جاۋعان اق ۇلپا قار كوزدى قارىپ, اينالانىڭ ءبارىن اپپاق قىلعان. وسىدان 2-3 كۇن عانا بولعان 35-40 گرادۋستىق سۋىقتىڭ بۇگىن ءىزى دە جوق. بۇل دا بولسا حالىقتىڭ كوڭىلىن كوتەرىپ, ءبارى دە سايلاۋ ۋچاسكەلەرىنە قاراي اعىلدى.
تاڭعى ساعات 07-دە وبلىستاعى بارلىق 650 سايلاۋ ۋچاسكەسى ءوزىنىڭ ەسىكتەرىن ايقارا اشىپ, سايلاۋشىلاردى قارسى الدى. وبلىستا 14 اۋماقتىق سايلاۋ ۋچاسكەسى بار. اۋماقتىق ۋچاسكەلەر وڭىردەگى بارلىق 13 اۋداننىڭ ورتالىقتارى مەن وبلىس ورتالىعىندا ورنالاسقان.
تاۋەلسىزدىك جىلدارى سولتۇستىك قازاقستاننىڭ سايلاۋشىلارى بارلىق سايلاۋعا بەلسەنە قاتىسىپ كەلەدى. بۇگىنگى سايلاۋعا دا وبلىس تۇرعىندارى بەلسەنە قاتىستى. اركىم ءوزى قالاعان پارتياسىنا داۋىسىن بەرۋگە اسىققان ادامداردى پەتروپاۆلدىڭ بارلىق تۇكپىرىنەن كورۋگە بولاتىن ەدى.
بيىلعى سايلاۋدىڭ ەرەكشەلىگى – بارلىق دەڭگەيدەگى دەپۋتاتتار پارتيالىق ءتىزىم بويىنشا سايلاندى. بۇل قازاقستاندىق پارلامەنتاريزمدى دامىتۋدىڭ تاعى ءبىر قادامى بولدى.
كەشكى ساعات 20.00-دەگى مالىمەتكە قاراعاندا سولتۇستىكقازاقستاندىق سايلاۋشىلاردىڭ 75,5 پايىزى سايلاۋعا قاتىسىپ, ءوز داۋىستارىن بەرگەن. بۇل رەسپۋبليكا بويىنشا الدىڭعى ورىنداردىڭ ءبىرى.
جالپى, تەرىسكەيلىكتەر وزدەرىنىڭ قالاۋىن الدىن الا بەلگىلەپ, ەلىمىزدەگى تىنىشتىق پەن تۇراقتىلىققا داۋىس بەرگەنى ءسوزسىز.
سولتۇستىك قازاقستان وبلىسى