شىمكەنتتە ءۇش باعىتتا اۋقىمدى جوبالار جۇزەگە اسىرىلادى

ءبىرىنشى باعىتقا سايكەس, ونەركاسىپ سالاسىندا 2021-2025 جىلدارى شەتەلدىك ينۆەستورلاردىڭ قاتىسۋىمەن (وڭتۇستىك كورەيا, رەسەي, قىتاي, تۇركيا, وزبەكستان, يسپانيا, فرانتسيا) كەمىندە 15 جوبا ىسكە اسىرىلادى. وعان 2,5 ملرد اقش دوللارى كولەمىندە شەتەلدىك ينۆەستيتسيا تارتۋ جوسپارلانۋدا. ناتيجەسىندە 2 مىڭنان استام ادام جۇمىسپەن قامتىلادى.

اگروونەركاسىپ سالاسىندا 136 گا «اگرويندۋستريالدى ايماق» قۇرىلىپ,  89 گا وندىرىستىك جىلىجاي سالىنباق. جىلىجاي, قارقىندى باۋ, مال بورداقىلاۋ, مال جانە قۇس ەتىن وڭدەۋ بويىنشا 42 ينۆەستيتسيالىق جوبالار ىسكە اسىرۋ كوزدەلىپ وتىر.

ەكىنشى باعىت بويىنشا 2021 جىلى 10 ەلدىمەكەندى سۋمەن جابدىقتاۋ جانە 2022 جىلعا دەيىن 8 ەلدىمەكەندى سۋمەن قامتاماسىز ەتۋ ءۇشىن تاعى 3 ماگيسترالدىق قۇبىر سالۋ جوسپارلانۋدا. قالانىڭ اۆتوكولىك ينفراقۇرىلىمىن 2025 جىلعا دەيىن دامىتۋ ءۇشىن بىرقاتار ءىس-شارا جوسپارلانعان. تۇرعىن ءۇي سالاسىندا 5 جىلدا 3 ميلليون شارشى مەتر باسپانا نەمەسە 47 مىڭ پاتەر سالۋ كوزدەلىپ وتىر (2021 جىلى  – 592,3 مىڭ شارشى مەتر, 2022 جىلى – 602,8 مىڭ شارشى مەتر, 2023 جىلى – 610,8 مىڭ شارشى مەتر, 2024 جىلى  – 624,1 مىڭ شارشى مەتر جانە 2025 جىلى – 632,3 مىڭ شارشى مەتر).

ءۇشىنشى باعىتقا سايكەس, 2021-2025 جىلدارى 24  مەكتەپ جانە 13 بالاباقشانى كۇردەلى جوندەۋ جۇمىستارى جۇرگىزىلەدى. ناتيجەسىندە ءۇش اۋىسىمدى جانە اپاتتى مەكتەپتەردىڭ ماسەلەسى تولىق شەشىلەدى. دەنساۋلىق ساقتاۋ سالاسىندا, شەتەلدىڭ زاماناۋي تەحنولوگياسىمەن جابدىقتالعان 1 000 ورىندىق كوپسالالى اۋرۋحانا, 10 مەديتسينالىق مەكەمەنىڭ قۇرىلىسى قولعا الىنباق. قالاداعى جالپى 36 مەديتسينا مەكەمەسىنىڭ ماتەريالدىق-تەحنيكالىق بازاسىن جاڭارتۋ جوسپارلانۋدا.

سپورتتىق ينفراقۇرىلىمدى دامىتۋ ماقساتىندا ءتورت دەنە شىنىقتىرۋ-ساۋىقتىرۋ كەشەنى سالىنىپ, 6 ستريت-ۆوركاۋت جانە 73 سپورت الاڭى اشىلادى. بالالار مەن جاسوسپىرىمدەر سپورت مەكتەپتەرىنىڭ فيليالدارى بارلىق شاعىناۋدانداردا جۇمىس ىستەيدى.