قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىنىڭ جالپى اسكەري فاكۋلتەتىنە اتى اڭىزعا اينالعان قولباسشى باۋىرجان مومىش ۇلىنىڭ ەسىمى بەرىلدى.
سالتاناتتى ءراسىم كەڭەس وداعىنىڭ باتىرى, حالىق قاھارمانى باۋىرجان مومىش ۇلىنىڭ 110 جىلدىعىنا ورايلاستىرىلدى. اتالعان ءىس-شاراعا باسشىلىق, پروفەسسورلىق وقىتۋشى قۇرام مەن ۋنيۆەرسيتەتتىڭ تىڭداۋشىلارى قاتىستى.
«باۋىرجان مومىش ۇلىنىڭ ءومىر جولى مەن ەرلىكتەرى ارقاشان بارلىق وفيتسەرگە جانە جاس ۇرپاققا ۇلگى بولارى انىق. باتىردىڭ ەسىمى بەرىلگەن جالپى اسكەري فاكۋلتەتىنىڭ اشىلۋى ءبىزدىڭ وقۋ ورنىنا فاكۋلتەت ماگيسترانتتارىن دايارلاۋدا زور ۇلەسىن قوسادى دەپ ۇمىتتەنەمىن», – دەپ اتاپ ءوتتى ۇلتتىق قورعانىس ۋنيۆەرسيتەتىنىڭ باستىعى, گەنەرال-لەيتەنانت سۇلتان قامالەتدينوۆ.
سالتاناتتى جاعدايعا قاتىسۋشىلار كومانديردى قۇرمەتپەن ەسكە الىپ, ونىڭ ءومىرى مەن ەرلىكتەرى تۋرالى قىزىقتى فاكتىلەرمەن ءبولىستى. وسكەلەڭ ۇرپاقتى تاربيەلەۋدە باتىردى ۇلگى ەتۋدىڭ ماڭىزدىلىعىن اتاپ ءوتتى.
وسى كۇنى اتى اڭىزعا اينالعان باۋىرجان مومىش ۇلىن ەسكە الۋ قۇرمەتىنە ەسكەرتكىش بۇرىش اشىلدى.
«جەدەل-تاكتيكالىق باسقارۋ بۋىنىنىڭ جوعارى بىلىكتى وفيتسەرلەرىن, بولاشاق قولباسشىلاردى دايارلايتىن جەتەكشى فاكۋلتەتتەردىڭ ءبىرى باۋىرجان مومىش ۇلىنىڭ ەسىمىمەن اتالادى», دەپ تولىقتىردى جەدەل ونەر جانە تاكتيكا كافەدراسىنىڭ باستىعى پولكوۆنيك ەرنەست ءجۇسىپوۆ.